ޖިހާދުގެ މައްސަލަ އަލުން ހުށަހަޅަން ހައިކޯޓުން ހުއްދަ ދީފި
ކުރީގެ ރައީސް އަބްދުالله ޔާމީން އަބްދުލްގައްޔޫމްގެ ވެރިކަމުގައި ނައިބު ރައީސްގެ މަގާމުގައި ހުންނެވި އަބްދުالله ޖިހާދުގެ މައްޗަށް ކުރި ދައުވާތައް ކްރިމިނަލް ކޯޓުން ބޭރުކޮށްލި މައްސަލަ ހައިކޯޓުން ބަލައިނުގަތުމަށް ނިންމި ނަމަވެސް އަލުން އެ މައްސަލަ ހުށަހެޅުމަށް އެ ކޯޓުން ހުއްދަ ދީފި އެވެ.
ޖިހާދުގެ މައްޗަށް ދައުވާކުރަން ހުށަހެޅީ ފުށިދިއްގަރުފަޅު ސްޕެޝަލް ޓްއަރިސްޓް ޒޯނެއްގެ ގޮތުގައި ތަރައްގީ ކުރުމަށް ޖޮއިންޓްވެންޗާ އެގްރިމެންޓެއްގައި ޕްރައިމް ކެޕިޓަލް މޯލްޑިވްސް ލިމިޓެޑާ އެކު ސޮއިކުރި މައްސަލައެއްގަ އެވެ.
އެ އެގްރިމެންޓުގައި ސޮއިކޮށްފައިވަނީ ސަރުކާރަށް 25 އިންސައްތަ ހިއްސާ އޮންނަ ގޮތަށެވެ. އެހެންނަމަވެސް އޭރު ނެޝަނަލް ޕްލޭނިން ކައުންސިލުން ލަފާ ދީފައިވަނީ ސްޕެޝަލް ޓޫރިޒަމް ޒޯނެއްގައި ގޮތުގައި ތަރައްގީކުރާ ތަންތަނުގައި މަދުވެގެން ސަރުކާރުގެ 50 އިންސައްތަ ހިއްސާ އޮންނަން ޖެހޭނެ ކަމަށެވެ.
އެ މައްސަލާގައި ޖިހާދުގެ މައްޗަށް ރައްޔިތުންނަށް ނުވަތަ ދައުލަތަށް ފައިދާއެއް ވާން އޮތް ކަމެއްގައި އެނޫން ގޮތަކަށް އަމަލުކުރުމުގެ ކުށުގެ ދައުވާ އުފުލުމަށް ކްރިމިނަލް ކޯޓަށް ފޮނުވި އެވެ. އެހެންނަމަވެސް އެ މައްސަލަ ބެލޭނެތަނެއް ނެތް ކަމަށް ބުނެ ކްރިމިނަލް ކޯޓުން އެ މައްސަލަ ބޭރުކޮށްލި އެވެ.
އެހެންކަމުން މިދިޔަ އޮގަސްޓް މަހުގެ ތެރޭގައި ދައުލަތުގެ ފަރާތުން ހައިކޯޓުގައި އެ މައްސަލަ އިސްތިއުނާފުކުރި އެވެ.
އެ މައްސަލަ ހައިކޯޓުން ބަލައި ނުގަތުމަށް ނިންމީ, ޖިހާދު ދިރިއުޅޭ އެޑްރެހެއް ސާފުކުރުމަށްފަހު ސެޕްޓެމްބަރު 19 ވަނަ ދުވަހުން ފެށިގެން 15 ދުވަހުގެ ތެރޭގައި އެ މައްސަލަ އަލުން ހުށަހެޅުމަށް ޕީޖީއަށް އެންގި ނަމަވެސް އެ މުއްދަތު ފާއިތުވި ފަހުން, 17 ވަނަ އަށް ވީ ދުވަހު އެ މައްސަލަ ހުށަހެޅުމުންނެވެ.
ހައިކޯޓުން ނިންމި ނިންމުން ބާތިލުކޮށްދިނުމަށް އެދި ދައުލަތުން ސްޕްރީމް ކޯޓަށް ވެސް އެ މައްސަލަ ހުށަހެޅި އެވެ. އަދި ހައިކޯޓުގެ ގަވާއިދުގައިވާ ގޮތުން އެ މައްސަލަ މުރާޖާކޮށްދީ, ހުއްދައަށް އެދި ޕީޖީން އެ ކޯޓަށް ވެސް ހުށަހެޅި އެވެ.
ޕީޖީން ބުނެފައިވަނީ އޭރު ދިން 15 ދުވަހުގެ މުއްދަތުގެ ތެރޭގައި އެ މައްސަލަ އަލުން ހުށަހެޅިފައި ނުވަނީ އެ މުއްދަތުގެ ތެރޭގައި ޖިހާދު ރާއްޖެއިން ބޭރަށް ގޮސްފައިވާތީ, އެ އިންތިޒާމު ދައުލަތަށް ހަމަނުޖެއްސުމުން ކަމަށާއި އޭނާ އެނބުރި ރާއްޖެ އައިކަން އެނގުމާއެކު 24 ގަޑިއިރު ނުވަނީސް މައްސަލަ އަލުން ކޯޓަށް ހުށަހަޅާފައިވާ ކަމަށެވެ.
އެހެންކަމުން ޕީޖީން އެދިފައިވަނީ ކޯޓުން ދިން މުއްދަތުގެ ތެރޭގައި އަލުން ހުށަހަޅާފައި ނުވަނީ ހައިކޯޓުގެ ގަވާއިދުގައި ބަޔާންކުރާ އަމިއްލަ ބާރުނުފޯރާ ފަދަ ސަބަބެއް މެދުވެރިވެގެން ކަމުގައިވާތީ މައްސަލަ އިސްތިއުނާފުކުރުމުގެ ހުއްދައަކަށެވެ.
އެ މައްސަލާގައި މައްސަލަ ބެލި ފަނޑިޔާރުންގެ ބެންޗުގެ ރިޔާސަތު ބެލެހެއްޓެވި ފަނޑިޔާރު ހުސައިން މަޒީދުގެ ރައުޔުގައި ވިދާޅުވީ ކުރިން ހުށަހަޅާފައިވާ މައްސަލައަކަށްވުމާއެކު އެޑްރެސް ސާފުކުރުމުގައި ކުރެވިފައިވާ މުއާމަލާތުތަކާއި ކަންހިނގާފައިވާ ގޮތަށް ރިއާޔަތްކޮށް، އެ މައްސަލައަށް އިސްތިއުނާފުކުރުމުގެ ހުއްދަ ދިނުމަށް ފެންނަ ކަމަށެވެ. އަދި އެ ރައުޔަށް ފަނޑިޔާރު މުހައްމަދު ނިޔާޒާއި ފަނޑިޔާރު ހުޒައިފާ މުހައްމަދު ތާއީދުކުރެއްވި އެވެ.
