ޕާކިސްތާނު ސިފައިންނަށް ދިން ހަމަލާގެ ޒިންމާ ބީއެލްއޭއިން ނަގައިފި
ޕާކިސްތާނުގެ ބަލޫޗިސްތާން ސަރަހައްދުގެ ކަލާތު ސިޓީގައި ޕާކިސްތާނު ސިފައިންގެ ގާފިލާއަށް ދިން ހަމަލާގެ ޒިންމާ ބަލޫޗިސްތާން ލިބަރޭޝަން އާމީ (ބީއެލްއޭ) އިން ނަގައިފި އެވެ.
ބީއެލްއޭގެ ތަރުޖަމާނު ޖީންދް ބަލޯޗް ބުނީ މިއަދު ހޯމަ ދުވަހު ހެނދުނު ކަލާތު ސިޓީގެ ސޫރާބް އަވަށުގައި ހިނގި މި ހަމަލާގައި ޕާކިސްތާނު ސިފައިންގެ ވެހިކަލްތަކަކަށް ގެއްލުން ލިބުނު ކަމަށެވެ.
ނަމަވެސް މި ހަމަލާގައި މަރުވި އަދި ޒަހަމްވި މީހުންގެ އަދަދު އަދި ޔަގީން ނުވާކަމަށް ޖީންދް ބުންޏެވެ.
މި ހާދިސާއާ ގުޅިގެން ބީއެލްއޭ އިން ނެރުނު ބަޔާނެއްގައި ބުނީ މި ހަމަލާއަކީ ބަލޫޗިސްތާނުގައި ޕާކިސްތާނު ސަރުކާރުން ހިންގަމުންދާ "އޮކިއުޕޭޝަން" އާއި ދެކޮޅަށް ދެމުންދާ ހަމަލާތަކުގެ ތެރެއިން އެއް ހަމަލާ ކަމަށެވެ. އަދި މިފަދަ ހަމަލާތައް ކުރިއަށް އޮތް ތަނުގައިވެސް ދެމުން ގެންދާނެ ކަމަށް އެ ޖަމާއަތުން ބުންޏެވެ.
ޕާކިސްތާނު ސަރުކާރުން މި ހަމަލާއާ ގުޅޭގޮތުން އަދި އެއްވެސް ބަޔާނެއް ނެރެފައެއް ނުވެ އެވެ. ނަމަވެސް ޕާކިސްތާނު ސަރުކާރުން ބީއެލްއޭ އަކީ ޓެރަރިސްޓް ޖަމާއަތެއްގެ ގޮތުގައި މީގެކުރިންވެސް ކަނޑައަޅާފައިވާ ޖަމާއަތެކެވެ.
ބަލޫޗިސްތާނަކީ ޕާކިސްތާނުގެ އެންމެ ބޮޑު އަދި ވަސީލަތްތަކުން މުއްސަނދި ސޫބާ އެވެ. ނަމަވެސް އެތައް އަހަރެއް ވަންދެން ބަލޫޗް ވަކިވަކި ޖަމާއަތްތަކުން ވަނީ ޕާކިސްތާނު ސަރުކާރާ ދެކޮޅަށް ހަތިޔާރު ނަގައިގެން ތެދުވެފަ އެވެ.
މި ޖަމާއަތްތަކުން ބުނީ ޕާކިސްތާނު ސަރުކާރުން ބަލޫޗިސްތާނުގެ ވަސީލަތްތައް އެކަށީގެންވާ ގޮތުގައި ބޭނުން ނުކުރާ ކަމަށާއި، އެ ސަރަހައްދުގެ ރައްޔިތުންނަށް އިހުމާލުވާ ކަމަށްވެސް އެ ޖަމާއަތުން ތުހުމަތު ކުރެއެވެ.
