ރާއްޖޭގައި ހާލުގައި ޖެހިފައި ތިބި އިންޑިއާ މީހުންގެ މުސާރަ ހައިކޮމިޝަނުން ހޯދައިދެނީ
ރާއްޖޭގައި ހާލުގައި ޖެހިފައިތިބި އިންޑިއާ މަސައްކަތްތެރިންގެ މުސާރަ ހޯދައިދޭނެ ކަމަށް ރާއްޖޭގައި ހުންނަ އިންޑިއާގެ ހައި ކޮމިޝަނުން ބުނެފި އެވެ.
އިންޑިއާގެ 40 މީހުން މަސައްކަތް ކުރަން ރާއްޖެ ގެނެސް، މުސާރަ ނުދީ ހާލުގައި ޖައްސާފަައިވާ ކަމަށް ބުނާ މައްސަލައެއް ފެންމަތިވީ އިއްޔެ އެވެ. އެ މީހުން ވީޑިއޯއެއް ހަދައި ސޯޝަލް މީޑިއާގައި ޕޯސްޓް ކުރި ހިސާބުން އިންޑިއާގެ ނޫސްތަކުން އެވާހަކަ ރިޕޯޓް ކުރަން ފެށި އެވެ.
އެ މަސައްކަތްތެރިން ކޮންސްޓްރަކްޝަން ކުންފުންޏަކުން ވަޒީފާދީގެން ގެނައީ މުސާރާއިގެ ގޮތުން މަހަކު 25،000 އާއި 30،000 އިންޑިއަން ރުޕީސް މުސާރައިގެ ގޮތުގައި ދޭނެ ކަމަށް ބުނެ އެވެ. އެއީ ރުފިޔާއިން ބަލާނަމަ، 5000 އެއްހާ ރުފިޔާ އެވެ.
އިންޑިއާ އޮޑިޝާ ސްޓޭޓަށް ނިސްބަތްވާ އެ މަސައްކަތްތެރިން ރާއްޖެ އައިސްފައިވަނީ މިދިޔަ ޖޫން މަހު އެވެ. ޖޫން މަހު މަސައްކަތް ކުރަން ފެށި ނަމަވެސް، މުސާރަ ނުލިބޭތާ އެތައް ދުވަހެއް ވެއްޖެ ކަމަށް އެ މީހުން ބުންޏެވެ.
އެ މީހުން ބުނީ ފުލް މުސާރަ ލިބިފައިވަނީ އެންމެ ފުރަތަމަ މަހު އެކަނި ކަމަށެވެ. އޭގެ ފަހުން، ދިނީ މުސާރައިގެ ދެބައިކުޅަ އެއްބައި ކަމަށް ބުނެ އެވެ.
ހައިކޮމިޝަނާ ހަވާލާދީ އިންޑިއާގެ ނޫހަކު ރިޕޯޓްކޮށްފައިވާ ގޮތުގައި އެ މައްސަލަ ކުންފުނީގެ ކަމާބެހޭ ފަރާތްތަކުގެ ސަމާލުކަމަށް ގެންގޮސްފައިވާ އެވެ.
އެ ކުންފުނީގެ ޕްރޮޖެކްޓް މެނޭޖަރާ ހަވާލާދީ ހައިކޮމިޝަނުން ބުނީ މުސާރަ ނުލިބިގެން މުޒާހަރާކުރި މަސައްކަތްތެރިންގެ ތެރޭގައި ހިމެނެނީ އޮޑިޝާ ސްޓޭޓުގެ 35 މީހުންނާއި ޓެމިލްނާޑޫގެ 4 މީހުންނެވެ. އެ މީހުން މަސައްކަތް ކުރަނީ އައްޑޫ ގަމުގެ އެއާޕޯޓް ޕްރޮޖެކްޓުގެ މަސައްކަތެވެ.
ހައި ކޮމިޝަނުން ބުނި ގޮތުގައި އެ މަސައްކަތްތެރިން ވަނީ މި މަހުގެ 5 ވަނަ ދުވަހު ކުންފުނީގެ ވަޒީފާއިން ވަކި ވެފަ އެވެ. ނަމަވެސް ކުންފުނީގެ ނަމެއް ނުބުނެ އެވެ. ކުރިއަށްއޮތް 3 ދުވަހުގެ ތެރޭގައި އެ މަސައްކަތްތެރިންނަށް ނުދީ އޮތް މުސާރަ ލިބޭނެ އިންތިޒާމް ހަމަޖައްސައިދޭނެ ކަމަށް ހައި ކޮމިޝަނުން ބުންޏެވެ.
އޮޑިޝާގެ 35 މަސައްކަތްތެރިން ހިމެނޭ ގޮތަށް އެ 40 މަސައްކަތްތެރިންގެ އަތުގައި ސައްހަ ވިސާއާ ޕާސްޕޯޓް ވެސް އޮތް ކަމަށާއި، އެ މަސައްކަތްތެރިންނަށް މުސާރަ ލިބުމުން އަނބުރާ ގައުމަށް ދެވޭނެ އިންތިޒާމު ހަމަޖެހިގެންދާނެ ކަމަށެވެ.
މި މައްސަލައާއި ގުޅިގެން ރޭ ފުލުހުން 'ދެން' އަށް ބުނީ، އިންޑިއާގެ މަސައްކަތްތެރިންނަށް މުސާރަ ނުދީއޮތްކަމަށް ބުނާ މައްސަލަ ބަލަމުންދާ ކަމަށެވެ.
