އާ އަހަރާ ދިމާކޮށް މަސްތުވާތަކެތީގެ އޮޕަރޭޝަންތަކެއް
މި ފެށޭ އާ އަހަރާއި ދިމާކޮށް މަސްތުވާތަކެއްޗާއި ބަނގުރަލުގެ ވިޔަފާރި އިތުރުވާނެ ކަމަށް ބެލެވޭތީ ހާއްސަ އޮޕަރޭޝަނެއް ފުލުހުން ފަށައިފި އެވެ.
ފުލުހުން މިއަދު ބުނީ، އާ އަހަރާ ދިމާކޮށް ބަނގުރާ އަދި މަސްތުވާތަކެތި ބޭނުންކޮށް ވިއްކާ ވިޔަފާރި ކުރުން އިތުރުވެގެންދާނެ ކަމަށް ބެލެވޭ ކަމަށެވެ.
އެެހެންވެ، ޑްރަގް އެންފޯސްމެންޓާއި، ހުޅުމާލެ ޕޮލިހާއި، މެރިން ޕޮލިސް އަދި ކ އަތޮޅު ޕޮލިސް ސްޓޭޝަންތައް ގުޅިގެން އިއްޔެ ހާއްސަ އޮޕަރޭޝަނެއް ފަށާފައިވާ ކަމަށް ފުލުހުން ބުންޏެވެ.
އިއްޔެ ފެށި މަސްތުވާތަކެތީގެ ހާއްސަ އޮޕަރޭޝަނުގެ ދަށުން ހުޅުމާލެ ފަޅުތެރެ ޕެޓްރޯލް ކޮށްފައިވެ އެވެ. އަދި ރަށުތެރެއަށް ބަނގުރާ އަރުވައި، ބަނގުރާ ވިއްކާ ކަމަށް ޝައްކު ކުރެވޭ ކެފޭ، ރެސްޓޯރެންޓްތައް މޮނިޓާކުރަމުންދާ ކަމަށް ވެސް ފުލުހުން ބުނެފައިވެ އެވެ.
އިތުރަށް ފުލުހުން ބުނީ، ގާނޫނާއި ގަވާއިދާ ހިލާފަވަމުންދާ ފަރާތްތަކާމެދު ފިޔަވަޅު އަޅާނެ ކަމަށެވެ.
އާ އަހަރާ ދިމާކޮށް އަބަދުވެސް މަސްތުވާތަކެއްޗާއި، ބަނގުރާ ބޭނުންކޮށް، ވިއްކާ ވިޔަފާރި ކުރުން އިތުރުވާނެ ކަމަށް ބަލައި ފުލުހުންގެ އޮޕަރޭޝަންތައް ފަށަ އެވެ.
އަދި އެ އޮޕަރޭޝަންތަކުން މަސްތުވާތަކެއްޗާއި ބަނގުރާ ގިނަ އަދަދަކަށް އަތުލައިވެސް ގަނެ އެވެ.
ރާއްޖޭގައި މަސްތުވާތަކެތީގެ މައްސަލަ ވެފައިވަނީ ހައްލު ނުވެ އޮތް ބޮޑު މައްސަލައަކަށެވެ.
މިދިޔަ ނޮވެމްބަރު މަހުގެ ތެރޭގައި ވެސް ރާއްޖޭގެ އުތުރުގެ ސަރަހައްދުގައި އުޅުނު ލަންކާގެ މަސްބޯޓަކުން މިއަދު ވަނީ 468.6 ކިލޯގްރާމުގެ މަސްތުވާތަކެތި އަތުލައިގެންފައިވެ އެވެ. އެއީ ފަހުގެ ތާރީހެއްގައި ރާއްޖެއިން އަތުލައިގަތް އެންމެ ގިނަ އަދަދެއްގެ މަސްތުވާތަކެއްޗެވެ.
