މާލޭގައި ފެންބޮޑުވެފައިވާތީ މަގު މައްޗަށް ކުނި ނުނެރެން އިލްތިމާސްކޮށްފި
ރާއްޖެއަށް މިހާރު ކުރަމުންދާ ވިއްސާރަ އާ ގުޅިގެން ގޭގެއިންނާއި ވިޔަފާރިތަކުން މަގުމައްޗަށް ކުނި ނުނެރުމަށް ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން އިލްތިމާސްކޮށްފި އެވެ.
ވެމްކޯއިން މިރޭ ނެރުނު ބަޔާނެއްގައި ބުނީ ރާއްޖެއަށް ކުރަމުންދާ މިދާ ވިއްސާރަ އާ ގުޅިގެން ދިމާވަމުންދާ ދަތިތަކާ އެކު އެ ކުންފުނިން ފޯރުކޮށްދެމުންދާ ހިދުމަތްތަކަށް ބުރޫ ނާރާނެހެން ހިދުމަތް ދިނުމަށް ދަނީ މަސައްކަތް ކުރަމުން ކަމަށެވެ. މި ހާލަތުގައި ގޭބީސީތަކުންނާއި ވިޔަފާރިތަކުން ކުނި ނެރުމުގައި ހާއްސަ ސަމާލުކަމެއް ދިނުމަށް އެ ކުންފުނިން ވަނީ އެދިފަ އެވެ.
"އެގޮތުން، ކުނި ނެރުމަށް ކަނޑައެޅިފައިވާ ގަޑިތަކުގައި ފަސޭހައިން ކުނި ނެގޭނެ ގޮތަށް ބެހެއްޓުމަށާއި މަގުމައްޗަށް ކުނި ނުނެރުމަށް އެދެމެވެ،"
އެގޮތަށް އަމަލުކުރާއިރު، ކުނި ނުނެގިހުރި ނަމަ އެ ކުންފުނީގެ ހޮޓްލައިން 1666 އަށް ގުޅައި އެކަން ރިޕޯޓު ކުރުމަށް ވެމްކޯއިން ވަނީ އެދިފަ އެވެ.
ވެމްކޯއިން ވަނީ ޓްރާންސްފާ ސްޓޭޝަންތަކުގެ ހިދުމަތް ހޯދާއިރު، ސަލާމަތްތެރިކަމާ ރައްކާތެރިކަން ކަށަވަރުކުރަން އެ ކުންފުނީގެ މުވައްޒަފުންގެ އިރުޝާދުތަކަށް ސަމާލުވުމަށް އިލްތިމާސްކޮށްފަ އެވެ.
ވިއްސާރައިގެ ސަބަބުން މާލޭގެ މަގުތަކުގައި ފެން ބޮޑުވެ، ބައެއް ގޭގެއަށް ފެން ވަނުމުގެ ހާދިސާތައް ހިނގަމުންދާތީ ފުލުހުން ވަނީ މަގުތަކުގައި ބަރު އުޅަނދު ނުދުއްވުމަށް އިލްތިމާސްކޮށްފަ އެވެ.
މަގުތަކުން ފެން ހިނދި އާންމު ހާލަތަށް މަގުތައް އަންނަންދެން ޒަރޫރީ ބޭނުންތަކުގައި ނޫންގޮތަކަށް ހަތަރު ފުރޮޅުލީ އުޅަނދުތައް ވެސް ނުދުއްވުމަށް އެދިފައިވެ އެވެ.
