ރީތި މިސްކިތްތަކެއް ހުރި ނަމަވެސް، އަރާނެ ބަޔަކު ނުވާ ނަމަ ބިރުގަންނަން ޖެހޭ: ހުތުބާ
ރީތި މިސްކިތްތަކެއް ބިނާކުރެވުނު ނަމަވެސް، އެ މިސްކިތްތަކުގެ ފަޅުފިލުވަން އަރާނެ ބަޔަކު ނުވާ ނަމަ އެއީ އެ ކަމަކާ މެދު ބިރުގަންނަން ޖެހޭނެ ކަމެއް ކަމުގައި މިއަދުގެ ހުކުރު ހުތުބާގައި ބުނެފި އެވެ.
ހުތުބާގައި ބުނީ އިސްލާމްދީނުގެ ތަނބު ކަމުގައިވާ ނަމާދަކީ ކޮންމެ މުކައްލަފަކު ކުރުން ވާޖިބުވެގެންވާ އަޅުކަމެއް ކަމަށެވެ. ރަށުގައި ގާއިމުވެހުރި މީހާ އާއި ދަތުރެއްގެ މަތީގައިވާ މީހާ އަދި ބަލި ތަންމަތީގައި އޮންނަ މީހާ ވެސް ކުރަން އަންގަވާފައިވާ އަޅުކަމަކަށްވާއިރު، އެކަން ނުކުރެވޭނެ ހަމައެކަނި ހާލަތަކީ ބުއްދި ފިލައިދިއުން ކަމަށެވެ.
މި މަތިވެރި އަޅުކަމަށް ވަގުތު ހުސްކުރަން ޖެހެނީ، ދުނިޔެވީ ގޮތުން ކުރަން ހުރި، ހުރިހާ ކަމެއް ނިމުމުން، ކުރާ ކަމެއްގެ ގޮތުގައި ދެކިގެން ނުވާނެ ކަމަށެވެ. އަމަލުތަކުގެ ތެރެއިން ގިޔާމަތް ދުވަހު އެންމެ ފުރަތަމަ ސުވާލު ކުރެއްވޭނީ ނަމާދާ މެދުގައި ކަމަށެވެ.
ހުކުރު ހުތުބާގައި ބުނި ގޮތުގައި މިއަދު ގިނަ މީހުންނަކީ، ދުވާލުގެ ގިނަ ވަގުތުތަކުގައި އަވަދިނެތި ވަޒީފާތަކުގައި އުޅޭ ބަޔަކަށްވާއިރު، ނަމާދުތަކަށް ސަމާލުކަން ދެވެނީ ކިހާ މިންވަރަކަށްތޯ ސުވާލު ކުރަން ޖެހޭ ކަމުގަ އެވެ. ލިބޭ ހުސްވަގުތު، ކުރަން ޖެހޭ ގިނަ ކަންތައްތައް ހުންނަ ކަމަށާއި އިސްކަންދޭ ތަރުތީބަކުން ކަންތައްތައް ރާވައިނުލައިފި ނަމަ، ގިނަ ކަންތައްތައް އޮންނާނީ ނުކުރެވި ކަމުގަ އެވެ. މުސްލިމެއްގެ ހައިސިއްޔަތުން އެންމެ ބޮޑަށް އިސްކަން ދޭން ޖެހޭނީ ނަމާދަށް ކަމުގަ އެވެ.
ކީރިތި ރަސޫލާ ވަނީ ނަމާދު ކުރަން ވަރަށް ބޮޑަށް ބާރު އަޅުއްވާފަ އެވެ. އަދި ނަމާދު އަޅާ މީހާ އާ މެދު އިންޒާރުކުރައްވައި އެކަލޭގެފާނު ހަދީސްކުރެއްވި ބަސްފުޅެއްގެ މާނައިގައިވެ އެވެ. "ހަމަކަށަވަރުން، އަޅާ އާ ޝަރީކުކުރުމާއި ކާފިރުކަމާ ދެމެދުގައިވާ އިމަކީ، ނަމާދު އެޅުމެވެ."
މިއަދުގެ ހުތުބާގައި ބުނީ މަސައްކަތުގައި އަވަދިނެތި އުޅުމަކީ ނަމާދުތަކަށް ފަރުވާކުޑަކުރަން ޖެހޭ ސަބަބެއް ނޫން ކަމަށެވެ. ދިރިއުޅުމުގެ ބޭނުން ފުއްދުމަށް ކޮންމެ މަސައްކަތެއް ކުރިކަމުގައި ވިނަމަވެސް ނަމާދު ވަގުތު ޖެހުމުން އެ ނަމާދެއް ކުރުމަށް އަވަސްވާން ޖެހޭ ކަމަށެވެ. ނަމަވެސް ބައެއް ބާވަތުގެ މަސައްކަތުގެ ގޮތުން މިސްކިތުގެ ޖަމާއަތަށް ހާޒިރުވުމަށް ދަތިވާ މީހުންނަށް އޮތީ އެ ތިބި ތަނެއްގައި ތިބެ ނަމާދު ކުރުން ކަމަށެވެ. މިސްކިތު ޖަމާއަތަށް ހާޒިރު ނުވެވުމަކީ ނަމާދު އެޅުމަށް އޮތް އުޒުރެއް ނޫން ކަން ވެސް ފާހަގަކުރި އެވެ.
ފަސް ނަމާދު ވަގުތުގައި އަދާކުރުމަކީ އަމަލުތައް ސީދާވެ، ކުރާ މަސައްކަތުގައި ބަރަކާތް ލައްވާނެ ކަމެއް ކަމަށް ހުތުބާގައި ބުންޏެވެ. ދީނުގައި އަންގަވާފައިވާ ގޮތުގެ މަތިން، ނަމާދުތައް ފުރިހަމަކޮށްފި މީހާއަށް ލިބޭ ފައިދާތަކުގެ ތެރޭގައި ފާހިޝް ކަންތައްތަކާއި މުންކަރާތްތަކުން ދުރުހެލިކޮށްދިނުމާއި ވަގުތަށް ކަމޭހިތުމާއި އަމުރަށް ކިޔަމަންވުމާ އަދި މާތް الله އަށް ބިރުވެތިވެ، ހުޝޫއަތްތެރިވުން ފަދަ ކަންކަން ހިމެނޭ ކަަމަށެވެ.
ހުތުބާގައި ބުނި ގޮތުގައި ސައްތައިން ސައްތަ އިސްލާމީ ގައުމަކަށްވާއިރު، މިސްކިތްތަކުގެ އަދު ގިނަ ނަމަވެސް، މިސްކިތްތަކަށް އަރައި ނަމާދުކުރާ މީހުންގެ އަދަދު މަދު ކަމުގަ އެވެ. ރީތި މިސްކިތްތަކެއް ކިތަންމެ ބައިވަރު އަދި ކައިރިކައިރީގައި ބިނާކުރެވުނު ނަމަވެސް، އެ މިސްކިތްތަކުގެ ފަޅުފިލުވަން އަރާނެ ބަޔަކު ނުވާ ނަމަ އެއީ އަހަރެމެން އެ ކަމަކާ މެދު ބިރުގަންނަން ޖެހޭނެ ކަމެއް ކަމުގަ އެވެ.
ނުކުޅެދުންތެރިކަން ހުންނަ މީހުންނާއި އުމުރުން ދުވަސްވެފައިވާ މީހުން ނަމާދަށް ފަރުވާތެރިވާ މަންޒަރަކީ އުފާވެރިކަން ގެނުވާ މަންޒަރެއް ކަމުގަ އެވެ. ނަމަވެސް ހިތާމައަކީ ޒުވާނުންނާއި ފުރާވަރުގެ ކުދިން މިސްކިތްތަކުން ފެންނަ އަދަދު މަދުވުުން ކަމުގަ އެވެ. ނަމާދަކީ ފަރުލުކުރައްވާފައިވާ އަޅުކަމަކަށްވާއިރު، ހުކުރުގެ ޖަމާއަތަށް ސަމާލުކަންދޭ ފަދައިން ފަރުލު ފަސް ނަމާދަށް ވެސް ސަމާލުކަން ދިނުމަށް މިއަދުގެ ހުކުރު ހުތުބާގައި ވަނީ ގޮވާލާފަ އެވެ.
