ހުޅުމާލެ ބީޗް ސައިޑާއި ބީޗް ފްރަންޓުން އިތުރު 10 ބިން ވިއްކުމަށް ހުޅުވާލައިފި
ހުޅުމާލޭގެ ދެ ވަނަ ފިޔަވަހިން ދިރިއުޅުމަށް ދޫކުރާ ބިމުގެ ތެރެއިން ހަމައެކަނި ދިވެހިންނަށް ގަނެވޭ ގޮތަށް އިތުރު 10 ބިމެއް ބީލަމުގެ އުސޫލުން ވިއްކުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހުޅުވާލައިފި އެވެ.
ހުޅުމާލެއިން ބީލަމުގެ އުސޫލުން ބިން ވިއްކުމަށް ފުރަތަމަ އިއުލާނުކުރީ މިދިޔަ މެއި މަހުގެ 9 ވަނަ ދުވަހު އެވެ. އެފަހުން އެ އިއުލާނު 7 ފަހަރެއްގެ މަތިން އިސްލާހުކޮށްފައިވެ އެވެ. އަދި މިހާތަނަށް އައިއިރު 53 ބިމެއް ވިއްކަން ހުޅުވާލި އެވެ.
އެޗްޑީސީން ބުރާސްފަތި ދުވަހު ކުރި އިއުލާނުގައި ބުނީ އަލަށް 10 ބިމެއް ވިއްކަން ހުޅުވާލާފައިވާ ކަމަށެވެ. އިއުލާނުގައިވާ ގޮތުން ބީޗްފްރަންޓުން 3 ބިމެއް ދޫކުރާނެ އެވެ. އެއީ 1،638 އާއި 1،559 އަދި 3،250 އަކަފޫޓުގެ ބިންތަކެކެވެ.
ބީޗްސައިޑުން 7 ބިމެއް ދޫކުރާއިރު، އޭގެ ތެރެއިން 5 ބިމަކީ 1،534 އަކަފޫޓުގެ ބިންތަކެކެވެ. އިތުރަށް ދެނީ 1،513 އަދި 1،230 އަކަފޫޓުގެ ދެ ބިމެވެ.
ހަމައެކަނި ދިވެހިންނަށް ބައިވެރިވެވޭ ގޮތަށް ހުޅުވާލާފައިވާ ބިންތަކަށް އުމުރުން 18 އަަހަރުވެފައިވާ ކޮންމެ މީހަކަށް ކުރިމަތިލެވޭނެ އެވެ. ބީލަން ހުށަހަޅަނީ ކުންފުންޏަކުން ނަމަ، އެ ކުންފުންޏަކީ ރާއްޖޭގައި ރަޖިސްޓްރީކޮށްފައިވާ ސައްތަ އިންސައްތަ ދިވެހިންގެ ހިއްސާ އޮންނަ ކުންފުންޏެއް ކަމުގައި ވާން ވާނެ ކަމަށް އެޗްޑީސީން ބުނެފައިވެ އެވެ.
އެޗްޑީސީން ބުނެފައިވާ ގޮތުގައި ބިން ވިއްކުން ކުރިއަށް ގެންދަނީ 2 މަރުހަލާއަކަށް ބަހާލައިގެންނެވެ. ފުރަތަމަ މަރުހަލާއަކީ އެކްސްޕްރެޝަން އޮފް އިންޓަރެސްޓް (އީއޯއައި) ހުށަހެޅުމެވެ. ދެ ވަނަ މަރުހަލާއަކީ ގަންނަން ކަނޑައަޅާފައިވާ ބިމަށް އެއް ފަރާތަށް ވުރެ ގިނަ ފަރާތުން އީއޯއައި ހުށަހަޅާފައި ވާނަމަ، ބިޑު ކުރުމެވެ.
ދިރިއުޅުމުގެ ބޭނުމަށް ދޫކުރުމަށް ކަނޑައެޅިފައިވާ އެ ބިންތަކުގެ ތެރެއިން ބީޗް ފްރަންޓުން ދޫކުރާ ބިމުގެ ބީލަން ފެށޭ އަގަކީ އަކަފޫޓަކަށް 4،500 ރުފިޔާ އެވެ. ބީޗް ސައިޑުން ދޫކުރާ ބިމުގެ ބީލަން ފެށޭނީ 4،000 ރުފިޔާއަށެވެ. ކޮންމެ ފަރާތަކަށް ވެސް އެއް ބިމަށް ވުރެ ގިނަ ބިން ގަތުމަށް އެދި އީއޯއައި ހުށަހެޅިދާނެ ކަމަށް އެޗްޑީސީން ބުނެ އެވެ.
އެޗްޑީސީން ބުނި ގޮތުގައި އިސްލާހާ ގުޅޭ މައުލޫމާތު އެ ކޯޕަރޭޝަނުގެ ބިޑު ޕޯޓަލްގައި ޝާއިއުކޮށްފައިވާ މައުލޫމާތު ކަރުދާހުގައި ހިމަނާފައިވާނެ ކަމުގަ އެވެ. އިތުރު މައުލޫމާތު ސާފުކުރަން ބޭނުންވާ ނަމަ ކޯޕަރޭޝަނުގެ ހޮޓްލައިން 1516 އަށް ގުޅުމަށް އެޗްޑީސީން ވަނީ އެދިފަ އެވެ.
