ޒަކިއްޔާގެ ދަރިފުޅު މާރާމާރީ ހިންގައިގެން ހައްޔަރުކޮށްފި

ނ. ހޮޅުދޫގައި ޒަހަމްތަކަކާ އެކު މަރުވެފައި އޮއްވާ ފެނުނު އެ ރަށު މާރަނގަ, ޒަކިއްޔާގެ ދަރިފުޅު މާރާމާރީ ހިންގައިގެން މިއަދު ހައްޔަރުކޮށްފި އެވެ. މީޑިއާތަކަށް މިއަދު ފޮނުވި މެސެޖެއްގައި ފޮޓޯ އާއި ވަނަވަރު ހާމަކޮށް ފުލުހުން ބުނީ އެ މައްސަަލައިގައި ހައްޔަރުކުރީ، ހޮޅުދޫ، ނިއުލައިފް، މޫސާ ރިމްޒީ (30އ) ކަމަށެވެ. އެނގިފައިވާ ގޮތުން ހައްޔަރުކުރި ރިމްޒީ އަކީ ޒަކިއްޔާގެ ދޮށީ ފިރިހެން ދަރިފުޅެވެ. އޭނާ ހައްޔަރުކުރީ މިދިޔަ ބުރާސްފަތި ދުވަހު ހިންގި މާރާމާރީއާ ގުޅިގެން ކަމަށް ފުލުހުން ބުންޏެވެ. އޭނާ ހައްޔަރުކުރީ ކޯޓު އަމުރެއްގެ ދަށުން ކަމަށް ކަމަށާއި އެ މައްސަލަ މިހާރު ބަލަމުންދާ ކަމަށް ފުލުހުން ބުންޏެވެ. ޒަކިއްޔާ މަރުވެފައި އޮއްވާ ފެނުނީ އޭނާ ދިރިއުޅުނު އެ ރަށު ނިއުލައިފް ގޭގެ ގުދަން ކައިރިން މިދިޔަ ސެޕްޓެމްބަރު މަހުގެ 10 ވަނަ ދުވަހުގެ ހެނދުނު 10 ހާއިރު އެވެ. ކުނި ނަގަން ދިޔަ ބަޔަކަށް ޒަކިއްޔާގެ ހަށިގަނޑު ފެނުނުއިރު، ބޮލަށް ޒަހަމްތަކެއް ލިބި ކަރަށް ލިބިފައިވާ ހަމަލާއިން ނޭވާހޮޅި ވެސް ބުރިވެފައިވާ ކަމަށް އެ ރަށު މީހުން ކިޔައިދީފައިވެ އެވެ. އޭނާގެ ކައިރީގައި ވަޅިއެއް އޮތްއިރު، އެ ތަނުގައި ގިނަ އަދަދަކަށް ލޭ ވެސް ހުރި ކަމަށް އެ ރަށުން މައުލޫމާތު ދިން މީހުން ބުންޏެވެ. ޒަކިއްޔާގެ މަރާ ގުޅިގެން އެ ރަށު މީހުން ގިނަ ތުހުމަތުތަކެއް ކުރެ އެވެ. ޒަކިއްޔާއަށް ލިބިފައިވާ އަނިޔާތަކަކީ މީހެއްގެ ފަރާތުން ލިބުނު އަނިޔާތަކެއް ކަމަށް ބުނެ، ކަންބޮޑުވުން ފާޅުކޮށް މައްސަލަ ތަހުގީގު ކުރުމަށް ގޮވާލައި ހޮޅުދޫގައި އިހުތިޖާޖުވެސް ކޮށްފައިވެ އެވެ. ނަމަވެސް "ދެން" އަށް އެނގިފައިވާ ގޮތުން މީހަކު ޒަކިއްޔާ މަރާލިކަމަށް ޒަކިއްޔާގެ ދަރިންނެއް ގަބޫލެއް ނުކުރެ އެވެ. އަދި ޒަކިއްޔާގެ ދަރިފުޅު މާރާމާރީ ހިންގީވެސް މީހަކު ޒަކިއްޔާ މަރާލިކަމަށް ތުހުމަތުކުރާތީ އެވެ. މި މަހުގެ 3 ވަނަ ދުވަހު ބޭއްވި ނޫސްވެރިންގެ ބައްދަލުވުމުގައި ޗީފް އިންސްޕެކްޓާ އޮފް ޕޮލިސް މުހައްމަދު ސާމިހު ވަނީ ސީނުން ފެނުނު ވަޅީގައި ލޭ ނެތް ކަމަށް ރަށު ތެރޭގައި ދެކެވޭ ވާހަކަތައް ދޮގުކޮށްފަ އެވެ.