ފަޒުލްއަށް މިހާތަނަށް އެއްވެސް ތުހުމަތެއް ނުކުރެވޭ: ފުލުހުން
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ކުރިއަށްގެންދިޔަ ބޯހިޔާވަހިކަމުގެ މަޝްރޫއުގެ "ބިންވެރިޔާ ސްކީމް" ގެ ދަށުން ގޯތި ލިބޭ މީހުންގެ ލިސްޓުގެ ބޭރުން ހުޅާމާލޭން ގޯތިތަކެއް ދޫކުރިކަމަށް ތުހުމަތުކުރެވޭ މައްސަލައިގައި އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދާ މެދު އެއްވެސް ވަރަަކަށް ތުހުމަތެއް ނުކުރެވޭ ކަމަށް ފުލުހުން ބުނެފި އެވެ.
ޝަރުތު ހަމަނުވިޔަސް ގޯތި ދޫކުރި މީހުންގެ ތެރޭގައި އެޗްޑީސީގެ ފަޒުލްގެ ބޭބެ އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދާއި އެހެން މީހަކު ހިމެނޭ މައްސަަލައެއް އެންމެ ފުރަތަމަ ފެންމަތިވީ މިއަދު ސޯޝަލް މީޑިއާއިން އެވެ.
ސޯޝަލް މީޑިއާއިން އާންމުވި ލިޔުންތަކުން އެނގޭ ގޮތުން ގޯތި ލިބުނު ކަމަށް ބުނާ ފަޒުލްގެ ބޭބެއާއި އެހެން މީހަކު ވަނީ ވަށާފާރު ރޭނުމުގެ ހުއްދައަށް އެދި އެޗްޑީސީގެ ޕޯޓަލްއަށް ހުށަހަޅާފަ އެވެ. އެހެންވެ އެ ދެ މީހުންނަށް ގޯތި ލިބިފައިވާކަން ކަށަވަރުކުރުމަށް އެޗްޑީސީން ހައުސިން މިނިސްޓްރީއަށް ސިޓީއެއް އޮތީ ފޮނުވާފަ އެވެ.
ނަމަވެސް ހައުސިން މިނިސްޓްރީން ޖަވާބުގައި، އެޗްޑީސީއަށް ފޮނުވި ސިޓީގައި ބުނީ ބިންވެރިޔާގެ ސްކީމުން އެ ދެ މީހުން ގޯއްޗަށް އެޕްލައިވެސް ނުކުރާ ކަމަށާއި އަދި އެ ދެ މީހުންނަށް ގޯތި ދޫވެސްކޮށްފައި ނުވާ ކަމަށެވެ.
ބޭބެ ފޯޖު ލިޔުމެއް ހުށަހެޅި މައްސަލައިގައި ރޭ ފަޒުލް ވިދާޅުވީ އެކަމުގައި އޭނާގެ ދައުރެއް ނެތް ކަމަށެވެ. އަދި ފޯޖު ލިޔުމެއް ހުށަހެޅި މީހަކަށް ބޭބެ ވުމަކީ އިއްތިފާގެއް ކަމަށް ވެސް އޭނާ ވިދާޅުވި އެވެ.
އެ މައްސަލަ ފުލުހުން ވެސް ބަލަމުންދާ އިރު ފުލުހުން މިރޭ ވަނީ އެ މައްސަލައާ ގުޅޭ ގޮތުން މައުލޫމަތު ދިނުމަށް ނޫސްވެރިންގެ ބައްދަލުވުމެއް ވެސް ބާއްވައިފަ އެވެ.
ނޫސްވެރިންގެ ބައްދަލުވުމުގައި ނޫސްވެރިއަކު ވަނީ ފޯޖުކުރި ލިޔުމާ ފަޒުލްއާ ގުޅުމެއް އޮތްތޯ ސުވާލުކޮށްފަ އެވެ.
"ފަޒުލްއަކަށް އަޅުގަނޑުމެން އަދި މިހާ ހިސާބަކަށް އެއްވެސް ތުހުމަތެއް ނުކުރަން. އެހެން ނަމަވެސް ތަހުގީގުދާ ވަރަކުން އެއްވެސް ފަރާތަކަށް ތުހުމަތު ކުރެވޭ ކަމަށްވާންޏާމު އެ ފަރާތަކާ ސުވާލުކޮށް އެ ތުހުމަތު އިއްވާނަން," އެސިސްޓެންޓް ކޮމިޝަނާ އޮފް ޕޮލިސް އަބްދުﷲ ޝަރީފް ވިދާޅުވި އެވެ.
ބޭބެ ފޯޖު ލިޔުން ހުށަހެޅި މައްސަލަ މިދިޔަ ޖުލައި މަހު އެނގުމުން ވެސް އެކަން ފުލުހުންނަށް ނާންގާ އޮތުމުން ގިނަ ބައެއްގެ ފާޑުކިއުން ވަނީ އަމާޒުވެފަ އެވެ. އެހެން ނަމަވެސް ފަޒުލް ވިދާޅުވީ ފުލުހުންނަށް ނާންގާ އޮތީ ލިޔުމުގެ ސައްހަކަން ކަށަވަރުކުރާތީ ކަމަށެވެ.
އެ މައްސަލައިގައި ފަޒުލްއާއެކު އެޗްޑީސީގެ ބޯޑުގައި ހިމެނިވަޑައިގަންނަވާ އެއް މެމްބަރަކު ފިޔަވައި ދެން ތިބި އެންމެން މިއަދު ވަނީ ސަސްޕެންޑްކޮށްފަ އެވެ.
