ދުވާރުތައް ހަލާކުވާ މައްސަލަ ބަލަނީ
އިމާރާތްކުރާ ފަރާތްތަކާއި އެކި ބޭނުންތަކަށް މާލޭގެ މަގުތައް ކޮންނަ ފަރާތްތަކުން މިހާރު އަމަލުކުރަމުންދާ ގޮތުން، މާލެ ސިޓީގެ މަގުތަކާއި ދުވާރުތައް ހަލާކުވަމުންދާތީ އެކަން ބަލަން ނިންމައިފި އެވެ.
އިއްޔެ ބޭއްވި މާލޭ ސިޓީ ކައުންސިލްގެ އާންމު ޖަލްސާގައި މޭޔަރު އާދަމް އާޒިމް ވިދާޅުވީ މާލެ ސިޓީގައި ދިރިއުޅޭ އާންމު ރައްޔިތުންގެ ފަރާތުން އެންމެ ގިނައިން ލިބޭ އެއް ޝަކުވާއަކީ، ކޮންސްޓްރަކްޝަން މަސައްކަތްކުރައްވާ ކުންފުނިތަކާއި އެކި ބޭނުންތަކަށް މާލޭގެ މަގުތައް ކޮންނަ ފަރާތްތަކުން މަސައްކަތް ކުރަމުންދާއިރު، މަސައްކަތް ކުރުމުގެ ތެރޭގައި ހަލާކުވެގެންދާ މަގާއި ދުވާރުގެ ބައި މަރާމާތު ނުކުރާކަމުގެ ޝަކުވާ ކަމަށެވެ.
އަދި މަގުތައް ކޮންނަ ފަރާތްތަކުން، މަގުން ކޮންނަ ތަނުގައި ރީއްޗަށް ގާ އަތުރާފައި ނުހުންނަ ކަމުގެ ޝަކުވާ ވެސް ލިބޭކަން މޭޔަރު ފާހަގަ ކުރެއްވި އެވެ.
އާޒިމް ވިދާޅުވީ ހަމަޖެހިފައިވާ ގޮތަށް، ރަނގަޅަށް ކަންތައް ކުރެވޭ ނަމަ، މަގުތަކާއި ދުވާރުން ހަލާކުވާ ތަންތަން މަރާމާތުނުކޮށް، މަސައްކަތްކުރައްވާ ކުންފުނިތަކަށް ދޭން ޖެހޭ ހުއްދަތައް ނުދެވޭނެ ކަމަށެވެ.
އެހެން ނަަމަވެސް ސިޓީ ކައުންސިލުން އެކަން ބަލަންވާ ވަރަށް ނުބެލޭތީ، މަގުތަކާއި ދުވާރުތަކުން ހަލާކުވާ ބައި މަރާމާތު ނުކޮށް އަދި ގާ އެތުރުމުގެ މަސައްކަތްތައް ކުންފުނިތަކުން ރަނގަޅަށް ނުކުރާ ކަމަށް މޭޔަރު ވިދާޅުވި އެވެ.
އެހެން ކަމުން މި މަހުން ފެށިގެން، ސީދާ އެ މަނިކުފާނު ވަޑައިގެން ކޮންސްޓްރަކްޝަން މަސައްކަތް ހިނގާ ސައިތްތައް ބައްލަވާނެ ކަމަށް މޭޔަރު ވިދާޅުވި އެވެ.
Ads by STO
