މާލޭގެ ބިމެއް ކޮންނަނިކޮށް ބޮޑު ބަޑިއެއް ފެނިއްޖެ
މާލޭގެ ބިމެއް ކޮންނަނިކޮށް ކުރީ ޒަމާނުގައި ބޭނުންކުރި "ބޮޑު ބަޑި" އެއް ފެނިއްޖެ އެވެ.
އެ ބަޑި ފެނިފައިވަނީ ކުރީގެ ހަބީބް ބޭންކް ހިންގި ޗާންދަނީމަގު 23 ނަމްބަރު ފިހާރަ ހުރި ބިމުގައި އިމާރާތެއް އެޅުމަށް އެ ބިން ރޭގެ ވަގުތެއްގައި ކޮންނަމުން ދަނިކޮށެވެ.
ހެރިޓޭޖް މިނިސްޓަރު އާދަމް ނަސީރު އިބްރާހިމް ވަނީ އެކަން "ދެން" އަށް ޔަގީންކޮށްދީފަ އެވެ.
މިނިސްޓަރު އާދަމް ނަސީރު މިއަދު ވިދާޅުވީ އެ ބަޑި ހެރިޓޭޖް މިނިސްޓްރީގެ ބެލުމުގެ ދަށަށް މިހާރު ގެންގޮސްފައިވާ ކަމަށެވެ.
އާދަމް ނަސީރު ވިދާޅުވީ އެ ވައްތަރުގެ ބަޑިތަކެއް ދަރުލް އާސާރުގައިވެސް އެބަހުރި ކަމަށެވެ. ބޮޑު ރަސްގެފާނުވެސް އޭގެ 14 ބޮޑު ބަޑި ބައްލަވައިގެންނެވި ކަމަށާއި، އެކަމަކު ފެނުނީ ސީދާ އެ ވައްތަރެއް ބަޑިތަކެއްކަން ޔަގީންނުވާ ކަމަށް މިނިސްޓަރު ވިދާޅުވި އެވެ.
"މިހާރުވެސް އަޅުގަނޑުމެންގެ ދާރުލް އާސާރުގަައި ހުރި އެހެރަ ވައްތަރުގެ ބަޑިކަމަށް އަޅުގަނޑަށް މައުލޫމާތު ލިބިފައި އޮންނަނީ. 7 ބަޑީގެ ސަލާން ޖެހުމަށްވެސް ބޭނުންކުރާ ބަޑިއެއް" އޭނާ ވިދާޅުވި އެވެ.
މިނިސްޓަރު ވިދާޅުވީ ފެނުނު ބަޑި އޮތީ ވަރަށް ބޮޑަށް ދަބަރު ޖަހާފައިވާ ކަމަށާއި، އެ ސާފުކުރުމުގެ މަސައްކަތް ފަށާނެ ކަމަށެވެ. އެއާ ބެހޭ އިތުރު މައުލޫމާތު އެނގޭނީ ދިރާސާތަކަށް ފަހު ކަމަށް ވިިދާޅުވި އެވެ.
އެއިން ބަޑިއެއް ގައި ދޮޅުޓަނު ހުންނާނެ އެވެ. މާލެއަށް ބަޔަކު އަރާފާނެތީ ދިފާއުވުމަށްޓަކައި މީގެ ކުރިން އެ ބަޑިތައް ބޭނުންކުރި އެވެ.
Ads by STO
