ކައުންސިލަރުން މަދުނުކޮށް ޕާޓް ޓައިމް ކުރަން ރައީސް އެއްބަސްވެވަޑައިގެންފި
ހަރަދު ކުޑަކުރުމުގެ ގޮތުން ކައުންސިލްތަކުގެ ރައީސާއި ނައިބު ރައީސް ފިޔަވާ ދެން ތިބޭ މެންބަރުންނަކީ ޕާޓް ޓައިމް މަގާމަށް ބަދަލުކުރައްވަން ރައީސް ޑރ މުހައްމަދު މުއިއްޒު މިރޭ ހިޔާލު ހުށަހަޅުއްވައިފި އެވެ.
ރައީސްގެ ވިސްނުންފުޅު މީގެ ކުރިން އޮތީ ކައުންސިލަރުން މަދުކުރުމަށެވެ. ޖުލައި 7، 2024 ގައި ރާއްޖޭގެ ރަށްރަށުގައި ދިރިއުޅޭ ބިދޭސީންގެ މައުލޫމާތު އެއްކުރުމަށް ފަށާފައިވާ "ކުރަނގި އޮޕަރޭޝަން"ގެ ދެވަނަ ފިޔަވަހި އިފުތިތާހު ކުރުމަށް ބޭއްވި ޖަލްސާގެ ޕޯޑިއަމްގައި ރައީސް ހިޔާލު ހުށަހެޅުއްވީ 3000 އަށް ވުރެ މަދު އާބާދީތަކުގެ ރަށްރަށުގައި 3 ކައުންސިލަރުން ތިބޭ ގޮތަށް ހަމަޖެއްސުމަށް ލާމަރުކަޒީ ނިޒާމާ ގުޅޭ ގޮތުން ދިރާސާއެއް ހެއްދެވުމަށެވެ.
ނަމަވެސް ކައުންސިލަރުން މަދުކުރުމަކީ މަޝްވަރާއިން ކަންކަން ނިންމުމުގެ މަގްސަދު ގެއްލޭނެ ކަމަށް ބުނެ އިދިކޮޅު އެމްޑީޕީއާ ޑިމޮކްރެޓްސް އިން ކަންބޮޑުވުން ފާޅުކުރި އެވެ.
ހަރަދު ކުޑަކުރާނަމަ، ރައީސާއި ނައިބު ރައީސް ފިޔަވައި ބާކީ ކައުންސިލަރުންނަކީ ހަމައެކަނި ކައުންސިލުގެ ބައްދަލުވުންތަކަށް ހާޒިރުވާންޖެހޭ ބަޔަކަށް ހަދާފައި، ޖަލްސާ އެލަވަންސް ދޭ ބަޔަކަށް ހެދިދާނެ ކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެންބަރު އަދި ޑިިމޮކްރެޓްސްގެ ލާމަރުކަޒީ ކޮމިޓީގެ ޗެއާ މުހައްމަދު ވަހީދު (ވައްޑެ) ވިދާޅުވެފައިވެ އެވެ.
ހުވަދޫ އަތޮޅަކަށް ކުރައްވަމުން ގެންދަވާ ދަތުރުފުޅުގެ ތެރެއިން ގދ ފިޔޯރީގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ ކައުންސިލުތަކުގެ ސައިޒް ކުޑަކޮށްފިނަމަ 'ޑިމޮކްރެޓިކް ރިޕްރެޒެންޓޭޝަން' އަށް އަސަރުކުރުން ކަމުގެ ކަންބޮޑުވުން އޮތުމުން، އެމަނިކުފާނު ހުށަހަޅުއްވާ ހިޔާލަކީ ކައުންސިލަރުންގެ އަދަދު މަދުނުކޮށް ފުލްޓައިމްކޮށް ތިބޭނީ 2 ކައުންސިލަރުން ކަމަށް ކަނޑައެޅުން ކަމަށެވެ.
".. އަޅުގަނޑަށް ފެންނަ ގޮތަކީ، އިންތިހާބުގައި ފުލްޓައިމް މަގާމަކަށް އިންތިހާބުކުރާނީ ކައުންސިލުގެ ރައީސްގެ މަގާމަށާއި ކައުންސިލުގެ ނައިބު ރައީސްގެ މަގާމަށް، ކަނޑައަޅައި ދެން ހަމަ މިހާރުވެސް ތިބި އަދަދަށް ކައުންސިލަރުން އިންތިހާބުކުރާނީ ނަމަވެސް އެއީ ކޮންމެ ޖަލްސާއަކަށް ވަކި އެލަވެންސެއް ލިބޭ ގޮތަށް ސިޓިން އަށް އެލަވެންސް ދޭ ގޮތަށް" ރައީސް ވިދާޅުވި އެވެ.
އެމަނިކުފާނު ވިދާޅުވީ އެ ދެ މަގާމަށް ފުލްޓައިމްކޮށް ކަނޑައަޅަން އެންމެ ފަސޭހަގޮތަކީ ރައީސްކަމަށް ކުރިމަތިލާ މީހާގެ ރަނިން މޭޓެއްގެ ގޮތުގައި ނައިބު ރައީސް ކުރިމަތިލުން ކަމަށެވެ.
"އޭރުން އެއް ސިޔާސީ ފިކުރެއްގެ ދެ މީހުން ހޮވުމުގެ ފުރުސަތު ލިބޭނެ" ވިދާޅުވި އެވެ.
އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑީސީ) ގައިވެސް ހަމަ އެގޮތަށް ބަދަލުކުރެވިދާނެ ކަމަށް ރައީސް ވިދާޅުވި އެވެ.
ރައީސް މުއިއްޒު ދެކިވަޑައިގަންނަވާ ގޮތުގައި އެގޮތަށް ބަދަލުކުރެވިއްޖެނަމަ ކައުންސިލުގެ ހަރަދު ކުޑަކުރެވޭނެ އެވެ. އެއަށް ފަހު އެކަމުގައި ރައްޔިތުންނަށް ހިޔާލަށް އެދިވަޑައިގެންނެވި އެވެ.
ޕަބްލިކް ޑިބޭޓް ކުރުމަކީ އެދޭގޮތް. މިގޮތަށް މިކަން ކުރެވިއްޖެނަމަ ހަރަދު ކުޑަކުރެވުނީ. ވަރަށް ރާއްޖެއަށް އެކަށީގެންވާ ކަމެއް. މަޝްވަރާ ކުރަން.
މަޝްވަރާކޮށް އެންމެ އެކަށީގެންވާ ގޮތަށް ހައްލު ގެނައުމަކީ އެންމެ ރަނގަޅު ގޮތް ކަމަށް ވިދާޅުވި އެވެ.
Ads by STO
