ހާއްސަ ދާއިރާތަކުން މީހުން ބިނާކުރަން ޒަކާތު ފަންޑުން ސްކޮލާޝިޕް ދެނީ
ރާއްޖެއަށް ބޭނުންވާ ހާއްސަ ދާއިރާތަކުން މީހުން ބިނާކުރަން ޒަކާތު ފަންޑުން ސްކޮލާޝިޕް ދިނުމަށް ޒަކާތު ފަންޑުން މަތީ ތައުލީމަށް އެހީދިނުމުގެ އުސޫލުގައި ހިމަނައިފި އެވެ.
ޒަކާތު ފަންޑުން މަތީ ތައުލީމަށް އެހީ ދޭނެ ގޮތްތައް އިތުރުކޮށް، އާ އުސޫލެއް ސަރުކާރުގެ ގެޒެޓްގައި ޝާއިއުކުރިއިރު، އެ އުސޫލަށް މިއަދުން ފެށިގެން ވަނީ އަމަލުކުރަން ފަށާފަ އެވެ.
އެ އުސޫލުގައި ބުނީ މަތީ ތައުލީމު ހާސިލު ކުރުމަށް ޓަކައި ދޭ ހާއްސަ ސްކޮލަޝިޕްގެ ފުރުސަތު ދެވޭނީ ރާއްޖެއަށް ބޭނުންވާ ވަކި ހާއްސަ ދާއިރާތަކަކުން މީހުން ބިނާކުރުމަށާއި ތަމުރީނު ކުރުމަށް ކަމަށެވެ.
އެ ހާއްސަ ސްކޮލާޝިޕް ފުރުސަތުތައް ހުޅުވައިލުމާމެދު ގޮތް ނިންމާނީ އިސްލާމިކް މިނިސްޓަރުގެ ލަފާގެ މަތިން ޒަކާތު ފަންޑުން ސްކޮލާޝިޕާއި ހާއްސަ އެހީދިނުމާ ބެހޭ ކޮމެޓީން ކަމަށެވެ.
ޒަކާތު ފަންޑުގެ ދަށުން މަތީ ތައުލީމު ފުރިހަމަކުރަނިކޮށް ހާލަތެއް މެދުވެރިވެގެން ފައިސާގެ ދަތިކަން ކުރިމަތިވެ، ކޯސް މެދުކެނޑުނު ފަރާތްތަކުން ކޯސް ފުރިިހަމަކުރަން އެހީ ދެވޭނެ ކަމަށް އުސޫލުގައި ބުނެފައިވެ އެވެ.
އެފަދަ ފަރާތްތަކަށް އެހީ ދޭނީ ރާއްޖޭގެ ކޮލިފިކޭޝަން އޮތޯރިޓީން ގަބޫލުކުރާ ގައުމީ އޮނިގަނޑުގައިވާ ލެވެލް 4 އިން ފެށިގެން 10 ގެ ނިޔަލަށް ހިމެނޭ ކޯހެއްގައި ކިޔަވަމުންދާ ދަރިވަރަކަށްވާ ނަމަ ކަމަށެވެ. އަދި ސްޕޮންސަރެއްގެ އެހީގައި ކިޔަވަމުން ދަނިކޮށް ރިޕީޓްވެ، ފެއިލްވެފައިވާ ދަރިވަރެއް ކަަމުގައި ވެގެން ނުވާނެ ކަމަށް ވެސް ބުނެފައިވެ އެވެ.
އެހެންނަމަވެސް ފެއިލްވި ސަބަބާއި ދަރިވަރުގެ ހާލަތަށް ބަލައި ވަރަށް ހާއްސަ ހާލަތެއް ސީދާ ދަރިވަރުގެ އަމިއްލަ ނަފްސަށް މެދުވެރިވެފައިވާކަން ސާބިތުކޮށްދިނުމުން އެހީ ހަމަޖައްސައިދިނުމާމެދު ގޮތެއް ކަނޑައެޅުމުގެ އިހުތިޔާރު ކޮމިޓީއަށް ލިބިގެންވާ ކަމަށެވެ.
