ހުޅުމާލެ ފޭސް ދޭއްގެ ކަރަންޓު ސަބްސްޓޭޝަން މާލެ ގްރިޑާ ގުޅާލައިފި
ހުޅުމާލެ ފޭސް ދޭއްގައި ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން ގާއިމުކޮށްފައިވާ 132 ކިލޯ ވޯލްޓޭޖް ސަބްސްޓޭޝަނާއި ގްރޭޓާ މާލެ އިންޓަކަނެކްޝަން ގްރިޑާ ގުޅާލައިފި އެވެ.
ސްޓެލްކޯއިން އިއްޔެ ބުނީ އެ މަސައްކަތް ކުރުމަށް މިއަދު ހެނދުނު 6:00 އާއި 8:00 އާ ދެމެދު އެއްގަޑިއިރުގެ ވަގުތަކަށް މާލޭގެ ބައެއް ސަރަހައްދުތަކުންނާއި ހުޅުމާލޭގެ ބައެއް ސަރަހައްދުތަކުން ކަރަންޓު ކެނޑުމަކީ އެކަށީގެންވާ ކަމެއް ކަމަށެވެ.
ސްޓެލްކޯއިން މިއަދު "އެކްސް" ގައި ކުރި ޕޯސްޓެއްގައި ބުނީ ހައިވޯލްޓޭޖް ސަބްސްޓޭޝަނާއި އިންޓަކަނެކްޝަން ގްރިޑް ގުޅާލުމަށް ކުރިއަށް ގެންދިޔަ މަސައްކަތަށް މާލޭގެ 10 ސަރަހައްދަކުން ކަރަންޓުގެ ހިދުމަތް މެދުކަނޑާލަން ޖެހޭނެ ކަމަށް ކުރިން އަންދާޒާ ކުރެވުނު ކަމަށެވެ.
ނަމަވެސް މޫސުން ތަންދިނުމާ އެކު މަސައްކަތް އެއްކޮށް ނިންމާލެވިފައި ވަނީ މާލޭގެ ދެ ސަރަހައްދަކުން އެއްގަޑިއިރަށް ވުރެ މަދު ވަގުތުކޮޅަކަށް ކަރަންޓުގެ ހިދުމަތް މެދުކަނޑާލައިގެން ކަމުގައި އެ ކުންފުނިން ފާހަގަކުރި އެވެ.
ޓްރާންސްމިޝަން އެންޑް ޑިސްޓްރިބިއުޝަންގެ ޖެނެރަލް މެނޭޖަރު އިބްރާހިމް ނާޝިދު ވިދާޅުވީ ހުޅުމާލެ ފޭސް ދޭއްގައި ގާއިމުކުރެވިފައިވާ 132 ކޭވީގެ ގްރިޑް ސަބްސްޓޭޝަން ކޮމިޝަން ކުރުމަށް ފަހުގެ މަސައްކަތްތައް ފަށާފައި ވަނީ އިއްޔެގެ ހެނދުނުގެ ވަގުތެއްގައި ކަމަށެވެ. އެގޮތުން ސަބްސްޓޭޝަނުގެ މެއިން ކޭބަލެއް ޓެސްޓްކޮށް، ސަބްސްޓޭޝަނުގެ ބަސްބާ އެނަޖައިޒްކޮށް، މިއަދު ހެނދުނަށް ވާން ޖެހޭ ހުރިހާ ތައްޔާރީތައް ވެފައިވާ ކަމަށެވެ.
"އަޅުގަނޑުމެން މަސައްކަތް ފެށީ ހެނދުނު 6 ޖެހިއިރު. ފަށައިގެން އަޅުގަނޑުމެންނަށް ވަރަށް ސްމޫތްކޮށް އެ މަސައްކަތް ނިންމާލެވުނު 7:35 ގައި،" އިބްރާހިމް ވިދާޅުވި އެވެ.
އޭނާ ވިދާޅުވި ގޮތުގައި ސަބްސްޓޭޝަނާ ގުޅިގެން ދެން ކުރިއަށް ގެންދާނީ ފޭސް ދޭއްގައި ގާއިމުކޮށްފައިވާ 11 ކޭވީ ނެޓްވޯކުގެ ކޭބަލްތައް އެ ސްޓޭޝަނަށް ބަދަލު ކުރުމުގެ މަސައްކަތް ކަމުގަ އެވެ. އެ މަސައްކަތް ކުރިއަށް އޮތް ދުވަސްތަކުގައި ކުރަމުން ގެންދާނެ ކަމުގައި ފާހަގަކުރެއްވި އެވެ.
އެ މަސައްކަތް ކުރުމަށް ވާން ޖެހޭ ތައްޔާރީތައް ވުމަށް ފަހުގައި އެ ކުންފުނީގެ ކަސްޓަމަރުންނަށް މައުލޫމާތު ހާމަކުރަމުންދާނެ ކަމަށް އިބްރާހިމް ވިދާޅުވި އެވެ.
އިތުރަށް ވިދާޅުވީ ހައިވޯލްޓޭޖް ސަބްސްޓޭޝަނާއި އިންޓަކަނެކްޝަން ގްރިޑް ގުޅާލުމުގެ މަސައްކަތް ކާމިޔާބުކަމާ އެކު ނިންމާލެވިފައި ވަނީ ސްޓެލްކޯގެ އިންޖިނިއަރުންނާއި ކޮންޓްރެކްޓަރުންނާ އަދި ކަމުގައި ބައިވެރިވި ހުރިހާ ފަރާތްތަކުގެ ވަރަށް ބޮޑު އެހީތެރިކަމަކާ އެކު ކަމަށެވެ.
ސްޓެލްކޯއިން ވަނީ އެ ކުންފުނީގެ ހިދުމަތް އިތުރަށް ފުޅާކޮށް، ފުރިހަމަ ކުރުމަށް ކުރެވޭ މަސައްކަތްތަކުގައި ކަސްޓަމަރުންގެ ފަރާތުން ލިބޭ އެއްބާރުލުން ފާހަގަކޮށް ޝުކުރުއަދާކޮށްފަ އެވެ.
