ބޭނުންކުރާ ކަރަންޓު ބިލުގެ ޖޫރިމަނާ މާފުކުރަން ދީފައިވާ މުއްދަތު ހަމަވަނީ!
އާންމު ދިރިއުޅުމަށް ބޭނުންކުރާ ހިދުމަތުގެ ކަރަންޓު ބިލުގެ ޖޫރިމަނާ މާފުކުރަން ދީފައިވާ މުއްދަތު މި މަހުގެ ނިޔަލަށް ހަމަވާނެ ކަަމަށް ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން ބުނެފި އެވެ.
ރައީސް ޑރ. މުހައްމަދު މުއިއްޒުގެ ނިންމެވުމާ އެއްގޮތަށް، އާންމު ދިރިއުޅުމަށް ބޭނުންކުރާ ހިދުމަތުގެ ކަރަންޓު ބިލުތަކަށް ޖޫރިމަނާގެ ގޮތުގައި އަރާފައިވާ ފައިސާ މާފުކޮށް، ޖޫރިމަނާ އާ ނުލާ ފައިސާ ދެއްކޭނެ އިންތިޒާމު ހަމަޖައްސާފައި ވަނީ މިދިޔަ އެޕްރީލު މަހުގެ ފުރަތަމަ ދުވަހުން ފެށިގެންނެވެ.
އެކަމަށް ޝަރުތު ހަމަވާނީ އާންމު ދިރިއުޅުމަށް ބޭނުންކުރާ ހިދުމަތުގެ ބިލުތަކުން އެކަނި ކަަމަށް ސްޓެލްކޯއިން ބުނެފައިވެ އެވެ.
ޖޫރިމަނާ މާފުކުރާނީ މިދިޔަ އަހަރުގެ ޑިސެމްބަރު މަހުގެ 31 ވަނަ ދުވަހުގެ ނިޔަލަށް ހަދާފައިވާ ކަރަންޓު ބިލުތަކުގެ ތެރެއިން ފައިސާ ނުދައްކާހުރި ބިލުތަކަށެވެ.
ސްޓެލްކޯއިން ބުނީ އެ ޖޫރިމަނާ މާފުކުރެވޭނީ މިދިޔަ އަހަރުގެ ނިޔަލަށް ހަދާފައިވާ ބިލުތަކުގެ ތެރެއިން ފައިސާ ނުދައްކާހުރި ބިލުތަކުގެ ޕްރިންސިޕަލް އަދަދު (ޖޫރިމަނާ އާ ނުލާ ބާކީ އަދަދު) ދެއްކުމުން ކަމަށެވެ.
އެ މުއްދަތުގެ ބިލުތަކަށްވާ ފައިސާގެ އަދަދު މި މަހުގެ ނިޔަލަށް، ޖޫރިމަނާ އާ ނުލައި ދެއްކޭނެ އިންތިޒާމު އެ ކުންފުނިން ވަނީ ހަމަޖައްސާފަ އެވެ. އެގޮތުން، ޖޫރިމަނާ އާ ނުލާ ބާކީ އަދަދު ދެއްކޭނެ ގޮތަށް ބިލުތަކަށް ވަގުތީ ގޮތުން އެޖަސްމެންޓެއް ހިމެނިފައިވާ ކަމަށް ސްޓެލްކޯއިން ބުންޏެވެ.
އަދި މި ބިލުތަކަށް ހިނގަމުން މިދާ މަހުގެ 31 ވަނަ ދުވަހުގެ ނިޔަލަށް ޔޫސޭޖް އަދަދު (ޕްރިންސިޕަލް އަދަދު) ދައްކާ ހަލާސްނުކުރެވޭ ނަމަ، މި ބިލުތަކުން އެޖަސްޓުކުރެވިފައިވާ ޖޫރިމަނާ އަދަދު އަލުން އަންނަ މަހުގެ އެއް ވަނަ ދުވަހުން ފެށިގެން ބިލުތަކުގައި ހިމެނިގެންދާނެ ކަމަށެވެ.
އިތުރު މައުލޫމާތު ހޯދުމަށް، އެ ކުންފުނީގެ ހޮޓްލައިން 1545 ނުވަތަ [email protected] އަށް އީ-މެއިލް ކުރުމަށް ސްޓެލްކޯއިން ވަނީ އެދިފަ އެވެ.
