ބޯކޮށް ވާރޭވެހުމާއި އުދައެރުމުން ފެންބޮޑުވި 6 ރަށެއްގައި ސިފައިން ހަރަކާތްތެެރިވަނީ
ބޯކޮށް ވާރޭވެހުމާއި އުދައެރުމުގެ ސަބަބުން މިހާތަނަށް 6 ރަށެއްގައި ފެންބޮޑުވެފައިވާ ކަމުގެ ރިޕޯޓު ލިބިފައިވާ ކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފި އެވެ.
އެންޑީއެމްއޭއިން މިއަދު "އެކްސް" ގައި ކުރި ޕޯސްޓެއްގައި ބުނީ ބޯކޮށް ވާރޭވެހުމާއި އުދައެރުމުގެ ސަބަބުން މިހާތަނަށް 6 ރަށެއްގައި ފެންބޮޑުވެފައިވާ ކަމުގެ ރިޕޯޓު ލިބިފައިވާ ކަަމަށެވެ.
އުދައަރައިގެން ރިޕޯޓުކުރީ ށ. ނަރުދޫ އަދި ރ. އިނގުރައިދޫން ކަމަށާއި ވާރޭވެހި ފެންބޮޑުވެގެން ދ. ކުޑަހުވަދޫ އާއި އެ އަތޮޅު މީދޫ އަދި ފ. ނިލަންދޫ އާއި އެ އަތޮޅު މަގޫދޫން ރިޕޯޓުކޮށްފައިވާ ކަމަށެވެ.
ބައެއް ރަށްރަށުގައި ފެން ހިންދުމުގެ މަސައްކަތުގައި ސިފައިން ހަރަކާތްތެރިވަމުން އަންނަ ކަމަށެވެ.
ނަރުދޫއަށް އުދައަރައި ރަށު ތެރޭގައި ފެންބޮޑުވެފައިވާތީ އެހީތެރިކަން ފޯރުކޮށްދިނުމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ނޮދަން އޭރިއާ ކޮމާންޑްގެ ޓީމެއް މިއަދު ހެނދުނު އެ ރަށަށް ގޮސްފައިވެ އެވެ.
އަދި ނިލަންދޫ އާއި ކުޑަހުވަދޫއަށް ބޯކޮށް ވާރޭވެހި މަގުތަކުގައި ފެންބޮޑުވުމާ ގުޅިގެން ފެން ހިންދުމުގެ މަސައްކަތުގައި އެހީތެރިވާން އެމްއެންޑީއެފް ސެންޓްރަލް އޭރިއާ ކޮމާންޑުން ދަނީ ހަރަކާތްތެރިވަމުންނެވެ.
އޭގެ އިތުރުން މާމިގިއްޔަށް ބޯކޮށް ވާރޭވެހި ބައެއް ގޭގޭގައި ފެންބޮޑުވެގެން، އެހީތެރިކަން ފޯރުކޮށްދިނުމުގައި އެމްއެންޑީއެފް މާލެ އޭރިއާ ކޮމާންޑާއި އދ. މާމިގިލި ފަޔަ ސްޓޭޝަނުގެ ސިފައިން އަންނަނީ ހަރަކާތްތެރިވަމުންނެވެ.
އެންޑީއެމްއޭއިން ބުނި ގޮތުގައި ރަށްތަކުގައި ފެންބޮޑުވި ހާދިސާތަކުގައި ބޯހިޔާވަހިކަން ގެއްލި، އިންސާނީ އެހީތެރިކަން ފޯރުކޮށްދޭން ޖެހިފައި ނުވާ ކަަމުގަ އެވެ.
