25،000އަށްވުރެ ގިނަ ބިދޭސީންގެ ބަޔޮމެޓްރިކްސް ޑޭޓާ ނަގައިފި
ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި ފަހުން މިހާތަނަށް 25،000 އަށް ވުރެ ގިނަ ބިދޭސީންގެ ބަޔޮމެޓްރިކްސް ޑޭޓާ ނަގާފައިވާ ކަމަށް ހޯމް މިނިސްޓަރު އަލީ އިހުސާން މިރޭ ވިދާޅުވެއްޖެ އެވެ.
މި ސަރުކާރުން "ކުރަނގި" ނަމުގައި ހިންގާ އޮޕަރޭޝަނުގައި މިއަދު މާލެ ސަރަހައްދުގައި ބޮޑު ހަރަކާތެއް ކުރިއަށް ގެންދިޔަ އެވެ. މާލޭގެ އިތުރަށް ގުޅީފަޅު އަދި ތިލަފުށީގައި އޮޕަރޭޝަން ގެންދިޔައީ ހޯމް މިނިސްޓްރީގެ 75 މުވައްޒަފުން ބައިވެރިކޮށްގެނެވެ.
ހޯމް މިނިސްޓަރު އިހުސާން އެކްސްގައި ކުރެއްވި ޕޯސްޓެއްގައި ވިދާޅުވީ މިއަދުގެ ހަރަކާތުން ޖުމުލަ 1،455 ބިދޭސީންގެ 10 އިނގިލީގެ ނިޝާނާއި މޫނު އެނގޭނެ ވަރުގެ ފޮޓޯ ނަގައި ޑޭޓާބޭސްގައި ރައްކާކޮށް އަދާހަމަކޮށްފައިވާނެ ކަމަށެވެ.
ސަރުކާރަށް އަހަރު ފުރުނު ދުވަހުގެ ރޭ ރައީސް މުއިއްޒު ވަނީ 10،000 ބިދޭސީންގެ ބަޔޮމެޓްރިކް ޑޭޓާ ނެގުނު ކަން އިއުލާންކުރައްވައިފަ އެވެ. އެ ފަހުން މި ހިނގި ދެ މަސް ތެރޭގައި އިތުރަށް 15،000 އަށް ވުރެ ގިނަ ބިދޭސީންގެ މައުލޫމާތު ނެގިފައިވާ ކަމަށް މިނިސްޓަރު ވިދާޅުވި އެވެ.
"މުޅި އޮޕަރޭޝަނުގައި މިއަދާ ހަމައަށް 25،483 ބިދޭސީންގެ ބަޔޮމެޓްރިކް ޑޭޓާ ނެގިފައި،" އިހުސާން ވިދާޅުވި އެވެ.
މިނިސްޓަރު އިހުސާން ވިދާޅުވީ ރާއްޖޭގައި އުޅޭ ހުރިހާ ބިދޭސީންގެ އިނގިލީގެ ނިޝާނާއި މޫނުގެ ފޮޓޯ ނަގައި ބަޔޮމެޓްރިކްސް ޑޭޓާ ހަމަކުރުމަށް ފެށި އޮޕަރޭޝަން 2027ވަނަ އަހަރުގެ އޭޕްރީލް މަހަށް ނިންމައިލެވޭނެ ކަމަށް އުންމީދު ކުރައްވާ ކަމަށެވެ.
