ކެބިނެޓަށް އެއްވެސް ބަދަލެއް ގެންނަން ނިންމާފައި ނުވޭ: ހީނާ
ރައީސް ޑރ މުހައްމަދު މުއިއްޒުގެ ކެބިނެޓަށް އެއްވެސް ބަދަލެއް ގެންނަން ނިންމާފައި ނުވާ ކަމަށް ރައީސް އޮފީހުގެ ޗީފް ސްޕޯކްސްޕާސަން ހީނާ ވަލީދު ވިދާޅުވެއްޖެ އެވެ.
ހީނާ އެކްސްގައި މިރޭ އެފަދައިން ވިދާޅުވި އިރު ކެބިނެޓަށް ބަދަލު ގެންނަން އުޅޭ ކަމުގެ އަޑުތަކެއް ދަނީ ފަތުރަމުން ނެވެ.
އެގޮތުން މިހާރުގެ ޓޫރިޒަމް މިނިސްޓަރު ފައިސަލް އިބްރާާހިމް ޔޫތު މިނިސްޓަރުގެ މަގާާމަށް ބަދަލުކޮށް މިހާރުގެ ފިނޭންސް މިނިސްޓަރު މޫސާ ޒަމީރު ޓޫރިޒަމް މިނިސްޓަރުގެ މަގާމަށް އަދި ފިނޭންސް މިނިސްޓަރުގެ އެޑްވައިޒަރުގެ މަގާމުގައި ހުންނެވި އަހުމަދު ނަސީރު ފޮރިން މިނިސްޓަރުގެ މަގާމަށް ހަމަޖައްސަން އުޅޭކަމަށް ސޯޝަލް މީޑިއާގައި ވަނީ އަޑުފެތުރިފަ އެވެ.
އެހެން ނަމަވެސް ހީނާގެ ޓުވީޓުގައި އެކަން ވަނީ ދޮގުކުރައްވައިފަ އެވެ.
ކެބިނެޓް ބަދަލުކުރަން އުޅޭކަމަށް އަޑު ފެތުރުނުއިރު އެގްރިކަލްޗާ މިނިސްޓަރު ޑރ. އައިޝަތު ރަމީލާ މަގާމުން އިސްތިއުފާ ދެއްވިކަން ރައީސް އޮފީހުން މިއަދު ވަނީ ހާމަކޮށްފަ އެވެ.
ރަމީލާ އިސްތިއުފާ ދެއްވީ ބަލި ހާލަތު ހުރިގޮތުން މަސްއޫލިއްޔަތު އަދާކުރެވޭނެ ހާލަތެއް ނެތުމުން ކަމަށް ވެސް ބުނެފައިވެ އެވެ.
ރަމީލާ އިސްތިއުފާ ރައީސް މުއިއްޒު ގަބޫލުފުޅުކުރައްވައިފައިވާ އިރު އެ މަގާމަށް ދެން ހަމަޖައްސަވަނީ ކޮން ބޭފުޅެއް ކަމެއް ސާފެއް ނުވެއެވެ.
ކެބިނެޓަށް އެންމެ ފަހުން ބަދަލު ގެނައީ މިދިޔަ ސެޕްޓެމްބަރު މަހު ފިނޭންސް މިނިސްޓަރުގެ މަގާމުގައި ހުންނެވި ޑރ. މުހައްމަދު ޝަފީގު ވެސް އިސްތިއުފާ ދެއްވުމާ ގުޅިގެން ނެވެ.
ޝަފީގު އިސްތިއުފާ ދެއްވުމުން ރައީސް ޑރ. މުހައްމަދު މުއިއްޒު ވަނީ ކެބިނެޓަށް ބަދަލު ގެންނަވައި އޭރު ފޮރިން މިނިސްޓަރަކަށް ހުންނެވި މޫސާ ޒަމީރު ފިނޭންސް މިނިސްޓްރީއަށް ބަދަލުކޮށް، ހެލްތު މިނިސްޓަރު ޑރ. އަބްދުﷲ ހަލީލު ފޮރިން މިނިސްޓަރުގެ މަގާމަށް ބަދަލުކުރައްވައިފަ އެވެ.
ރައިސް އޮފީހުގެ ޕަބްލިކް ޕޮލިސީ ސެކްރެޓަރީ މަގާމުގައި ހުންނެވި އަބްދުالله ނާޒިމް ހެލްތު މިނިސްޓަރުގެ މަގާމަށް ވެސް ހަމަޖެއްސެވި އެވެ.
