ހިންމަފުށީގައި ވެމްކޯގެ ހިދުމަތް ފަށައިފި
ކ. ހިންމަފުށީގައި ވޭސްޓް މެނޭޖްމެންޓް ކޯޕަރޭޝަން (ވެމްކޯ) ގެ ހިދުމަތް ފަށައިފި އެވެ.
ރާއްޖޭގެ ހުރިހާ ރަށްތަކަށް ހިދުމަތް ފުޅާކުރުމަށް ވެމްކޯއިން ކުރަމުންދާ މަސައްކަތުގެ ތެރެއިން، ހިންމަފުށީގައި އެ ހިދުމަތް އިއްޔެ އިފުތިތާހު ކޮށްދެއްވީ، ރައީސް ޑރ. މުހައްމަދު މުއިއްޒު އެވެ.
ވެމްކޯއިން ފޯރުކޮށްދޭ ހިދުމަތުގެ ދަށުން، ގޭބިސީތަކުންނާއި ވިޔަފާރިތަކުން ކުނި ނެގުމުގެ ހިދުމަތް ފޯރުކޮށްދިނުމަށް ވަނީ ހަމަޖެހިފަ އެވެ. އަދި ލޭންޑްފިލް މެނޭޖް ކުރުމާއި، ކުނި ގަވާއިދުން ކ. ތިލަފުއްޓަށް ގެންދިއުމުގެ މަސައްކަތް ވެސް ވެމްކޯއިން ކުރިއަށް ގެންދާނެ އެވެ.
އެ ކުންފުނިން ހިދުމަތްދޭއިރު، ކުނި ނަގާނީ ރާއްޖޭގައި ކުނި މެނޭޖްކުރުމާ ބެހޭ ގަވާއިދުގައި ބަޔާންކޮށްފައިވާ ގޮތުގެ މަތިން ޕްލާސްޓިކް، ބަދިގެ ކުނި އަދި އެހެނިހެން ކުނި ވަކިކުރުމަށް ފަހު ކުނި ބެހެއްޓުމުން ކަމަށެވެ.
ކުނި މެނޭޖްކުރުމުގެ ހިދުމަތް ހިންމަފުށީގައި ފެށުމާ ގުޅިގެން، އެ ރަށުގެ ކުނި މެނޭޖްކުރުމުގެ މަސައްކަތް އިތުރަށް ހަރުދަނާވެ، ތިމާވެށި ރައްކާތެރި ކުރުމަށް އިތުރު ބާރެއް ލިބިގެންދާނެ ކަމަށް ބެލެވޭ ކަމަށް ވެމްކޯއިން ބުނެފައިވެ އެވެ. އަދި އެ ހިދުމަތުގެ ސަބަބުން ރަށުތެރޭގެ ސާފުތާހިރުކަން އިތުރުވެ، ރައްޔިތުންގެ ދިރިއުޅުމުގެ ފެންވަރު މަތިވެގެންދާނެ ކަމަށް އުންމީދުކުރާ ކަމަށެވެ.
ހިންމަފުށީގައި ވެމްކޯގެ ހިދުމަތް ފެށުން، ހިދުމަތް އިފުތިތާހު ކޮށްދެއްވީ ރައީސް / ފޮޓޯ:ވެމްކޯ
މީގެ އިތުރުން، ކުރިއަށް އޮތް ދުވަސްތަކުގައި ބަރުކުނީގެ ބާވަތްތައް އުކާލުމަށް ދޭ ހިދުމަތް ކަމަށްވާ ކެޕްސް އަދި ކެޕްސް ލައިޓްގެ ހިދުމަތް ވެސް ހިންމަފުށީގައި ތައާރަފު ކުރެވިގެންދާނެ ކަމަށް ވެމްކޯއިން ބުންޏެވެ.
ވެމްކޯއިން މިހާރު ހިދުމަތް ދެމުންދަނީ 12 ރަށެއްގަ އެވެ. އެއީ:
- މާލެ ސިޓީ (ހުޅުމާލެ, އަދި ވިލިމާލެ ހިމެނޭހެން)
- އައްޑޫ ސިޓީ
- ފުވައްމުލައް ސިޓީ
- ތިނަދޫ ސިޓީ
- ކުޅުދުއްފުށި ސިޓީ
- ލ. ގަން
- ލ. ފޮނަދޫ
- ކ. މާފުށި
- ހއ. އިހަވަންދޫ
- ހއ. ދިއްދޫ
- ހއ. ވަށަފަރު
- ކ. ހިންމަފުށި
Ads by STO
