ރަސްމީ ދަތުރެއްގައި ޑިފެންސް މިނިސްޓަރު ގައްސާން އިންޑިއާއަށް ވަޑައިގެންފި
ރަސްމީ ދަތުރެއްގައި ޑިފެންސް މިނިސްޓަރު މުހައްމަދު ގައްސާން މައުމޫން އިންޑިއާއަށް މީގެ އިރުކޮޅެއް ކުރިން ވަޑައިގަންނަވައިފި އެވެ.
އިންޑިއާގެ ވެރިރަށް ދިއްލީއިން ގައްސާނު އަށް މަރުހަބާ ދެންނެވީ އެ ގައުމުގެ ޑިފެންސް މިނިސްޓަރު ރަޖްނާތް ސިންގްހު އެވެ. ގައްސާނަށް އިންޑިއާއިން ހޫނު މަރުހާބައެއް ވަނީ ދަންނަވާފަ އެވެ.
އިންޑިއާ ސަރުކާރުން އިއްޔެ ނެރުނު ބަޔާނެއްގައި ބުނީ ގައްސާނު، 3 ދުވަހަކަށް ކުރައްވާ ރަސްމީ ދަތުރުގައި އިންޑިއާގެ ޑިފެންސް މިނިސްޓްރު ރަޖްނާތުއާ މިއަދު ބައްދަލުކުރައްވަން ހަމަޖެހިފައިވާ ކަމަށެވެ.
އެ ބައްދަލުކުރެއްވުމުގައި ދެގައުމުގެ ދެމެދުގައި ދިފާއީ ދާއިރާއިން ގުޅުން ބަދަހިކުރުމާ ބެހޭގޮތުން މަޝްވަރާކޮށް ކުރުމަށް ވަނީ ހަމަޖެހިފަ އެވެ. އެ ބައްދަލުވުމުގައި ތަމްރީނާއި ޖޮއިންޓް އެކްސަސައިޒްތަކާއި، ދިފާއީ މަޝްރޫއުތައް އަދި ވޯކްޝޮޕްތަކުގެ އިތުރުން ރާއްޖޭގެ ގައުމީ ދިފާއީ ބާރު ހަރުދަނާ ކުރުމަށް ބޭނުންވާ ދިފާއީ އާލާތްތައް ފޯރުކޮށްދިނުމާ ގުޅޭ ގޮތުން މަޝްވަރާ ކުރުމަށް ހަމަޖެހިފައިވާ ކަމަށް އިންޑިއާއިން ބުންޏެވެ.
އިންޑިއާ ސަރުކާރުން ނެރުނު ބަޔާނުގަިއ ބުނީ އިންޑިއާ ކަނޑުގެ ސަރަޙައްދު (އައިއޯއާރު)ގައި ހަމަޖެހުމާއި ތަނަވަސްކަން ކުރިއެރުވުމަށް އިސްކަންދޭ އިންޑިއާގެ "ނެއިބަހުޑް ފަސްޓް" ސިޔާސަތުގައި ރާއްޖެއަށް ހާއްސަ ޖާގައެއްދޭ ކަމަށެވެ. މި ސަރަހައްދުގެ ސަލާމަތާއި ރައްކާތެރިކަން ކަށަވަރުކުރުމުގައި ދެ ގައުމުންވެސް މުހިންމު ދައުރެއް އަދާކުރާއިރު، އިންޑިއާގެ "ސެކިއުރިޓީ އެންޑް ގްރޯތް ފޯ އޯލް އިން ދަ ރީޖަން" (ސަގަރް) ގެ ތަސައްވުރަށް ރާއްޖޭގެ އެއްބާރުލުން ލިބޭ ކަމަށްވެސް ބުންޏެވެ.
ޑިފެންސް މިނިސްޓަރުގެ ހައިސިއްޔަތުން ގައްސާނު އިންޑިއާއަށް ކުރައްވާ ދަތުރުފުޅުގައި ވިޔަފާރީ ހަބު މުމްބާއީގެ އިތުުރުން ގޯއާއަށް ވަޑައިގަންނެވުމަށް ވަނީ ހަމަޖެހިފައި އެވެ
ގައްސާނު އިންޑިއާއަށް ވަޑައިގެންފައިވާއިރު، ފޮރިން މިނިސްޓަރު ޑރ. އަބްދުﷲ ހަލީލް ވަނީ އިންޑިއާއަށް ވަޑައިގެންފަ އެވެ.
ހަލީލުގެ ދަތުރުގައި އިންޑިއާގެ އެކްސްޓާނަލް އެފެއާޒް މިނިސްޓަރު ޖައިޝަންކަރާ ހުކުރު ދުވަހު ބައްދަލުކުރެއްވި އެވެ. އެ ބައްދަލު ކުރެއްވުމަށްފަހު "ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓްސްގެ ފޭސް 3" ގެ އެއްބަސްވުމުގަ ސޮއިކުރެއްވި އެވެ. އެ އެއްބަސްވުމުގެ ދަށުން ކުރިއަށް ގެންދާ ޕްރޮޖެކްޓްތަކަކީ ސީދާ ރައްޔިތުންނަށް އޭގެ ފައިދާ ކުރާ ގޮތަށް އަތޮޅުތަކުގައި ކުރިއަށްގެންދާ ޕްރޮޖެކްޓްތަކެކެވެ.
