ކުރިއަށް އޮތް 5 ދުވަހުވެސް އޮތީ ބޯވާރޭ
ކުރިއަށް އޮތް 5 ދުވަހު އަނެއްކާވެސް ރާއްޖޭގެ މޫސުން ގޯސް ވާނެކަމަށް މޫސުމާ ބެހޭ އިދާރާ (މެޓް) އިން ލަފާކޮށްފި އެވެ.
މެޓް އޮފީހުން މިއަދު ހަވީރު ނެރުނު ބަޔާނެއްގައި ބުނީ މި ފަހަރު މޫސުން ގޯސްވާން ދިމާވަނީ ރާއްޖޭގެ އިރުން ހުޅަނގުދެކުނު ބޭ އޮފް ބެންގާލްގައި ކޮޅިގަނޑެއް އުފެދިގެން ކަމަށެވެ.
އެގޮތުން އެ ކޮޅިގަނޑު ހުޅަނގަށް ޖެހި ރާއްޖޭގެ ސަރަހައްދުގައި ބޯ ވިއްސާރަވިލާ އުފެދުމުގެ ފުރުސަތު ބޮޑުވާނެ ކަމަށް ލަފާކުރެވޭ ކަމަށް މެޓް އޮފީހުން ބުންޏެވެ.
އެހެންކަމުން މާދަމާއިން ފެށިގެން މި މަހުގެ 18 އާ ހަމައަށް ރާއްޖޭގެ ބޮޑު ބަޔަކަށް ވިއްސާރަ ކުރާނެ ކަމަށް ލަފާކުރެވޭ ކަމަށާއި އަދި ވިއްސާރައިގައި ބައެއް ރަށްތަކަށް ބޯކޮށް ވާރޭވެހުމާއެކު ގުގުރާނެ ކަމަށް މެޓް އޮފީހުން ލަފާކޮށްފައިވެ އެވެ.
އޭގެ އިތުރުން ވަޔާއި ކަނޑުތައް ގަދަވާނެ ކަމަށް ވެސް މެޓް އޮފީހުން ވަނީ ލަފާކޮށްފަ އެވެ.
"މީގެ އިތުރުން ހާއްސަކޮށް އުތުުރާއި މެދު ރާއްޖެތެރޭގެ މެދުރާއްޖެތެރޭގެ ބައެއް ރަށްތަކަށް އުދައިގެ އަސަރުކުރުމުގެ ފުރުސަތު އޮތްކަން ފާހަގަ ކުރެވެ އެވެ." މެޓުން ނެރުނު ބަޔާނުގައި ބުންޏެވެ.
އެހެންކަމުން މޫސުން ގޯސްވާނެ ކަމަށް ލަފާކޮށް މެޓް އޮފީހުން އެންމެފަހުގެ މޫސުން ލަފާކުރާގޮތާއި މޫސުމީ ސަމާލާއި އިންޒާރުތައް އަދި ގެއްލުން ކުޑަކުރުމަށް އަޅަންޖެހޭ ފިޔަވަޅުތަކަށް ސަމާލުވުމަށް އެ އިދާރާއިން ވަނީ އިލްތިމާސްކޮށްފަ އެވެ.
އެންމެ ފަހުން ރާއްޖެއަށް މޫސުން ގޯސްވީ އާ އަހަރު ފެށުމާ ދިމާކޮށެވެ. ބޮޑު ބަޔަކަށް ވިއްސާރަކޮށް ހާއްސަކޮށް މާލޭގައި ވަރަށް ބޮޑަށް ފެން ބޮޑުވެ ގެތަކަށް ގެއްލުންތަކެއްވި އެވެ.
Ads by STO
