ޕާކިސްތާނުގެ އިންސާނީ ހައްގުތަކުގެ ކޮމިޝަނުން އާ ގާނޫނަކާ ގުޅިގެން ބިރުވެރިކަން ފާޅުކޮށްފި
ޕާކިސްތާނުގެ އިންސާނީ ހައްގުތަކުގެ ކޮމިޝަނުން (އެޗްއާރްސީޕީ) އެ ގައުމުގައި ފާސްކުރަން އުޅޭ އާ ގާނޫނަކާ ގުޅިގެން ކަންބޮޑުވުން ފާޅުކޮށްފި އެވެ.
އެޗްއާރްސީޕީ އިން ނެރުނު ބަޔާނެއްގައި ބުނީ "އޮފިޝަލް ސީކްރެޓްސް (އެމެންޑްމަންޓް) ބިލް 2023" ގެ ނަމުގައި ހުށަހަޅާފައިވާ މި ބިލަކީ ގައުމީ ސަލާމަތާ ގުޅުންހުރި މައުލޫމާތު ހާމަކުރުމަށް އެޅޭ ހަރުކަށި ފިޔަވަޅުތަކެއް އެކުލެވޭ ބިލެއް ކަމަށެވެ.
މި ބިލު ފާސްވެއްޖެނަމަ ސަރުކާރުގެ ސިއްރު މައުލޫމާތު ހާމަކުރާ ފަރާތްތަކަށް އުމުރަށް ޖަލަށްލުމުގެ އަދަބު ކަނޑައެޅިގެންދާނެ ކަމަށްވެސް ބަޔާނުގައި ބުނެފައި ވެއެވެ. އަދި މިކަމުގެ ސަބަބުން ރައްޔިތުންގެ މަދަނީ މިނިވަންކަމަށް ނޭދެވޭ އަސަރުތަކެއް ކުރާނެ ކަމަށް އެ ކޮމިޝަނުން ބުންޏެވެ.
މީގެ އިތުރުން އެޗްއާރްޕީސީ އިން ބުނީ މި ބިލުގެ ސަބަބުން ނޫސްވެރިކަމުގެ މިނިވަންކަމަށާއި، މައުލޫމާތު ހޯދުމުގެ ހައްގަށް އަދި ހިޔާލުފާޅުކުރުމުގެ މިނިވަންކަމަށް ބޮޑެތި ގޮންޖެހުންތަކެއް ކުރިމަތިވާނެ ކަމަށެވެ.
އެ ކޮމިޝަނުން ބުނީ މި ބިލަކީ ޕާކިސްތާނުގެ ގާނޫނު އަސާސީއާ ހިލާފު ބިލެއް ކަމަށެވެ.
މި ބިލާ ގުޅިގެން ޕާކިސްތާނުގެ ނޫސްވެރިންނާއި، މަދަނީ ޖަމިއްޔާތަކުން ވެސް ކަންބޮޑުވުން ފާޅުކޮށްފައިވެ އެވެ. އަދި މި ބިލަކީ ޕާކިސްތާނުގެ ޑިމޮކްރަސީއަށް ނުރައްކަލެއް ކަމަށް ބުނެ، ބިލު އަނބުރާ ގެންދިއުމަށްވެސް ގޮވާލާފައި ވެއެވެ.
މީގެ އިތުރުން މި ބިލަކީ ސަރުކާރުގެ ނުފޫޒު އިތުރުކޮށް، ރައްޔިތުންގެ އަސާސީ ޙައްޤުތައް ހަނިކުރުމަށް އަމާޒުކޮށްފައިވާ ބިލެއް ކަމަށްވެސް އެ ފަރާތްތަކުން ބުނެ އެވެ.
ނަމަވެސް މިކަމާ ގުޅިގެން ޕާކިސްތާނުގެ ސަރުކާރުން ބުނީ މިއީ ގައުމީ ސަލާމަތަށް މުހިންމު ބިލެއް ކަމަށާއި، ގައުމުގެ ސިއްރު މައުލޫމާތު ރައްކާތެރިކުރުމަށް އެޅޭ ފިޔަވަޅެއް ކަމަށެވެ.
Ads by STO
