މިނިސްޓަރު ހަލީލް އޮމާނުގެ ބޮޑުވަޒީރުގެ ނާއިބުއާ ބައްދަލުކުރައްވައިފި
ފޮރިން މިނިސްޓަރު ޑރ. އަބްދުﷲ ހަލީލް އޮމާންގެ ބޮޑުވަޒީރުގެ ނައިބު ސައްޔިދު އަސްއަދު ބިން ތޯރިގު އަލް-ސައީދުއާ ބައްދަލުކުރައްވައިފި އެވެ.
އެ ބައްދަލުވުން ކުރިއަށް ދިޔައީ މިނިސްޓަރު ހަލީލް މިހާރު އޮމާންއަށް ކުރައްވަމުން ގެންދަވާ ރަސްމީ ދަތުރުގެ ތެރެއިން އެވެ.
މިއަދު ބޭއްވި އެ ބައްދަލުވުމުގައި ހަލީލް ވަނީ ރައީސް ޑރ. މުހައްމަދު މުއިއްޒުއާއި ދިވެހި ރައްޔިތުންގެ ނަމުގައި އޮމާންގެ އިސް ވެރިންނާއި ރައްޔިތުންނަށް ތަހުނިޔާވެސް އަރިސްކުރައްވައިފަ އެވެ.
އަދި އޮމާންގެ ބޮޑުވަޒީރުގެ ނައިބު ވަނީ މިނިސްޓަރު ހަލީލުއަށް މަރުހަބާ ވިދާޅުވެ، ރާއްޖެއާ އެކު އޮތް ގާތް ގުޅުން އިތުރަށް ބަދަހިކުރުމަށް މަސައްކަތް ކުރައްވާނޭ ކަމުގެ ޔަގީންކަން ދެއްވައިފަ އެވެ.
އަދި ހަލީލް ވަނީ އޮމާން ސަރުކާރުން ރާއްޖެއާ މެދު ބަހައްޓާ ގާތްކަމަށް ރިއާޔަތްކުރައްވައި، ފާއިތުވި އަހަރުތަކުގައި ރާއްޖެއަށް ކުރިމަތިވި ގޮންޖެހުންތަކުގައި އޮމާނުން ވެދެއްވި އަގުހުރި އެހީތެރިކަމަށް ޝުކުރު ވެސް އަދާކުރައްވައިފަ އެވެ.
އޭގެ އިތުރުން އެ ބައްދަލުވުމުގައި ދެ ބޭފުޅުން ވަނީ ދެ ގައުމުގެ މަސްލަހަތު ހިމެނޭ ކަންކަމުގައި އެއްބާރުލުން އިތުރުކުރުމާ ބެހޭ ގޮތުން ހިޔާލު ބަދަލުކުރައްވައި ދެ ގައުމު ގުޅިގެން މަސައްކަތް ކުރެއްވުމަށް އެއްބަސްވެ ވަޑައިގެންފަ އެވެ.
