އެންސްޕާއިން ހިފި އިމާރާތެއްގައި އެމްއެމްޓީވީ ހިންގާ ކަމަށް ބުނެ ހުށަހެޅި މައްސަލަ ބަލައެއް ނުގަތް
ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ކުއްޔަށް ހިފި އިމާރާތެއްގައި, ދާދިފަހުން ފެށި މޯލްޑިވްސް މީޑިއާ ޓީވީ (އެމްއެމްޓީވީ), ހިންގާ ކަމަށް ބުނެ ރައްޔިތުންގެ މަޖިލީހަށް ހުށަހެޅި މައްސަލަ ބަލައި ނުގަންނަން ނިންމައިފި އެވެ.
އެ ކުއްލި މައްސަލަ ހުށަހެޅުއްވީ ގަލޮޅު ދެކުނު ދާއިރާގެ އެމްޑީޕީގެ މެންބަރު މީކާއީލް އަހްމަދު ނަސީމެވެ.
އެ މައްސަލައާ ގުޅިގެން ރައްޔިތުންގެ މަޖިލީހުގެ މިއަދުގެ ޖަލްސާ ފައްޓަވަމުން މަޖިލީހުގެ ރައީސް އަބްދުއްރަހީމް އަބްދުالله ވިދާޅުވީ ރައްޔިތުންގެ މަޖިލީހުގެ 197 ވަނަ މާއްދާގެ (ކ) ގައި ކުއްލި މައްސަލައެއްގައި ހުންނަންވާނެ ކަމަށް ބަޔާންކުރާ ޝަރުތު ފުރިހަމަ ނުވާތީ އެ މައްސަލަ ބަލައިގަނެވެން ނެތް ކަމަށެވެ.
ރައްޔިތުންގެ މަޖިލީހުގެ 197 ވަނަ މާއްދާގެ (ކ) ގައި ބުނެފައިވަނީ ކުއްލި މައްސަލައަކީ ހަގީގަތެއްގެ މައްޗަށް ބިނާކޮށް ހުށަހެޅޭ ކަމަކަށް ވާން ޖެހޭނެ ކަމަށެވެ.
މީކާއީލް ހުށަހެޅުއްވި ކުއްލި މައްސަލާގައި ބުނެފައިވަނީ އެންސްޕާގެ އޮފީސް ހިންގުމަށްޓަކައި އިމާރާތެއް ކުއްޔަށް ނެގުމަށް ޖޫން 25 ގައި ޓެންޑާ ބޯޑް މެދުވެރިކޮށް ކުރި އިއުލާނާ ގުޅިގެން ބިޑު ހުށަހެޅި ފަރާތްތަކުގެ ތެރޭގައި ހިމެނޭ މޯލްޑިވްސް މީޑިއާ ހައުސް ޕްރައިވެޓް ލިމިޓެޑް ކިޔާ ކުންފުންޏަށް ބިޑު އެވޯޑުކޮށްފައިވާ ކަމަށެވެ.
އެ ބިޑުގެ ދަށުން 4 ފްލޯގެ 5 އަހަރު ދުވަހުގެ ކުލި ކަމަށްވާ 34.8 މިލިއަން ރުފިޔާ އެއް ފަހަރާ ދައްކާފައިވަނިކޮށް އޭގެ ތެރެއިން 2 ފްލޯ, "އެމްއެމްޓީވީ" ހިންގަން އިތުރު ކުއްޔަކާ ނުލާ ދީފައިވާ ކަމަށް ސޯޝަލް މީޑިއާގެ އެކި ފްލެޓް ފޯމްތަކުގައި ތުހުމަތު ކުރެވެމުންދާ ކަމަށް އެ މައްސަލާގައި ބުނެފައިވެ އެވެ.
އޭގެ އިތުރުން ދައުލަތުގެ އެކި އެކި އިދާރާތަކުގައި މަސައްކަތް ކުރަމުންދާ މުވައްޒަފުން އެތަނުގައި މަސައްކަތް ކުރަމުންދާއިރު، އެތަނުގެ ހުރިހާ މުވައްޒަފުންނަށް އުޖޫރަ ދެމުންދަނީ ދައުލަތުގެ ބަޖެޓުން ކަމަށާއި އެތަނަށް ސާމާނު ގެނައީ އިމްޕޯޓް ޑިއުޓީ މައާފުކޮށްގެން ޑިއުޓީއަށް އެއްވެސް ފައިސާއެއް ނުދައްކާ ކަމަށް އެ މައްސަލާގައި ތުހުމަތުކޮށްފައިވެ އެވެ.
އެ ތުހުމަތުތަކުގައި ހަގީގަތެއް އެކުލެވޭނަމަ އެއީ ދައުލަތުގެ ޕްރޮކިއޯމަންޓް ނިޒާމު ނަހަމަ ގޮތުގައި ބޭނުންކޮށްގެން ހިންގާފައިވާ ބޮޑު ހިޔާނާތެއް ކަމަށާއި އެ ތަނުގެ މުވައްޒަފުންނަށް އުޖޫރު ދިނުމުގައި ދައުލަތުގެ މާލިއްޔަތުން ހޭދަކުރަމުންދާ ނަމަ އެއީ ދައުލަތުގެ މާލިއްޔާއިން ހިންގޭ ބޮޑު ވައްކަމަކާއި ކޮރަޕްޝަންގެ އަމަލެއް ކަމަށް އެ ކުއްލި މައްސަލާގައި ބުނެފައިވެ އެވެ.
އެ މައްސަލަ ހުށަހަޅާފައިވަނީ ރައްޔިތުންގެ ނުވަތަ ގައުމުގެ މަސްލަހަތަށް ސީދާ އަސަރުކުރާ ފަދަ ބޮޑު ކަމެއް ކަމަށް ވާތީ, އެކަން ސަރުކާރުގެ ސަމާލު ކަމަށް ގެނައުމުގެ ގޮތުން ކަމަށް ވެސް ބުނެފައިވެ އެވެ.
އެ ތުހުމަތުތައް ކުރެވެމުންދާތީ އެ މައްސަލަ ތަހުގީގުކުރަން އޭސީސީން ވަނީ ފަށާފަ އެވެ.
Ads by STO
