ފިނޭންސްގެ ހުއްދަ ހޯދައިގެން ނޫނީ ދަރަނި ނުނަގަން އެސްއޯއީތަކަށް އަންގައިފި
ސަރުކާރުން އަޅަމުން އަންނަ މާލީ އިސްލާހީ ފިޔަވަޅުތަކުގެ ތެރެއިން ސަރުކާރު ހިއްސާވާ ކުންފުނި (އެސްއޯއީ) ތަކުން ފިނޭންސް މިނިސްޓްރީގެ ހުއްދަ ހޯދައިގެން ނޫނީ ދަރަނި ނުނަގަން އަންގައިފި އެވެ.
ފިނޭންސް މިނިސްޓްރީން ސަރުކާރު ހިއްސާވާ ކުންފުނިތަކުގެ ތެރެއިން ކުންފުންޏަކަށް ފޮނުވާފައިވާ ލިޔުމެއް "ދެން" އަށް ވަނީ ލިބިފަ އެވެ. އެ ލިޔުމުގައި, ސަރުކާރު ހިއްސާވާ ކުންފުނިތަކުގެ ތެރެއިން އެއްވެސް ކުންފުންޏަކުން އެއްވެސް ލޯނެއް ނަގަން ޖެހިއްޖެ ނަމަ، އެ މިނިސްޓްރީގެ ހުއްދަ ހޯދަން އަންގާފައިވެ އެވެ.
އަދި ކުންފުނީގެ ފަރާތުން އިތުރު ކުންފުންޏަކަށް ނުވަތަ އިތުރު ފަރާތަކަށް ލޯނު، ނުވަތަ އަނބުރާ ދައްކާ ގޮތަށް އެއްވެސް ފައިސާއެއް ދޫކުރާ ކަމުގައިވާ ނަމަވެސް، މިނިސްޓްރީގެ ހުއްދަ ލިޔުމުން ހޯދައިގެން ނޫން ގޮތަކަށް ކުރިއަށް ނުގެންދިއުމަށް މިނިސްޓްރީން ވަނީ އިލްތިމާސްކޮށްފަ އެވެ.
"މީގެ އިތުރުން، ތިޔަ ކުންފުނީގެ ފަރާތުން އެއްވެސް މަޝްރޫއެއް ކުރިއަށް ގެންދަވާނަމަ، އެ މަޝްރޫއެއްގެ ފީސިބިލިޓީ ރިޕޯޓާއި އެކު މި ވުޒާރާއަށް ހުށަހަޅައިގެން މި ވުޒާރާގެ ހުއްދަ ހޯދައިގެން ނޫން ގޮތަކަށް ކުރިއަށް ނުގެންދިއުމަށް ދެންނެވީމެވެ،"
ފިނޭންސުން މިގޮތަށް އަންގާ ލިޔުމެއް ފޮނުވީ ކޮންކަމަކާ ގުޅިގެންކަން ހާމަކޮށްފައި ނުވި ނަމަވެސް މައުލޫމާތު ލިބިފައިވާ ގޮތުން އެފަދަ ލިޔުމެއް މި މަހުގެ 18 ވަނަ ދުވަހު ފޮނުވާފައި ވަނީ އެސްއޯއީއަކުން ކުރަން އުޅުނު މުއާމަލާތްތަކަކާ ގުޅިގެންނެވެ.
ފިނޭންސް މިނިސްޓްރީން މި ލިޔުން އެސްއޯއީތަކަށް ފޮނުވާފައިވާއިރު، ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ "ކޯޑް އޮފް ކޯޕަރޭޓް ގަވަނެންސް ފޯ ސްޓޭޓް އޯން އެންޓަޕްރައިސަސް" ގައި ކުންފުނިތަކުން ލޯނާއި އިންވެސްޓްމަންޓްތަަކާ އަދި އެފަދަ މާލީ މުއާމަލާތްތައް ކުރުމުގެ ކުރިން އެ ބޯޑުގެ ހުއްދަ ހޯދަން ޖެހޭނެ ކަމަށް ބުނެފައިވެ އެވެ.
ސަރުކާރުގެ ކުންފުނިތަކުގެ ކަންކަން ބަލަހައްޓާ ޕީސީބީގެ ގާނޫނު އުވާލުމަށްފަހު ދައުލަތުގެ ކުންފުނިތަކާ ގުޅޭ އާ ގާނޫނެއް އެކުލަވާލައި، ސަރުކާރު ހިއްސާވާ ކުންފުނިތައް ފިނޭންސް މިނިސްޓްރީގެ ދަށަށް ގެންނަން އަންނަ އަހަރަށް ލަފާކުރާ ބަޖެޓް ޕޮޒިޝަން ރިޕޯޓުގައި ހިމަނާފައިވެ އެވެ.
ރިޕޯޓުގައިވާ ގޮތުން އެ ގާނޫނުގެ ތެރެއިން ކުންފުނިތަކުގެ ހިންގުން ހަރުދަނާ ކުރުމަށް ސާފު ގަވަނެންސް އޮނިގަނޑެއް ގާއިމުކުރެވި، ކުންފުނިތަކުގެ މިލްކުވެރިކަމުގެ ސިޔާސަތުތައް ކަނޑައަޅައި، ހިންގުމާއި ބެލެހެއްޓުމުގެ މިންގަނޑުތައް ކަނޑައެޅިގެންދާނެ އެވެ.
އެ ބަދަލާ އެކު ޕީސީބީ ގާނޫނު އުވާލެވި، އެ ގާނޫނުގައި ހުރި މުހިންމު ނުކުތާތައް ވެސް ކުންފުނިތަކާ ގުޅޭ ގާނޫނަށް އިތުރުކުރެވިގެންދާނެ އެވެ. ޕީސީބީ އުވާލެވުމުން، ކުންފުނިތަކާ ގުޅުންހުރި ކަންކަން ބަލަހައްޓަމުންދާނީ ފިނޭންސް މިނިސްޓްރީންނެވެ.
ސަރުކާރުން ނިންމާފައި ވަނީ އަންނަ އަހަރު ރައްޔިތުންގެ މަޖިލިހުގެ ފުރަތަމަ ދައުރުގައި ސަރުކާރު ހިއްސާވާ ކުންފުނިތަކާ ގުޅޭ އާ ގާނޫނެއްގެ ބިލު މަޖިލިހަށް ފޮނުވުމަށެވެ.
ސަރުކާރު ހިއްސާވާ ކުންފުނިތަކަށް ފިނޭންސް މިނިސްޓްރީން ލިޔުން ފޮނުވާފައިވާއިރު، ކުންފުނިތަކާ ގުޅުންހުރި ކޮރަޕްޝަނުގެ ގިނަ މައްސަލަތަކެއް ފެންމަތިވެ، ބައެއް މައްސަލަތައް ކަމާ ގުޅުންހުރި އިދާރާތަކުން ދަނީ ބަލަމުންނެވެ.
Ads by STO
