އެޗްޑީސީއަށް ލިބެން ޖެހޭ 1.4 ބިލިއަނުގެ ތެރެއިން ހޯދުނީ 226 މިލިއަން
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އަށް ލިބެން ޖެހޭ 1.4 ބިލިއަން ރުފިޔާގެ ތެރެއިން މިހާތަނަށް ހޯދިފައި ވަނީ 226 މިލިއަން ރުފިޔާ ކަމަށް އެ ކޯޕަރޭޝަނުގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވިދާޅުވެއްޖެ އެވެ.
އެޗްޑީސީން ދޫކޮށްފައިވާ ބިންތަކަށް ކުލި ނުލިބޭ މައްސަލައިގައި މައުލޫމާތު ސާފުކުރުމަށް ރައްޔިތުންގެ މަޖިލިހުގެ މާލިއްޔަތު ކޮމިޓީއަށް އެ ކޯޕަރޭޝަނުގެ ވެރން މިއަދު ހާޒިރުކޮށްފައިވެ އެވެ.
އެ ކޮމިޓީގައި ވާހަކަ ދައްކަވަމުން ފަޒުލް ވިދާޅުވީ މަޖިލިހުން މީގެ ކުރިން ފޮނުވި ސިޓީއަކާ ގުޅިގެން މައުލޫމާތު ފޯރުކޮށްދީފައިވާނެ ކަމަށެވެ. އެއީ ކޮމާޝަލް ޑިވެލޮޕްމަންޓުގެ ޓާމިނޭޝަން އާއި އެކްސްޓެންޝަން ދީފައިވާ ފަރާތްތަކުން 1.4 ބިލިއަން ރުފިޔާ އެ ކޯޕަރޭޝަންއަށް ނުލިބިވާކަން ފާހަގަކޮށްފައި ކަމަށެވެ.
އެޗްޑީސީ އާ ހަވާލުވުމަށް ފަހު އެފަދަ މައްސަލަތަކަށް ހައްލު ހޯދުމަށް އޭނާގެ ބެލުމުގެ ދަށުން ރިކަވަރީ ކޮމިޓީއެއް އެކުލަވާލާފައިވާ ކަމަށާއި އެ ކޮމިޓީއަކީ އިސް މުވައްޒަފުންނާއި "މިޑްލް މެނޭޖްމަންޓް" ހިމެނޭ ގޮތަށް އެކުލަވާލެވުނު ކޮމިޓީއެއް ކަމަށް ފަޒުން ވިދާޅުވި އެވެ.
"އިނީޝިއަލީ ފަށައިގަތްއިރު ގައި، ގާތްގަނޑަކަށް 1.4 ބިލިއަން އޮތްއިރު ގައި މިއަދު ރިކަވަރީ ކޮމިޓީގެ މަސައްކަތުން 226 މިލިއަން އަޅުގަނޑުމެން ރިކަވަކޮށްފިން މިއަދު،" ފަޒުލް ވިދާޅުވި އެވެ.
އެޗްޑީސީގެ މެނޭޖިން ޑިރެކްޓަރު ވިދާޅުވި ގޮތުގައި ކޮމާޝަލް ތަންތަން ކުއްޔަށް ހިފައިގެން ތިބި ފަރާތްތަކަށް ޑިމާންޑް ލެޓާ އަދި ނޯޓިސް ފޮނުވުމުގެ އިތުރުން ޓާމިނޭޝަން ނޯޓިސް އެ ކޯޕަރޭޝަނުން ފޮނުވަމުން އަންނަ ކަމުގަ އެވެ. އެ ނޯޓިސްތަކަށް އިޖާބަ ނުދޭ ފަރާތްތަކުގެ މައްސަލަ ކޯޓަށް ހުށަހަޅަމުންދާކަން ވެސް ފާހަގަކުރެއްވި އެވެ.
އެ ހިސާބަށް ދިއުމުގެ ކުރިން ކޮމާޝަލް ތަނެއް ކުއްޔަށް ހިފާފައިވާ ފަރާތަކުން ފައިސާ ދައްކަން ބޭނުންވާ ނަމަ އެއްބަސްވެވޭ މުއްދަތެއްގެ ތެރޭގައި އިންސްޓޯލްމަންޓަށް ބަހާލައިގެން ފައިސާ ދެއްކުމުގެ ފުރުސަތު ދެމުން އަންނަ ކަމަށެވެ. އެ ފުރުސަތު ދެނީ ގެއްލުން ލިބޭ ބައެއް ކަންތައް ހިމެނޭތީ އާއި ކޯޓު މަރުހަލާ އެއްކައިރި ކުރުމުގެ ގޮތުން ކަމަށް ފަޒުލް ވިދާޅުވި އެވެ.
އެޗްޑީސީއަށް ނުލިބިވާ 1.4 ބިލިއަން ރުފިޔާގެ ތެރޭގައި ލީސްގެ ގޮތުގައި މީގެކުރިން ރިކަވާ ނުކުރެވި ހުރި 699 މިލިއަން ރުފިޔާ ހިމެނޭ ކަމަށެވެ. އަދި ޑިވެލޮޕްމަންޓް އެންޑް ސޭލްސްގެ ތެރެއިން 720 މިލިއަން ރުފިޔާ ވެސް ހިމެނޭކަން ފަޒުލް ފާހަގަކުރެއްވި އެވެ.
ބިންތަކުން ނުލިބިވާ ފައިސާގެ ތެރޭގައި:
- އަމިއްލަ ކުންފުނިތަކުން - 985 މިލިއަން ރުފިޔާ
- ސަރުކާރު ހިއްސާވާ ކުންފުނިތަކުން - 185 މިލިއަން ރުފިޔާ
- ސަރުކާރުން - 53 މިލިއަން ރުފިޔާ
މިދިޔަ ހަފުތާގައި ބޭއްވި މާލިއްޔަތު ކޮމިޓީގެ ބައްދަލުވުމެއްގައި ވެސް އެޗްޑީސީއަށް ލިބެން ޖެހޭ ފައިސާ ނުލިބިވާ މައްސަލަ ކުރިއަށް ގެންގޮސްފައިވެ އެވެ. އެ ބައްދަލުވުމުގައި މެމްބަރުން ވަނީ އެ ކުންފުންޏަށް ލިބެން ޖެހޭ ފައިސާ ނުލިބިވާތީ އެކަމުގެ ކަންބޮޑުވުން ފާޅުކޮށްފަ އެވެ.
