ހޯމައިގެ ކުރިން ބޭރު ފައިސާ މާރުކުރަން ރަޖިިސްޓްރީކުރަން ޖެހޭނެ
އަންނަ ހޯމަ ދުވަހުގެ ކުރިން ބޭރު ފައިސާ މާރުކުރަން ރަޖިސްޓްރީކުރަން ޖެހޭނެ ކަމަށް މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިރޭ ބުނެފި އެވެ.
ބޭރު ފައިސާއާބެހޭ ގާނޫނުގެ ދަށުން އެމްއެމްއޭގައި ރަޖިސްޓަރީކުރުމާބެހޭ އުސޫލުތައް ބަޔާންކޮށް "ބޭރު ފައިސާއާބެހޭ ގާނޫނުގެ ދަށުން ރަޖިސްޓަރީކުރުމުގެ ގަވާއިދު" ގެޒެޓްކުރީ މިއަދު އެވެ.
ބޭރު ފައިސާގެ ގާނޫނުގެ ދަށުން ރަޖިސްޓަރީކުރަން ޖެހެނީ، ޓޫރިޒަމް ދާއިރާގެ މުއްދާ ވިއްކާ ފަރާތްތަކާއި ހިދުމަތް ފޯރުކޮށްދޭ ފަރާތްތަކުންނާއި، މީލާދީ އަހަރެއްގެ ތެރޭގައި ބޭރު ފައިސާއިން މަދުވެގެން 15 މިލިއަން އެމެރިކާ ޑޮލަރަށް ނިސްބަތްވާ އަދަދެއް ލިބޭ ފަރާތްތަކުންނެވެ.
އެ ގާނޫނު ފާސްކުރުމުގެ ކުރިން ވެސް ބޭރު ފައިސާ މާރުކުރަން ޖެހޭ ގޮތަށް ގަވައިދެއް ހަދައި ރަޖިސްޓްރީ ކުރަން ހުޅުވާލި އެވެ.
އެމްއެމްއޭއިން ބުނީ ކުރިން އޮތް ގަވައިދުގެ ދަށުން ރަޖިސްޓްރީ ނުކުރާ ފަރާތްތަކުން އަންނަ ހޯމައިގެ ކުރިން ރަޖިސްޓްރީކުރަން ޖެހޭނެ ކަމަށެވެ.
އަދި މި މަހުގެ އެއްވަނަ ދުވަހުން ފެށިގެން އެ ދާއިރާގައި ވިޔަފާރި ފަށާ ފަރާތްތަކުން ރަޖިސްޓަރީކުރަން ޖެހެނީ އެފަރާތްތަކުން ވިޔަފާރި ފަށާ ތާރީހުން ފެށިގެން 30 ދުވަހުގެ ތެރޭގައިކަމަށް ވެސް އެމްއެމްއޭއިން ބުންޏެވެ.
ބޭރު ފައިސާ މާރުކުރަން ރަޖިސްޓްރީކުރަން ޖެހޭނީ އެމްއެމްއޭގެ ވެބްސައިޓުގައި ހުންނަ މޯލްޑިވްސް މަނިޓަރީ އޮތޯރިޓީ ފޮރިން އެކްސްޗޭންޖު ރެޖިސްޓްރޭޝަން ޕޯޓަލް މެދުވެރިކޮށެވެ.
ބޭރު ފައިސާއާ ގުޅޭ ގާނޫނުގައި ވަނީ ބޭރު ފައިސާ މާރުކުރަން ޖެހޭ އުސޫލުތައް ސާފުކޮށް ބަޔާންކޮށްފަ އެވެ.
އެގޮތުން ކެޓަގަރީ 'އޭ' ގައި ހިމެނޭ ޓޫރިސްޓް ރިސޯޓްތަކާއި އިންޓަގްރޭޓަޑް ޓޫރިސްޓް ރިސޯޓްތަކާއި ފްރައިވެޓް އައިލެންޑްތަކާއި ރިސޯޓް ހޮޓާތަކާއި އެނޫންވެސް އެފަދަ ތަންތަނުން ބޭރު ފައިސާ ވަކިވަރަކަށް މާރުކުރަން ޖެހޭއިރު ކެޓަގަރީ 'ބީ' ގައި ހިމެނެނީ ޓޫރިސްޓް އުޅަނދުތަކާއި ޓޫރިސްޓް ހޮޓާތަކާއި ޓޫރިސްޓް ގެސްޓްހައުސްތަކުން ވެސް ކޮންމެވެސް ވަރަކަށް މާރުކުރަން ޖެހެ އެވެ.
ކެޓަގަރީ 'އޭ' އަށް ލިބޭ ފައިސާ މާރުކުރެވޭނެ ދެ ގޮތެއް ގާނޫނުގައި ބުނެފައިވެ އެވެ. އެއް ގޮތަކީ އެ ތަންތަނަށް އަންނަ ކޮންމެ ޓޫރިސްޓަކަށް 500 ޑޮލަރުގެ ރޭޓުން މާރުކުރުމާއި ކޮންމެ މަހެއްގެ ތެރޭގައި ލިބޭ ބޭރު ފައިސާގެ އާމްދަނީން 20 އިންސައްތަ މާރުކުރުމެވެ.
ކެޓަގަރީ 'ބީ' އަށް ލިބޭ ފައިސާ މާރުކުރެވޭނީ ކޮންމެ ޓޫރިސްޓަކަށް 25 ޑޮލަރުގެ ރޭޓުން ނުވަތަ ކޮންމެ މަހެެއްގެ ބޭރު ފައިސާގެ އާމްދަނީގެ 20 އިންސައްތައިން މާރުކުރަން ޖެހޭނެ ކަމަށް ބުނެފައިވެ އެވެ.
