މިދިޔަ އަހަރު 73،953 އުޅަނދު ޗެކްކޮށް، 15،514 އުޅަނދު ޓޯކުރި
ހުސްވި އަހަރު 73،953 އުޅަނދު ޗެކްކޮށް، 15،514 އުޅަނދު ޓޯކޮށްފައިވާ ކަމަށް ފުލުހުން ބުނެފި އެވެ.
ފުލުހުން އެހެން ބުނީ މަގުމަތީގެ ރައްކާތެރިކަން ކަށަވަރުކޮށް މަގުމައްޗަކީ އެންމެނަށް އަމާން ތަނަކަށް ހެދުމަށް މިދިޔަ އަހަރު އެ އިދާރާއިން ކޮށްފައިވާ މަސައްކަތްތައް ހިއްސާކޮށް "އެކްސް" ގައި ކުރި ޕޯސްޓެއްގަ އެވެ.
އާންމުކުރި ތަފާސް ހިސާބުން ދައްކާ ގޮތުން ނިމިދިޔަ އަހަރު 66،347 މީހުންނަށް ނަސޭހަތްތެރިވެފައިވާއިރު، 7،606 މީހަކަށް ވަނީ ވަޔަލޭޝަން ސްލިޕް ދޫކޮށްފައިވެ އެވެ.
ހުސްވި އަހަރު ޖުމްލަ 15،514 އުޅަނދު ވަނީ ޓޯ ކޮށްފަ އެވެ. އެއީ 11،645 ސައިކަލާއި 2،567 ކާރާއި 478 ޕިކަޕާއި 367 ވޭން އަދި 87 ޓްރަކެވެ. އޭގެ ތެރެއިން 13،562 އުޅަނދު އޭގެ ވެރިފަރާތާ ހަވާލުކުރިއިރު، 546 އުޅަނދު ނައްތާލާފައިވާ ކަމަށް ބުނެފައިވެ އެވެ.
މަގުމަތީގެ ރައްކާތެރިކަން ކަށަވަރުކުރުމަށް ކުރި މަސައްކަތުގައި ލައިސެންސް ނެތި ދުއްވި 2،138 މީހުން ހިފަހައްޓާފައިވާ ކަމަށް ފުލުހުން ބުންޏެވެ. އޭގެތެރެއިން 2،005 އުޅަނދަކީ ދެ ފުރޮޅުލީ އުޅަނދެވެ. އަދި 133 އުޅަނދަކީ ހަތަރު ފުރޮޅުލީ އުޅަނދެވެ.
ފުލުހުންގެ ރަސްމީ ވެބްސައިޓުގައި ޝާއިއުކުރި ލިޔުމެއްގައި ބުނީ އެކްސިޑެންޓުތައް ހިނގުމަކީ އެ އިދާރާއިން ނުހަނު ކަންބޮޑުވާ ކަމެއް ކަމަށެވެ. އެހެންކަމުން އެފަދަ ހާދިސާތައް މަދުކުރުމުގެ ގޮތުން ގިނަ ވަސީލަތްތައް ބޭނުންކޮށްގެން ހަރުދަނާ މަސައްކަތްތަކެއް ކުރެވިފައިވާކަން ފާހަގަކުރެ އެވެ. ހާއްސަކޮށް ނުރައްކާތެރި އެކްސިޑެންޓްތައް ހުއްޓުވުމަށް ވަކިން ހާއްސަ އޮޕަރޭޝަންތަކެއް ހިންގާފައިވާ ކަމަށް ފުލުހުން ބުންޏެވެ.
އެ މަސައްކަތުގެ ތެރެއިން ނުރައްކާތެރިކޮށް ދުއްވި މައްސަލާގައި 293 އުޅަނދު ހިފަހައްޓާފައިވެ އެވެ. އެއީ ދެ ފުރޮޅުލީ 271 އުޅަނދަކާއި ހަތަރު ފުރޮޅުލީ 22 އުޅަނދެކެވެ.
ފުލުހުންގެ އަމާޒަކީ މަގުމަތީގެ ސަލާމަތާއި ރައްކާތެރި ކަމަށް އާންމުން އިތުރަށް ހޭލުންތެރިކޮށް، ޓްރެފިކް ގަވާއިދުތަކަށް ހުރުމަތްތެރިކޮށް ހިތާ ރައްޔިތުންތަކެއް އުފެއްދުން ކަމަށް ފުލުހުން ބުންޏެވެ. އެކަން ހާސިލުކުރުމުގައި އާންމުންގެ އެއްބާރުލުން ވަރަށް މުހިންމު ކަމަށް ވެސް އެ އިދާރާއިން ވަނީ ފާހަގަކޮށްފަ އެވެ.
މިމަސައްކަތުން ލިބުނު ފައުސާވެސް ބުނެލިނަމަ!