ވެރިންނަށް މިސްކިތުގެ ވަކިތަނެއް ހާއްސަކުރުމަކީ އާ ކަމެއްނޫން: އިސްލާމީ މަރުކަޒުގެ އިމާމް
އިސްލާމީ މަރުކަޒުގައި ވަކިތަނެއް ވެރިންނަށް ހާއްސަކުރުމަކީ އާ ކަމެއް ނޫން ކަމަށް އެ މިސްކިތުގެ އިސް އިމާމް ޝޭހް މުހައްމަދު ލަތީފް ވިދާޅުވެއްޖެ އެވެ.
އިއްޔެގެ ހުކުރު ނަމާދުގައި ރައީސް ޑރ މުހައްމަދު މުއިއްޒު އިސްލާމީ މަރުކަޒުގެ ކުރީ ސަފުގައި، އެހެން މީހުންނާ ދުރުގައި އިށީންދެވަޑައިގެން ހުންނަވާ ފޮޓޯއެއް ސޯޝަލް މިޑީއާގައި ދަނީ ދައުރުވަމުންނެވެ.
އެ ފޮޓޯ ދައުރުކުރުވާ މީހުން ބުނަނީ މިސްކިތުގައި ހުރިހާ އެންމެންނަށްވެސް ސަަފު ހެދުމުގައި ހަމަހަމަވާން ޖެހޭނެ ކަމަށެވެ. އަދި އެގޮތަށް ވެރިންނަށް ކުރީ ސަފުން ޖާގަ ދޭން ފެށީ މި ސަރުކާރުން ކަމަށެވެ.
އެ ވާހަކަ އަށް ރައްދު ދެއްވައި 'އެކްސް' ގައި ކުރެއްވި ޕޯސްޓެއްގައި ލަތީފް ވިދާޅުވީ ވެރިންނަށް މިސްކިތުގައި ވަކިތަނެއް ހުރުމަކީ މީގެ ކުރިންވެސް ކުރަމުން އައި ކަމެއް ކަމަށެވެ.
"އަބަދުވެސް އިސްލާމީ މަރުކަޒުގައިވެސް އަދި އެ ނޫން މިސްކިތްތަކުގައިވެސް އިމާމުންނާ، މުދިމުންނާ، ވެރިން ވަޑައިގަންނަވާއިރު އެ މީހުންނަށް ވަކިތަނެއް ހުރޭ، އެއީ އަދުގެ ސަރުކާރުން ކުރާ ކަމެއް ނޫން" ލަތީފްގެ ޕޯސްޓުގައި ވިދާޅުވި އެވެ.
އިސްލާމީ ތާރީހުން މިސާލު ނަންގަވައި ލަތީފް ވިދާޅުވީ ވެރިންނަށް ނުރައްކަލެއް އޮވެއްޖެނަމަ މިސްކިތުގެ ވަކިތަނެއް އެ ބޭފުޅުންނަށް ހަމަޖެއްސޭނެ ކަމަށެވެ.
