މަސްތުވާތަކެތީގެ ދެ ބޮޑުން ހައްޔަރަށް، 28 މިލިއަން ދައުރުކުރުވި
މަސްތުވާތަކެތީގެ ވިޔަފާރިއާ ދެކޮޅަށް ފުވައްމުލައް ސިޓީގައި ހިންގި "އޮޕަރޭޝަން ވެށި ރައްކަލް" ގެ ތެރެއިން އެ ސިޓީގައި ނެޓްވޯކް ހަދައިގެން މަސްތުވާތަކެތީގެ ވިޔަފާރިކޮށް މަނީލޯންޑާ ކުރުމުގައި އިސްވެ ހަރަކާތްތެރިވާކަމުގެ ތުހުމަތުގައި ދެ މީހަކު އިއްޔެ ހައްޔަރު ކޮށްފި އެވެ.
ފުލުހުން ބުނީ، އިންޓެލިޖެންސާއި ތަހުގީގަށް ލިބިފައިވާ މައުލޫމާތުގެ އަލީގައި ހައްޔަރު ކޮށްފައިވަނީ ޏ. ފުވައްމުލައް / ދޫޑިގަން، ކަރަންކާވިލާ، އަހުމަދު ނިއުޝާދު (34 އ) އާއި ޏ. ފުވައްމުލަށް / ދޫޑިގަން، ޒަމާނީގެ، ހަސަން އާޒިމް (29 އ) ކަމަށެވެ.
އެކަން ހާމަކޮށް ފުލުހުން މިއަދު ނެރުނު ބަޔާނެއްގައި ބުނީ، ފާއިތުވި 5 އަހަރު ތެރޭގައި ނިއުޝާދުގެ ބޭންކް އެކައުންޓް މެދުވެރިކޮށް 21 މިލިއަނަށްވުރެ ގިނަ ރުފިޔާގެ މުއާމަލާތް ހިންގާފައިވާ ކަމަށެވެ. އަދި ފާއިތުވި 2 އަހަރު ތެރޭގައި އާޒިމްގެ ބޭންކް އެކައުންޓް މެދުވެރިކޮށް 7 މިލިއަނަށްވުރެ ގިނަ ރުފިޔާގެ މުއާމަލާތް ހިންގާފައިވާ ކަމަށެވެ.
އޭގެ އިތުރުން، އެ މައްސަލައާއި ގުޅިގެން 21 މީހަކާއި 2 ކުންފުންޏެއްގެ އެކައުންޓް ކޯޓު އަމުރުގެ ދަށުން ހިފަހައްޓައި، އެ ފަރާތްތަކުގެ މައްޗަށް ތުހުމަތުކުރެވޭ މަނީ ލޯންޑަރިންގެ މައްސަލަ ފުލުހުން ތަހުގީގު ކުރަމުންދާ ކަމަށް ވެސް ފުލުހުން ނެރުނު ނޫސްބަޔާނުގައި ބުނެފައިވެ އެވެ.
މި އަހަރުގެ ޖެނުއަރީ މަހުގެ 14 ވަނަ ދުވަހުން ފެށިގެން އެ ސިޓީގައި ހިންގި އޮޕަރޭޝަނުގެ ތެރެއިން 4،048 ހޮޓްސްޕޮޓް ބަލާ ފާސް ކޮށްފައިވާ ކަމަށް ފުލުހުން ބުނެ އެވެ. އަދި 1،147 މީހުން ހުއްޓުވައި، ސުވާލުކޮށް ބަލާ ފާސްކުރެވިފައިވާ ކަމަށާއި، 58 މީހުން ހައްޔަރު ކޮށްފައިވާ ކަމަށް ފުލުހުން ބުންޏެވެ.
އިތުރަށް އެ ބަޔާނުގައި ބުނީ، ހައްޔަރު ކުރި މީހުންގެ މައްޗަށް ތުހުމަތުކުރެވޭ ޖުމުލަ 75 މައްސަލައެއް ތަހުގީގުކޮށް، 65 މައްސަލައެއްގެ ތަހުގީގު ނިންމާ ޕްރޮސެކިއުޓާ ޖެނެރަލްގެ އޮފީސް (ޕީޖީ) އަށް ފޮނުވާފައިވާ ކަމަށެވެ.
ޖޮއިންޓް އޮޕަރޭޝަނުގެ ތެރެއިން މިހާތަނަށް ކުރެވުނު މަސައްކަތުންނާއި ހިންގުނު ތަހުގީގުތަކުން، ފުވައްމުލަށް ސިޓީގައި ފުޅާ ދާއިރާއެއްގައި މަސްތުވާތަކެތީގެ ވިޔަފާރިކޮށް، މަނީ ލޯންޑާ ކުރުމުގައި އިސްކޮށް ހަރަކާތްތެރިވާ ކަމަށް ތުހުމަތުކުރެވޭ ފަރާރްތައް ދެނެގަނެވިފައިވާ ކަމަށް ފުލުހުންގެ ބަޔާނުގައި ބުނެފައިވެ އެވެ. އަދި އެ ފަރާތްތަކަށް އެހީތެރިވާ ފަރާތްތައް ވެސް ދެނގަނެވިފައިވެ އެވެ.
Ads by STO
