ސިހުރުގެ ތުހުމަތުގައި ރ މީދޫ އާއި އަލިފުށީގެ ގެތަކެއް ބަލައިފާސްކުރަނީ
ރ މީދޫ އާއި އެ އަތޮޅު އަލިފުށީގައި ސިހުރު ހަދާކަމުގެ ތުހުމަތުގައި ގެތަކެއް ބަލައިފާސްކުރުމުގެ ހާއްސަ އޮޕަރޭޝަނެއް ފުލުހުން ފަށައިފި އެވެ.
ކޯޓު އަމުރުގެ ދަށުން ފުލުހުން ގެތަކެއް ބަލައި ފާސްކުރަމުންދާކަން އިތުބާރު ހުރި ފަރާތަކުން ވަނީ "ދެން" އަށް ޔަގީންކޮށްދީފަ އެވެ.
މީދޫއިން "ދެން" އަށް ވާހަކަ ދެއްކި ބައެއް މީހުން ބުނީ މިއަދު ހެނދުނު 9 ޖަހާކަންހާއިރުން ފެށިގެން ފުލުހުން އެ ރަށުގެ ގެތައް ބަލައި ފާސްކުރަމުންދާ ކަމަށެވެ.
"5 ވަރަކަށް ގެ ބަލައިފާސްކުރި" އެ ރަށުން ވާހަކަ ދެއްކި މީހަކު ބުނީ މީގެ މަހެއްހާ ދުވަސްކުރިން ސިހުރުގެ މައްސަލަތަކެއް ރަށުގައި ފެންމަތިވި ކަމަށެވެ. އެއީ އެ ރަށުގެ ދެމަފިރިއަކު ދުރުކުރަން ސިހުރު ހެދި މައްސަލައެކެވެ.
މައްސަލަ އާ ގުޅިގެން ފުލުހުން ބުނީ ސިހުރު ހަދާ ކަމަށް ރިޕޯޓުކޮށްފައިވާ މައްސަލައަކާ ގުޅިގެން މީދޫ އާއި އަލިފުށީގައި އޮޕަރޭޝަނެއް ހިންގަމުންދާ ކަމަށެވެ. ކަމާ ގުޅުންހުރި މައުލޫމާތު ހިއްސާކުރާނެ ކަމަށް ވެސް ވަނީ ބުނެފަ އެވެ.
އެ އޮޕަރޭޝަންގައި އަދި މިހާތަނަށް މީހަކު ހައްޔަރުކޮށްފައިވާ ކަމެއް އެނގިފައެއް ނުވެ އެވެ.
މީދޫ އާއި އަލިފުށީގައި ސިހުރު ހަދާކަމުގެ ތުހުމަތުގައި ފުލުހުން ގެތަކެއް ބަލައިފާސްކުރަން ފަށާފައިވާއިރު، މިދިޔަ އަހަރު ފަހުކޮޅު ކެލާގައި ފުލުހުންގެ އޮޕަރޭޝަނެއް ކުރިއަށްގެންގޮސްފައިވެ އެވެ. އެ މައްސަލައާ ގުޅިގެން ބަޔަކު ހައްޔަރު ވެސް ކުރި އެވެ.
