ދަތިއުނދަގޫ ޙާލަތުގައި އެހެން މީހުންގެ މުދައު ފޭރި، ވަގަށްނެގުން ހުއްދަނުވޭ، އެ ޙާލަތަށް ވެސް ކެތްތެރިވޭ: ޚުޠުބާ
ރިވެތި އަޚްލާޤާއި ކެތްތެރިކަމުގެ މުހިންމުކަމުގެ މައްޗަށް މިއަދުގެ ހުކުރު ޚުތުބާގައި އަލިއަޅުވާލައި، ކެތްތެރިންނަށް ހިސާބެއް ނެތް މިންވަރަށް ދަރުމަ ދެއްވާނެކަން ހަނދާންކޮށްދީފިއެވެ.

ކެތްތެރިކަމަކީ އިންސާނާ ގިނަ ކުށްތަކުންނާއި ހަވާނަފްސުގެ އެދުންތަކުން ދުރުކޮށްދޭނެ ސިފައެއް ކަމަށް ކަމަށް މިއަދުގެ ހުކުރު ޚުޠުބާގައި ހަނދާންކޮށްދީފިއެވެ.
"އިސްލާމްދީނަކީ ރިވެތި އަޚްލާޤުގެ ދީން" މި މައުޟޫޢަށް މިއަދު އިއްވި ހުކުރު ޚުތުބާގައި ބުނީ، ކެތްތެރިވާ މީހުންނަށް ދެއްވާނެ އަޖުރަކީ ވަކި މިންވަރެއް ނެތް، ބޮޑުވެގެންވާ ދަރުމައެއްކަން އައްޒުމަރު ސޫރަތުގެ 10ވަނަ އާޔަތުގެ އަލީގައި ޚުތުބާގައި ފާހަގަކުރިއެވެ.
ރިވެތި އަޚްލާޤުގެ މަތިވެރިކަމާ ގުޅޭގޮތުން ވާހަކަދައްކަމުން ޚުތުބާގައި ބަޔާންކުރީ، މީހެއްގެ ހެޔޮކަމުގެ މީޒާނުގައި ރިވެތި އަޚްލާޤަށްވުރެ ބަރު އެހެން ކަމެއް ނުވާނެ ކަމަށް ނަބިއްޔާގެ ހަދީޘްފުޅެއްގައިވާ ކަމަށެވެ. ހަމައެހެންމެ، ރިވެތި އަޚްލާޤުގެ ސަބަބުން، ރޭއަޅުކަންކޮށް ސުންނަތް ރޯދަ ހިފާ މީހެއްގެ ދަރަޖައަށް ވާސިލުވެވޭނެކަން އުންމުލް މުއުމިނީން ޢާއިޝާ ރަޟިޔަﷲ ޢަންހާގެ އަރިހުން ރިވާވެފައިވާ ހަދީޘެއްގެ އަލީގައި ބަޔާންކުރިއެވެ.
ދުނިޔެމަތީގައި ދިމާވާ ދަތިތަކަކީ އިމްތިޙާނެއްކަން ފާހަގަކޮށް ޚުތުބާގައި އަލިއަޅުވާލީ، ދިމާވާ ކޮންމެ ކަމަކީ އެހެން އިންސާނެއްގެ ފަރާތުން އަންނަ ބަދުނަސީބެއް ކަމަށް ދެކި، މީހުންނާ މެދު ހިތް ނުބައިކުރުމަކީ ރަނގަޅު ގޮތެއް ނޫން ކަމަށެވެ. އެކި ގޮތްގޮތުން މުއުމިނުން އިމްތިޙާނު ކުރައްވާނެކަން އަންގަވާފައިވާއިރު، އެފަދަ ޙާލަތްތަކުގައި ކެތްތެރިވުމަށް ވަނީ ނަސޭހަތްތެރިވެފައެވެ.
މީހުންނާ މުޢާމަލާތު ކުރުމުގައި ވެސް ރިވެތި ގޮތް އިޚްތިޔާރު ކުރުމުގެ މުހިންމުކަން ޚުތުބާގައި ބަޔާންކުރިއެވެ. މިސާލެއްގެ ގޮތުން ފިރުޢައުނުގެ ގާތަށް މޫސާގެފާނާއި ހާރޫނުގެފާނު ފޮނުއްވިއިރު ވެސް، ރިވެތި ބަހުން ވާހަކަދެއްކެވުމަށް އަމުރުކުރެއްވިކަން ފާހަގަކުރިއެވެ. މީގެ އިތުރުން، އިސްލާމީ ތާރީޚުގައި މުސްލިމުން ޢިލްމާއި ފަންނުގައި ކުރިއަރައިދިޔައީ ރިވެތި އަޚްލާޤުގެ ސަބަބުން ކަމަށް ވެސް ޚުތުބާގައި ބުންޏެވެ.
ޤައުމެއް ތަހުޒީބީ ގޮތުން ކުރިއަރާފައިވާކަމުގެ އެންމެ ބޮޑު ނިޝާނަކީ ރިވެތި އަޚްލާޤުކަން ފާހަގަކޮށް، މިއަދު ވެސް މުސްލިމުން މަސައްކަތް ކުރަން ވާނީ އެފަދަ މަތިވެރި ސިފަތަކުގެ މަތީގައި ސާބިތުވެ ތިބުމަށް ޚުތުބާގައި ވަނީ ގޮވާލާފައެވެ.



ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.