ރަށްވެހިކަމާއި ގޯތީގެ ރެޖިސްޓްރީތައް ގެއްލިއްޖެ، ޑީއެންއާރާ ގުޅިގެން އެ މައުލޫމާތު ހޯދަނީ
މާލެ ސިޓީ ކައުންސިލްގެ ލޭންޑް ސެކްޝަނުން ރަށްވެހިކަމާއި ގޯތީގެ ރެޖިސްޓްރީތައް ގެއްލިފައިވާ ކަމަށާއި، ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރް) އާ ގުޅިގެން އެ ޑޭޓާތައް ހޯދުމުގެ މަސައްކަތް ކުރަމުންދާ ކަމަށް ކައުންސިލުން ބުނެފި އެވެ.
މިދިޔަ ބުރާސްފަތި ދުވަހު ގްރީން ބިލްޑިންގައި ހިނގި އަލިފާނުގެ ހާދިސާގެ ސަބަބުން އެންމެ ބޮޑަށް ގެއްލުންވީ އެތަނުގައި ހިންގަމުންދިޔަ މާލެ ސިޓީ ކައުންސިލުގެ ލޭންޑް ބިލްޑިން އެންޑް ވައިޓަލް ސާވިސަސް ޑިޕާޓްމަންޓަށެވެ. އެތަނުގައި ހުރީ، އުފަންވުމާއި މަރުވާ މީހުންގެ ރެޖިސްޓްރޭޝަންތަކާއި ލިޔެކިޔުންތަކާއި، ރަށްވެހިކަމާއި ގޯތިތަކުގެ ރެޖިސްޓްރޭޝަން ފަދަ ތަކެތީގެ އަސްލެވެ.
އެތަނުގައި ލިޔެކިޔުންތައް ބަހައްޓާފައި ހުރިތަނުން ބައެއް ހަރުތައް އެއްކޮށް އަނދާ އަޅިއަށްވި އެވެ. އެމްއެންޑީއެފްގެ ފަޔާ ފައިޓަރުން ބައެއް ލިޔުންތައް ސަލާމަތް ވެސް ކުރި އެވެ. އަދި އެ ލިޔުންތަކަށް ފެނުގެ އަސަރު ކޮށްފައިވާތީ، އެ ތަކެތި ހިއްކުމުގެ މަސައްކަތް ވެސް ކައުންސިލުން ކުރި އެވެ.
މިއަދު ކުރިއަށްދިޔަ ކައުންސިލްގެ ހަތަރުވަނަ ދައުރުގެ 176 ވަނަ ޖަލްސާގައި ވާހަކަ ދައްކަވަމުން ޑެޕިއުޓީ މޭޔާ އަހުމަދު ނަރީޝް ވިދާޅުވީ، ގެއްލުނު މައުލޫމާތާއި، އެތައް ޒަމާނެއް ވަންދެން ނުލިބި ހުރި މައުލޫމާތުތައް ޑީއެންއާރުން ކައުންސިލަށް ދޭން އެއްބަސްވެފައިވާ ކަމަށެވެ.
އެގޮތުން، މާލެ ސަރަހައްދާއި ރާއްޖޭގައި ރަށްވެހިކަން އޮންނަ ފަރާތްތަކުގެ ރެޖިސްޓްރޭޝަނުގެ ކޮޕީ މާލެ ސިޓީ ކައުުންސިލަށް ފެންނާނެ އިންތިޒާމް ޑީއެންއާރުން ހަމަޖައްސައިދޭނެ ކަމަށް ޑެޕިއުޓީ މޭޔާ ވިދާޅުވި އެވެ.
"ލޭންޑް ސެކްޝަނުން ގެއްލިގެން މިދިޔަ އެންމެ ޒަމާންވީ ރެޖިސްޓްރީތައް އޭގެ އެންމެ އިހުގެ ގަޒިއްޔާތަކުން ފެށިގެން އެންމެ ފަހާ ހަމައަށް އެ ބޭފުޅުންގެ އަތުގައި ކޮޕީ ހުރި ހުރިހާ އެއްޗެއް އަޅުގަނޑުމެންނަށް ދެއްވަން އެބޭފުޅުން އެއްބަސްވެއްޖެ،" ޑީއެންއާރުން މައުލޫމާތު ހިއްސާކުރަން އެއްބަސްވީކަން ފާހަގަކުރައްވާ ނަރީޝް ވިދާޅުވި އެވެ.
ނަރީޝް ވިދާޅުވީ، ކޯޑިނޭޝަން ޓީމުން މިހާރު މަސައްކަތް ކުރަމުންދަނީ އެ ޑޭޓާތައް އަވަހަަށް ހޯދުމަށް ކަމަށެވެ. މާލެ ސިޓީ ކައުންސިލްގެ 85 އިންސައްތަ މަސައްކަތް އަންނަ ހަފްތާގައި ފަށާނެ ކަމަށް ވެސް ވިދާޅުވި އެވެ.
އެ ކައުންސިލުން ދެމުންދާ ހިދުމަތްތައް ޑިޖިޓަލައިޒް ކުރުމުގެ މަސައްކަތް ވެސް ދަނީ ކުރަމުންނެވެ. އެގޮތުން އެ ކައުންސިލުން މިހާރު ދެމުންދާ އުފަންދުވަހުގެ ސެޓްފިކެޓް ހެދުމުގެ ހިދުމަތް އޮންލައިންކޮށް ކުރެވޭނެ އިންތިޒާމް ހަމަޖެއްސުމަށް މަސައްކަތް ކުރަމުންދާ ކަމަށް ނަރީޝް ވިދާޅުވި އެވެ.
މިހާރު ކައިވެނީގެ ސެޓްފިކެޓް ހިފައިގެން ކައުންސިލަށް ދާން ޖެހުނު ނަމަވެސް، އެ ހިދުމަތް ޑިޖިޓަލައިޒް ކުރެވުމުން ޑިޖިޓަލް ކައިވެނީގެ ސެޓްފިކެޓް ބަލައިގެން ވެރިފައިކޮށް، އެ ހުށަހަޅާ ދުވަހު ޑިޖިޓަލްކޮށް އުފަންދުވަހުގެ ސެޓްފިކެޓް ލިބޭނެ ކަމަށް ޑެޕިއުޓީ މޭޔާ ވިދާޅުވި އެވެ.
