ބްރޯޑްކޮމަށް އައްޔަންކުރަން ރައީސްގެ ނަން ލިސްޓުގެ ކުރީގައި މުހައްމާ އާއި މުއާ
މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) ގެ ހުސްވެފައިވާ ދެ މެންބަރުންގެ މަގަމާށް ކުރިމަތިލި ނަންތަކަށް ރުހުން ހޯދަން ރައްޔިތުންގެ މަޖިލީހަށް ފޮނުވައިފި އެވެ.
ބްރޯޑްކޮމަށް އައްޔަންކުރަން ފެންނަ ކަމަށް ރައީސް ޑރ. މުހައްމަދު މުއިއްޒު އިސްކަންދޭ ތަރުތީބުން ފޮނުއްވި ނަން ލިސްޓުގައި 12 ބޭފުޅެއްގެ ނަން ހިމެނެ އެވެ.
- މުހައްމަދު އަބްދުالله (މުހައްމާ) ހުސްއަކުރުގެ, ހއ. އިހަވަންދޫ
- އިބްރާހިމް މުއާޒު އަލީ (މުއާ), ހަޒާރުމާގެ, ނ. ފޮއްދޫ
- އިބްރާހިމް އަޝްރަފް, ވ. މަށިވެލި
- ލެފްޓިނެޓަލް ކާނަލް ރިޓަޔާޑް ޒުބައިރު އަހުމަދު މަނިކު, ގ. މަލްވިނަ
- އަބްދުالله ހުމައިދު, ފަޒާ, ޅ. ހިންނަވަރު
- އާއިޝަތު ދިޔާނާ ތޯހިރު, ސެވަންސްޓާ, ސ. ހިތަދޫ
- އާމިނަތު ސަރާހަތު އިއްޒަތު, ގ. ގޮފި
- ޝިމްލާ އަހުމަދު, އާޝްރަލްގެ, ސ. ހިތަދޫ
- އިސްމާއިލް ޝަފީގު, މ. ސްލީޓް
- ޝިްފްޒާ މުސްތަފާ, މާދަނޑު, އާސަން, ޏ. ފުވައްމުލަށް
- އަލީ ނިޝާން, ގ. ކޫލްގްރާސް
- މުހައްމަދު ޝަމީމް, ހ. ފްރިޓީވިލާ
ރައީސްގެ ލިސްޓުގެ އެންމެ ކުރީގައިވާ މުހައްމާ އަކީ މީގެ ރައްޔިތުންގެ މަޖިލީހުގެ އިހަވަންދޫ ދާއިރާގެ ކުރީގެ މެންބަރެވެ. މުހައްމާ އަކީ 18 ވަނަ މަޖިލީހުގައި ގޮނޑި ގެއްލިފައިވާ ކަމަށް ކަނޑައެޅި 12 މެންބަރުންގެ ތެރޭގައި ހިމެނިވަޑައިގެންނެވި މެންބަރެކެވެ. ޖުމްހޫރީ ޕާޓީން މަޖިލީހަށް އިންތިހާބުވެވަޑައިގެންނެވި މުހައްމާ ޕީޕީއެމްއާވެސް ގުޅިވަޑައިގެންނެވި އެވެ. އެމްޑީޕީ ބަދަލުވެވަޑައިގެންނެވުމަށް ފަހު އަލުން ޕީޕީއެމްއާ ގުޅިވަޑައިގެންނެވި އެވެ.
ލިސްޓުގައި ދެވަނާގައިވާ މުއާ އަކީ ކުރީގެ ރައީސް އަބްދުﷲ ޔާމީންގެ ސަރުކާރުގައި ރައީސް އޮފީހުގެ ތަރުޖަމާނެވެ. ޔާމީންގެ ވެރިކަން ނިމުނުތަނާހެން މުއާ ޕީޕީއެމުން ވަކިވެވަޑައިގެން ކުރީގެ ނައިބު ރައީސް އަހުމަދު އަދީބުގެ އެމްޓީޑީއާ ގުޅިވަޑައިގެން އެ ޕާޓީގެ ނައިބު ރައީސެއްގެ މަގާމުގައި ހުންނެވި އެވެ. މިދިޔަ އަހަރު ސެޕްޓެމްބަރު މުއާ އެމްޑީޕީއަށްވެސް ސޮއިކުރި އެވެ.
ބްރޯޑްކޮމަށް ކުރިމަތިލީ ބޭފުޅުންގެ ނަންތައް އިތުރަށް ދިރާސަކުރަން މިނިވަން މުއައްސަސާތަކާ ބެހޭ ކޮމިޓީއަށް ވަނީ ފޮނުވާފަ އެވެ.
ބްރޯޑްކޮމްގެ ދެ މެންބަރެއްގެ މަގާމު ހުސްވީ އެ ކޮމިޝަންގެ ރައީސް މަރިޔަމް ވަހީދާއާއި ރާއްޖެޓީވީގެ ކުރީގެ ނިއުސް ޑިރެކްޓަރު އަލީ ޔޫސުފްގެ ދައުރު ހަމަވުމުންނެވެ. އެ ދެ ބޭފުޅުން އެ މަގާމަށް އައްޔަންކޮށްފައިވަނީ 5 ޑިސެންބަރު 2019 ގައި 5 އަހަރުގެ ދައުރަކަށެވެ.
