ފައިސާ ހޯދަން މަންމައަށް އަނިޔާކުރި މީހާގެ ބަންދު އިތުރުކޮށްފި
ފައިސާ ހޯދަން މަންމައަށް އަނިޔާކުރި މައްސަލާގައި ހައްޔަރުކުރި މީހާގެ ބަންދުގެ މުއްދަތު އިތުރުކޮށްފި އެވެ.
އެ މައްސަލާގައި ހައްޔަރުކޮށްފައިވަނީ މާލެއަށް ނިސްބަތްވާ އުމުރުން 40 އަހަރުގެ ފިރިހެނެކެވެ.
އެ މީހާ ހައްޔަރުކޮށް, ބަންދާމެދު ގޮތެއް ނިންމުމަށް މިދިޔަ މަހުގެ 27 ވަނަ ދުވަހު ކްރިމިނަލް ކޯޓަށް ހާޒިރު ކުރުމުން 7 ދުވަހަށް ބަންދުކުރަން އަމުރުކޮށްފައިވެ އެވެ. އެ މުއްދަތު ހަމަވެގެން އިއްޔެ ކޯޓަށް ހާޒިރު ކުރުމުން އިތުރު 8 ދުވަހަށް ބަންދު ކުރަން އަމުރުކުރި އެވެ.
ކޯޓު އަމުރުގައި ބުނީ ކުށްކުރި ކަމަށް ތުހުމަތު ކުރެވޭ މިންވަރަށް ހެކި ހުށަހަޅާފައިވާ ކަމަށެވެ. އެގޮތުން ސީނަށް ދިޔަ ފުލުހުންގެ ބަޔާން ފާހަގަކޮށްފައިވެ އެވެ.
އަމުރުގައި ބުނެފައިވަނީ ފެމިލީ ކޯޓުން ނެރެފައިވާ ގެވެށި އަނިޔާއިން ރައްކާތެރި ކުރުމުގެ އަމުރަކާ ހިލާފަށް އެ މީހާގެ މަންމަގެ އަތުން ގަދަކަމުން ފައިސާ ހޯދަން އުޅެ, ބިރުދައްކައި, ގައިގައި ޖަހައި މާރާމާރީ ހިންގާފައިވާ ކަމަށް ތުހުމަތު ކުރެވޭ ކަމަށެވެ.
އިތުރަށް ބުނީ މަންމައަށް އަނިޔާކުރުން, ޖެހުން ނުވަތަ މާރާމާރީ ހިންގުން ފަދަ މައްސަލަތަކުގެ ރެކޯޑު އެ މީހާގެ އޮންނަ ކަމަށެވެ.
އެ މީހާ ބަންދުކުރަން ޖެހޭ ސަބަބެއް ކަމަށް އަމުރުގައި ބުނެފައިވަނީ މުޖުތަމައުގެ ސަލާމަތާއި ރައްކާތެރި ކަމަށް ޓަކައި ކަމަށެވެ.
މީގެކުރިން ވެސް މިފަދަ މައްސަލަތަކުގައި މީހުން ހައްޔަރުކޮށް, ދައުވާކޮށް ހުކުމް ކޮށްފައިވެ އެވެ.
