އިންޑިއާއިން ރާއްޖެއަށް ދިނީ 4 މިލިއަން ޑޮލަރުގެ ދިފާއީ އާލާތް
އިންޑިއާއިން ރާއްޖޭގެ ގައުމީ ދިފާއި ބާރު (އެމްއެންޑީއެފް) އަށް ދިނީ 4 މިލިއަން ޑޮލަރުގެ ދިފާއީ އާލާތް ކަމަށް އިންޑިއާގެ ނޫސްތަކުން ބުނެފި އެވެ.
ރާއްޖޭގެ ޑިފެންސް މިނިސްޓަރު ގައްސާނު މައުމޫން އިންޑިއާއަށް ކުރައްވަމުން ގެންދަވާ ދަތުރާ ގުޅިގެން އިންޑިއާާގެ ޑިފެންސު ވިންގުން ނެރުނު ބަޔާނެއްގައި ބުނީ، ރާއްޖެއިން އެދިގެން ދިފާއީ އާލާތްތަކެއް ދީފައިވާ ކަމަށެވެ.
އިންޑިއާގެ ނޫހެއް ކަމަށްވާ "ވިއޯން"އިން ބުނީ އިންޑިއާއިން ހަދިޔާ ކުރީ އެމްއެންޑީއެފަށް ބޭނުންވާ ވެކިކަލްތަކާއި އަދި އެމްއެންޑީއެފްގެ ކަނޑުގެ އުޅަނދުތަކަށް ބޭނުންވާ ސަމާނު ކަމަށެވެ.
އެ ތަކެތީގެ އަގު ޖުމްލަ 4 މިލިއަން ޑޮލަރަށް އަރާނެ ކަމަށް ވެސް އެ ނޫހުން ބުނެފައިވެ އެވެ. އެކަމަކު އެއީ ހަދިޔާގެ ގޮތުގައި ދިން އެއްޗެހި ނުވަތަ ލޯނުގެ ގޮތުގައި ދިން އާލާތްތަކެއް ކަމެއް އެނގިފައެއް ނުވެ އެވެ.
ގައްސާން އިންޑިއާއަށް ކުރައްވަމުން ގެންދަވާ ދަތުރުފުޅުގައި އެ ގައުމުގެ ޑިފެންސް މިނިސްޓްރީގެ އިސް ބޭފުޅުންގެ ދެމެދުގައި މަޝްވަރާތަކެއް ވަނީ ކުރިއަށް ގެންގޮސްފަ އެވެ.
އެގޮތުން އިންޑިއާގެ އެހީގައި ކުރިއަށް ގެންދާ އުތުރު ތިލަފަޅުގެ ޕްރޮޖެކްޓްގެ ދުވެލި އަވަސްކުރަން މަޝްވަރާކުރިކަމަށް ވެސް ވިއޯން ނޫހުން ރިޕޯޓްކޮށްފައިވެ އެވެ.
އިންޑިއާގެ ޑިފެންސް މިނިސްޓަރު ރަޖްނާތު ވިދާާޅުވީ ރާއްޖޭގެ ގައުމީ ދިފާއީ ބާރުގެ ގާބިލުކަން އިތުރުކުރުމުގެ ގޮތުން، ތަމްރީނާއި، ގަވާއިދުން ކުރިއަށްގެންދާ ޑްރިލްތަކާއި، ވޯކްޝޮޕްތައް އަދި ސެމިނާތަކުގެ އިތުރުން ދިފާއީ އާލާތްތައް ސަޕްލައި ކުރުން ފަދަ ހުރިހާ ދާއިރާއަކުން ވެސް އިންޑިއާއިން ރާއްޖެއަށް ކެޕޭސިޓީ ބިލްޑިން އިތުރުކުރަން މަގުތައް ފަހިކޮށްދެމުންދާނެ ކަމަށެވެ.
Ads by STO
