އެލައިޑަށް 40 އަހަރު، ހާއްސަ ހަރަކާތްތައް ފަށައިފި
އެލައިޑް އިންޝުއަރަންސަށް 40 އަހަރު ފުރުން ފާހަގަކުރުމުގެ ގޮތުން ކ. ހިންމަފުށީގައި ކިކްއޯފް އިވެންޓެއް ކުރިއަށް ގެންގޮސްފި އެވެ.
"ޑައިވް40ގެ" ނަމުގައި އިއްޔެ ކުރިއަށް ގެންދިޔަ މި އިވެންޓުގައި ގިނަ ހަރަކާތްތަކެއް ވަނީ ކުރިއަށް ގެންގޮސްފަ އެވެ. އެގޮތުން މޯލްޑިވްސް އެކަޑެމީ އޮފް ޑައިވިންގ އާއި އެކު ކުރިއަށްގެންދިޔަ އެވެއަރނެސް ސެޝަން އާއި "ޑައިވް އަގެއިންސްޓް ޑެބްރީ" ގެ އިތުރުން ހިންމަފުށީ ކައުންސިލާއި ސްކޫލް އަދި ގެސްޓް ހައުސްތައް ގުޅިގެން ކުރިޔަށް ގެންދިޔަ ހިންމަފުށީ މަލަމަތި ސާފުކުރުމުގެ ހަރަކާތް ފާހަގަކޮށްލެވެ އެވެ. މި ތިން ހަރަކާތުގައިވެސް އެލައިޑުގެ މެނޭޖްމަންޓާއި މުވައްޒަފުން ވަނީ އަމަލީގޮތުން ބައިވެރިވެ، ޕްލާސްޓިކް މަދުކޮށް ކަނޑުތައް ރައްކާތެރިރުމުގެ އަމާޒަށް ގިނަ މަސައްކަތްތަކެއް ކޮށްފަ އެވެ.
އެލައިޑަށް 40 އަހަރު ފުރުމުގެ މުނާސަބަތުގައި ބާއްވާ ހަރަކާތްތަކުގެ ތެރެއިން ހިންމަފުށި ސާފު ކުރުމަށް ބޭއްވި، ޑައިވް40
ޑައިވް40 އާއި ބެހޭގޮތުން މައުލޫމާތު ހިއްސާކުރަމުން އެލައިޑުން ބުނި ގޮތުގައި އެލައިޑްގެ 40ވަނަ އަހަރީ ދުވަސް ފެށުން ވަރަށްވެސް ކާމިޔާބެވެ. އެގޮތުން ޑައިވް40 އަކީ ރަނގަޅު ނަތީޖާއެއް ނެރެވޭނެ އިވެންޓަކަށް ހެދުމަށްޓަކައި މަސައްކަތްކޮށްދެއްވި ހިންމަފުށީގައި ބޭސްވެފައި ތިއްބެވި އެންމެހާ ފަރާތްތަކާއި އެލައިޑް ޓީމުގެ އިތުރުން މިހަރާކާތުގައި ބައިވެރިވުމަށް މާލެއިން ދިޔަ ކުޅަދާނަ ޑައިވަރުންގެ ޓީމަށްވެސް ވަނީ ހާއްސަ ޝުކުރެއް ދަންނަވައިފަ އެވެ. އަދި ތިމާވެއްޓަށް ނޭދެވޭ ކުނި އެއްކުރުމުގެ މަސައްކަތުގެ ތެރެއިން ޑައިވް40ގައި 790.06 ކިލޯގެ ކުނި ކަނޑުންނާއި އެއްގަމުން އެއްކުރެވުނު ކަމުގައި އެކުންފުނިން ވަނީ ހާމަކޮށްފަ އެވެ.
އިއްޔެ ކުރެވުނު މަސައްކަތުން ތިމާވެއްޓަށް ގެއްއްލުން ލިބޭ ފަދަ ގިނަ ކުނި އެއްކުރުމަކީ ހިތްހަމަޖެހޭ ކަމެއް ކަމުގައިވީ ނަމަވެސް، މިކަމަކީ ކުރިއަށް ކުރަން އޮތް މަސައްކަތް ސިފަކޮށްދޭ ކަމެއްގެ ގޮތުގައި އެލައިޑުން ވަނީ ފާހަގަކޮށްފަ އެވެ. ސަބަބަކީ ޕްލާސްޓިކާއި ދުރުހެލިވުމަށް އިޖާބަ ދޭ، ހޭލުންތެރި މުޖުތަމައުއެއް އުފެއްދުމުގެ މުހިންމުކަން މިކަމުން ސާފުވެގެން ދިޔުމެވެ.
އެގޮތުން ހޭލުންތެރިކަން އިތުރު ކުރުމުގައި މަގުސަދުގައި ޑައިވް40 އިން އެއްކުރެވުނު ޕްލާސްޓިކް ކުނި ބޭނުންކޮށްގެން ދިވެހި ފަންނުވެރިއަކު ތައްޔާރުކުރާ ހާއްސަ އުފެއްދުމެއް، އަންނަ ފެބްރުއަރީގައި ބާއްވާ މޯލްޑިވްސް މެރިން އެކްސްޕޯ 2025 ގައި ފީޗަރކުރުމަށް އެލައިޑުން ވަނީ ނިންމައިފަ އެވެ. މިއީ އެއް މަޤްޞަދެއްގައި އެއްބަޔަކު އަނެއްބަޔަކާއި ގުޅިގެން މަސައްކަތްކޮށްފިނަމަ ޙާޞިލުކުރެވޭނެ ކަންތައްތަކުގެ ލާމަސީލު ރަމްޒެއްކަމުގައި ވާނެކަން އެލައިޑުން ފާހަގަކުރެ އެވެ.
އެލައިޑް އިންޝުއަރަންސްގެ އަހަރީ ދުވަހަކީ ޖަނަވަރީ 30 ވަނަ ދުވަހެވެ. މިދުވަހާއި ގުޅުވައިގެން ކޮންމެ އަހަރަކުވެސް އެކުންފުނިން ދަނީ ތަފާތު ގިނަގުނަ ހަރަކާތްތަކެއް ކުރިއަށް ގެންދަމުންއެވެ. އެހެންނަމަވެސް، އެހެން އަހަރުތަކާއި ހިލާފަށް، 40 އަހަރު ފުރޭ މުނާސަބަތާއި ގުޅުވައިގެން އަހަރުތެރެއަށް ބަހާލައިގެން، ރާއްޖޭގެ އެކި ކަންކޮޅުތަކުގައި މިއަހަރުގެ ހަރަކާތްތައް ކުރިއަށް ގެންދިޔުމަކީ އަމާޒެއްކަމުގައި އެލައިޑުން ފާހަގަކުރެ އެވެ. ސަބަބެއްގެ ގޮތުގައި އެލައިޑުން ވިދާޅުވީ ކުންފުނީގެ ތަރައްގީއަށް ރާއްޖޭގެ އެންމެހާ ރައްޔިތުން ދެމުންގެންދަވާ އިތުބާރާއި ޔަގީންކަމާއި އެކު، ކުންފުނިން ހޯދާފައިވާ 40 އަހަރުގެ ކުރިއެރުން ވީހާވެސް ގިނަ ރައްޔިތުންނާއި ހިއްސާކުރުމެވެ.
Ads by STO
