ޑިމޮކްރެޓްސްގެ ރައީސް ހަސަން ލަތީފް އިސްތިއުފާ ދެއްވައިފި
ކުރީގެ ރައީސް މުހައްމަދު ނަޝީދު އިސްވެ ހުންނަވައި އުފެއްދެވި ދަ ޑިމޮކްރެޓްސްގެ ރައީސްކަމުގެ މަގާމުން ހަސަން ލަތީފް (ހަސަންކޮ) ރޭ އިސްތިއުފާ ދެއްވައިފި އެވެ.
ހެންވޭރު ހުޅަނގު ދާއިރާގެ ކުރީގެ މެންބަރު ހަސަން، ޑިމޮކްރެޓްސްގެ ރައީސްކަމުން އިސްތިއުފާ ދެއްވިކަން "ދެން" އަށް ވަނީ ޔަގީންކޮށްދެއްވާފަ އެވެ.
"ރޭގައި ވާނީ އިސްތިއުފާގެ ސިޓީ ފޮނުވާފައި" ހަސަން ވިދާޅުވި އެވެ.
އޭނާ އިސްތިއުފާ ދެއްވިއިރު، ޑިމޮކްރެޓްސްގެ ނައިބް ރައީސް މުހައްމަދު ޝިފާޒު ވަނީ އެ ޕާޓީގެ ނައިބްރައީސް ކަމުން އިސްތިއުފާދެއްވައި އަނބުރާ އެމްޑީޕީއާ ގުޅިވަޑައިގެންފަ އެވެ. އެމްޑީޕީއާ ގުޅޭނެތޯ ސުވާލުކުރުމުން ހަސަން އެއްޗެއް ވިދާޅެއް ނުވެ އެވެ. ނަމަވެސް މި ވަގުތު ހުންނެވީ އެއްވެސް ޕާޓިއެއްގައި ނޫން ކަމަށް ވިދާޅުވި އެވެ.
އެސްޓީއޯގެ ކުރީގެ މެނޭޖިން ޑިރެކްޓަރު ހުސައިން އަމްރު ރަޝާދު އަދި މެދުހެންވޭރު ދާއިރާގެ ކުރީގެ މެމްބަރު އަލީ އާޒިމްގެ އިތުރުން ގްރޭޓާ މާލެ އިންޑަސްޓްރިއަލް ޒޯން (ޖީއެމްއައިޒެޑްއެލް) ގެ ކުރީގެ އެމްޑީ އިބްރާހިމް ރަޝީދު (މާމިގިލި އިބޫ) ވެސް ވަނީ އެމްޑީޕީއަށް ސޮއިކޮށްފަ އެވެ.
