ގްރޫމްކުރި ޓީޗަރު ދޫކޮށްލި އަމުރު ބާތިލުކޮށް، ބަންދުކުރަން އަމުރުކޮށްފި
ދަރިވަރުންތަކަކާމެދު ޖިންސީ އަމަލު ހިންގާ, އެ ކުދިން ގްރޫމްކުރި ކަމަށް ބުނާ މައްސަލާގައި ހިމެނޭ ޓީޗަރު ދޫކޮށްލި އަމުރު ބާތިލުކޮށް, ބަންދުކުރަން ހައިކޯޓުން އަމުރުކޮށްފި އެވެ.
ސައުތު ސެންޓްރަލް ޕޮލިސް (މ, ފ, ދ, ތ, ލ) ގައި ހިމެނޭ ރަށެއްގެ ސްކޫލް ފިރިހެން ދަރިވަރުންގެ އުމުރާ ނުގުޅޭ ވާހަކަ ދައްކާ, ގްރޫމް ކުރި ކަމަށް ތުހުމަތު މައްސަލައެއް ފުލުހުން ބަލަން ފެށީ މިދިޔަ އޮކްޓޫބަރު މަހުގެ 17 ވަނަ ދުވަހު އެވެ.
މައްސަލަ އާ ގުޅިގެން މީޑިއާތަކަށް ފުލުހުން މީގެކުރިން ފޮނުވި މެސެޖެއްގައި ބުނީ ހައްޔަރުކޮށްފައިވަނީ އުމުރުން 29 އަހަރުގެ ދިވެހި ފިރިހެނެެއް ކަމަށެވެ. ކުޑަކުދިންނާ ގުޅޭ މައްސަލަތަކަކީ ސީރިއަސް މައްސަލަތަކަކަށް ވާތީ ކުޑަކުދިންގެ އައިޑެންޓިޓީ ރައްކާތެރިކުރުމުގެ ގޮތުން ފުލުހުން މައްސަލާގައި ހިމެނޭ ޓީޗަރުގެ ވަނަވަރު ހާމައެއް ނުކުރެ އެވެ.
އެ މައްސަލާގައި ކޯޓު އަމުރެއްގެ ދަށުން އޭނާ އޮކްޓޫބަރު މަހުގެ 27 ވަނަ ދުވަހު ހައްޔަރުކޮށް, އެންމެ ފުރަތަމަ ބަންދުކުރީ 20 ދުވަހުގެ މުއްދަތަކަށެވެ. އެ މުއްދަތު ހަމަވުމުން 30 ދުވަހަށް އޭނާގެ ބަންދަށް އިތުރުކުރި އެވެ.
އެ 30 ދުވަހުގެ މުއްދަތު މިދިޔަ މަހުގެ 17 ވަނަ ދުވަހު ހަމަވާތީ އެ މެޖިސްޓްރޭޓް ކޯޓަށް (ކޯޓު ސިއްރުކުރެވިފައި) ހާޒިރުކުރުމުން ޝަރުތުތަކަކާ އެކު އޭނާ ވަނީ ދޫކޮށްލާފަ އެވެ.
އޭނާ ބަންދުން ދޫކޮށްލަން އަމުރު ނެރުނުއިރު، އޭނާއަށް ދައުވާކުރަން ޕްރޮސެކިއުޓާ ޖެނެރަލް (ޕީޖީ) އޮފީހަށް ފުލުހުން އޮތީ ހުށަހަޅާފަ އެވެ.
އެ މައްސަލައަކީ ޕްރައިމަރީ ޓީޗަރެއްގެ ގޮތުގައި ހުރެ, އެ ސްކޫލުގެ 18 އަހަަރުން ދަށުގެ ފިރިހެން ކުދިންތަކަކާމެދު އޭނާ ޖިންސީ އަމަލު ހިންގި ކަމަށް ތުހުމަތުކޮށް ހެކިތައް ހުށަހަޅާފައިވާ މައްސަލައެކެވެ. އަދި ޖިންސީ އަމަލު ހިންގުމަށް ޓަކައި މީގެ ތެރެއިން ގިނަ ކުދިންތަކެއް ގްރޫމްކޮށް, އެ ކުދިންނާއެކު ޖިންސީ އެކި ޒާތުގެ ވާހަކަ ދައްކައި, މަކުނުބަލީގެ ފޮޓޯ އޭގެ ތެރެއިން ކުއްޖަކަށް ފޮނުވާ ހެދި ކަމަށް ތުހުމަތުކޮށް ހެކި ހުށަހަޅާފައިވާ ކަމަށް އެ ގަޒިއްޔާއިން އެނގެ އެވެ.
ޝަރުތުތަކަކާ އެކު ޓީޗަރު ބަންދުން ދޫކޮށްލަން ނިންމި އަމުރަކީ ޝަރުއީ އަދި ގާނޫނީ އުސޫލުތަކާ ހިލާފަށް ނިންމާފައިވާ ނިންމުމެއް ކަމަށް ބުނެ, އެ ނިންމުން އިސްތިއުނާފުކުރުމަށް އެދި ޕީޖީ އޮފީހުން ހައިކޯޓަށް މައްސަލަ ހުށަހެޅި އެވެ.
ބަންދުން ދޫކޮށްފައި ހުރެއްޖެނަމަ، ޓީޗަރުގެ ފަރާތުން ހެކިންނަށް ނުފޫޒު ފޯރުވުމުގެ އިހްތިމާލާއި މުޖުތަމައުގެ ސަލާމަތަށް ނުރައްކާ އޮތް މީހެއް ކަމަށް ކަނޑައަޅައި, ބަންދުން ދޫކޮށްލި އަމުރު ބާތިލުކޮށް, އޭނާއަކީ ބަންދުގައި ބަހައްޓަން ޖެހޭ މީހެއް ކަމަށް ކަނޑައަޅައިދިނުމަށް އެ އިސްތިއުނާފުގައި ދައުލަތުން އެދިފައިވެ އެވެ.
އޭގެ އިތުރުން ކުޑަކުދިންނަށް ޖިންސީ ގޯނާކުރާ މީހުންނާމެދު ހާއްސަ އުސޫލުތަކަކަށް އަމަލުކުރުމުގެ ގާނޫނުގެ ދަށުން އޭނާ 7 ދުވަހަށް ބަންދުކުރުމުގެ އަމުރެއް ނެރެދިނުމަށްވެސް ހައިކޯޓުގައި ދައުލަތުން އެދުނެވެ.
އެ މައްސަލާގެ ރިޔާސަތު ބެއްލެވި ފަނޑިޔާރު މުހައްމަދު ނިޔާޒުގެ ރައުޔުގައި ވިދާޅުވީ ޓީޗަރު ޝަރުތުކޮށް ދޫކޮށްލި އަމުރަކީ ބާތިލު އަމުރެއް ކަމަށް ނިންމުމާއެކު، 7 ދުވަހަށް ބަންދުކުރުމަށް އަމުރު ކުރާ ކަމަށެވެ. އެ ރައުޔަށް ފަނޑިޔާރު މުހައްމަދު ފައިސަލާއި ފަނޑިޔާރު ހަސަން ޝަފީއު ތާއީދުކުރެއްވި އެވެ.
އެގޮތުގެ މަތިން ހުކުމްކޮށްފައިވަނީ އެ 7 ދުވަހުގެ މުއްދަތުގެ ތެރޭގައި އޭނާގެ ބަންދާމެދު ގޮތް ނިންމުމަށް ޕީޖީން މެޖިސްޓްރޭޓް ކޯޓަށް އަލުން ހުށަހެޅުމަށެވެ. އަދި އެ ގަޒިއްޔާގައި ކަނޑައަޅާފައިވާ ގޮތަށް ޓީޗަރުގެ ބަންދާމެދު އަލުން ގޮތް ކަނޑައަޅަން ޖެހޭ ކަމަށް ހައި ކޯޓުގައި އެ މައްސަަލަ ބެލި ފަނޑިޔާރުންގެ ބެންޗުން އިއްތިފާގުވާ ކަމަށް ވެސް ހުކުމުގައި ބުނެފައިވެ އެވެ.
