ވ އަތޮޅު ރައްޔިތުން ސިއްހީ ހިދުމަތް ހޯދަން މާލެ ފުރަން މަޖުބޫރުވެފައި
ވ އަތޮޅުގައި އަތޮޅު ހޮސްޕިޓަލެއް ހުރެ، ރައްޔިތުން ސިއްހީ ހިދުމަތް ހޯދަން މާލެ ފުރައިގެން ދިއުމަށް މަޖުބޫރު ވެފައިވާ ކަމަށް އެ އަތޮޅު ކައުންސިލަރު ސުޖާއު އަލީ މިއަދު ވިދާޅުވެއްޖެ އެވެ.
އެ އަތޮޅު ކޮންމެ ރަށެއްގައި ހެލްތް ޕޯސްޓަކާއި، އަތޮޅުގެ ވެރިކަންކުރާ ފުލިދޫގައި އަތޮޅު ހޮސްޕިޓަލެއް ގާއިމުކުރެވިފައި އެބަހުއްޓެވެ. ސުޖާއު ވިދާޅުވީ، އެ އަތޮޅުގައި އަތޮޅު ހޮސްޕިޓަލެއް ހުންނަނީ "ނަމެއްގައި" ކަމަށެވެ.
އަތޮޅު ހޮސްޕިޓަލުގައި ކުޑަކުދިންގެ ޑޮކްޓަރަކާއި، އަންހެނުންގެ ހާއްސަ ޑޮކްޓަރަކާއި، އާންމު ބަލިތަކުގެ ތިން ޑޮކްޓަރެއް ފަރުވާ ދެމުންދާ ކަމަށް އެ އަތޮޅު ކައުންސިލްގެ ރައީސް މައުލޫމާތު ދެއްވި އެވެ. އޭނާ ވިދާޅުވީ ޑޮކްޓަރުން ތިއްބެވި ނަމަވެސް، ރައްޔިތުންނަށް ލިބެންޖެހޭ ހިދުމަތް ނުދެވެނީ، އަތޮޅު ހޮސްޕިޓަލުގައި އުމްރާނީ ފެސިލިޓީސް ގާއިމްކުރެވިފައި ނެތުމުން ކަމަށެވެ.
އާބާދީގައި ގާތްގަނޑަކަށް 2،900 އެއްހައި މީހުން ދިރިއުޅޭ އެ އަތޮޅުގައި 2021 ވަނަ އަހަރު އެއްވެސް މީހަކު ވިއްސާފައި ނުވާ ކަމަށް ނޭޝަނަލް ސްޓެޓިކްސް އޮފް ބިއުރޯއިން ނެރުނު "ވައިޓަލް ސްޓެޓިކްސް 2024 ރިޕޯޓް" އިން ދައްކަ އެވެ.
ސުޖާއު ވިދާޅުވީ، އެ އަތޮޅުގައި މީހަކު ވިހާފައިނުވަނީ، ވިހޭނެ އިންތިޒާމް އަތޮޅު ހޮސްޕިޓަލުގައި ގާއިމް ކުރެވިފައި ނެތުމުން ކަމަށެވެ. އެ އަތޮޅުގެ ރައްޔިތުން ވިހަން މާލެ ދާން މަޖުބޫރުވެފައިވާކަން ފާހަގަ ކުރައްވާ އޭނާ ވިދާޅުވީ، އެއީ ރައްޔިތުންނަށް ކުރިމަތިވަމުންދާ ތަކުލީފެއް ކަމަށެވެ.
ކޮވިޑްގެ ސަބަބުން 2020 އަދި 2021 ވަނަ އަހަރު ވެސް ވ. އަތޮޅުގެ މީހުން ވިހަން ދިޔައީ ލ، މ އަދި ފ އަތޮޅަށްކަން ވެސް ސުޖާއު ވިދާޅުވި އެވެ. އޭނާ ވިދާޅުވީ، އަތޮޅު ހޮސްޕިޓަލުން އަސާސީ ސިއްހީ ހިދުމަތް ފޯރުކޮށްދިނުމަށް މަސައްކަތް ކުރަމުންދާ ކަމަށެވެ. އެގޮތުން މިދިޔަ ސަރުކާރާއެކު ވެސް މަސައްކަތް ކުރެވުނު ކަމަށާއި، އެ ސަރުކާރު ނިމިގެން ދިޔައިރުވެސް އަމަލީ ގޮތުން އެއްވެސް ކުރިއެރުމެއް ހޮސްޕިޓަލަށް ލިބިފައިނުވާކަމަށް ވިދާޅުވި އެވެ.
"މިފެންނަނީ މިކަމާއި ގުޅޭ އަމަލީ މަސައްކަތްތަކެއް އަދި ނުކުރެވޭތަން. މަޝްވަރާ ކުރެވޭ، ވާހަކަދެކެވޭ، ނުވާނެއެކޭ ނުކުރެވޭނެއެކޭ ނުބުނޭ. އަބަދުވެސް ކުރެވޭނެ ވާހަކަ މި ދައްކަނީ،" ސުޖާއު ވިދާޅުވި އެވެ.
އެ އަތޮޅު ހޮސްޕިޓަލުން އެކަށީގެންވާ ހިދުމަތެއް ނުލިބޭއިރު، އަތޮޅުގައި ސީއެމްބިއުލާންސްގެ ހިދުމަތް ވެސް ނުލިބޭތީ ސުޖާއު ކަންބޮޑުވުން ފާޅު ކުރެއްވި އެވެ. އޭނާ ވިދާޅުވީ، ސީއެމްބިއުލާންސް ހަލާކުވެގެން މަރާމާތު ކުރަން ގެންދިޔަ ފަހުން އަހަރެއް ވެއްޖެ ކަމަށާއި، އަދިވެސް ސީއެމްބިއުލާންސް ރިޕްލޭސް ކޮށްދީފައިނުވާ ކަމަށެވެ.
ސީއެމްބިއުލާންސްގެ ހިދުމަތް އެ އަތޮޅުން ނުލިބޭތީ، ކުއްލި ހާލަތެއްގައި ފަރުވާއަށް ބަލި މީހަކު ފުރުވާލަން ބެލިޔަސް ޖެހެނީ ޕްރައިވެޓް ހަޔާއަށް ދަތުރު ނަގާށެވެ. އެހެން އެކަން ކުރުމުން، އާސަންދައިން އެފަރާތްތަކަށް ފައިސާ ނުދައްކާތީ، ދަތުރު ކޮށްދޭނެ ފަރާތެއް ވެސް ނުވާ ކަމަށް ސުޖާއު ވިދާޅުވި އެވެ.
"ބަލިމީހާ އެމަޖެންސީގައި މާލެ ފޮނުވަން ޖެހުނިއްޔާ މި ޖެހެނީ ދިމަ ދިމާލަށް ގުޅައިގެން، މީހުންނަށް އާދޭސް ކޮށްގެން ކުއްޔަށް ޕްރައިވެޓް ލޯންޗް ހަޔާ ކުރަން. ޕްރައިވެޓް ލޯންޗްތައް ހަޔާކުރާއިރު ދަތުރުކޮށްދޭ ފަރާތުން ކުރާ އެންމެ ބޮޑު ޝަކުވާއަކީ އާސަންދައިން އެބޭފުޅުންނަށް ފައިސާ ނުލިބުން. އެހެންވެ ދަތުރު ކުރަން އެބަ ރެފިއުޒް ކުރޭ،" ސުޖާއު ވިދާޅުވި އެވެ.
ލޯކަލް ޓޫރިޒަމް ކުރިއަރާފައިވާ އެ އަތޮޅުގައި އެކި ކަންކަމު އައިސް ދިރިއުޅެމުންދާ މީހުން އެއްކޮށްލީމަ އާބާދީ ހަތަރު ހާހަށް އަރައެވެ. އަދި ހަފްތާ ބަންދަށާއި، އެކި ކަންކަމު އެރަށަށް ޒިޔާރާތްކުރާ މީހުންގެ އަދަދު އަހަރަކަށް ބަލާނަމަ 35،000 އަށް އަރަ އެވެ.
ފަތުރުވެރިކަމުގެ ހައި ސީޒަންގައި އެ އަތޮޅުން އެންމެ އާބާދީ މަދު ތިނަދޫގައި ވެސް އެވްރެޖްކޮށް ކޮންމެ ދުވަހަކު 700 ފަތުރުވެރިން އުޅެމުންދާ ކަމަށް ސުޖާއު ވިދާޅުވިއެވެ. އެކަމަކު ފަތުރުވެރިއަކަށް ކަމެއް ދިމާވެ ސިއްހީ ހިދުމަތް ހޯދަން ބެލިޔަސް އެ ފުރުސަތު އެ ރަށުން ލިބެން ނެތްކަން ސުޖާއު ފާހަގަ ކުރެއްވި އެވެ.
