ނޭނގި ޕާޓީތަކަށް ވައްދާ މައްސަލައިގައި ފިޔަވަޅު ނާޅާތީ ޓްރާންސްޕޭރެންސީގެ ކަންބޮޑުވުން
ޒާތީ މައުލޫމާތު ހުއްދަ ނެތި ބޭނުންކޮށް، ނޭނގި ޕާޓީތަކަށް މީހުން ވައްދާ މައްސަލަ އާ ގުޅިގެން މިހާތަނަށް އެއްވެސް ފިޔަވަޅެއް އަޅާފައި ނުވާތީ ޓްރާންސްޕޭރެންސީ މޯލްޑިވްސްއިން ކަންބޮޑުވުން ފާޅުކޮށްފި އެވެ.
ޓްރާންސްޕޭރެންސީން މިއަދު ނެރުނު ބަޔާނުގައި ބުނީ ދައުލަތާއި އަމިއްލަ ފަރާތްތަކުގެ ރެކޯޑުތަކުން ޒާތީ މައުލޫމާތު ނަހަމަ ގޮތުގައި ހޯދައި ބޭނުންކުރުމަކީ ފަރުދުންގެ ޒާތީ ދިރިއުޅުމުގެ ހައްގަކަށް އަރައިގަނެވޭ ކަންބޮޑުވާން ޖެހޭ ކަމެއް ކަމަށެވެ. ނިޒާމުގެ ތެރެއިން ފަރުދުންގެ ޒާތީ މައުލޫމާތު އެއްވެސް ހުއްދައެއް ނުވަތަ ރުހުމަކާ ނުލައި ސިޔާސީ ބޭނުންތަކަށް ބޭނުން ކުރެވޭ ގޮތަށް ބައްޓަން ކުރެވިފައި ވަނީ ކީއްވެތޯ ދެނެގަންނަން ޖެހޭ ކަމަށެވެ.
މިފަދަ އަމަލުތަކުގައި ބައިވެރިވެ، ތަރުހީބުދޭ އަމިއްލަ ފަރުދުންނާއި މުއައްސަސާތައް އަދި ޕާޓީތަކާ މެދު އަޅަން ޖެހޭ ސުލޫކީ އަދި ގާނޫނީ ފިޔަވަޅުތައް އެޅުމަށް އަވަސް އަދި މިނިވަން ތަހުގީގެއް ކުރުމަކީ މުހިންމު ކަމެއް ކަމަށް ދެކޭ ކަމަށް އެ ޖަމިއްޔާއިން ބުންޏެވެ.
އޮޅުވާލައިގެން ސިޔާސީ ޕާޓީތަކަށް މެމްބަރުން އިތުރުކުރުމާއި މެމްބަރުން ހިމެނިފައިވާ ޕާޓީ އެހެން ޕާޓީއަކަށް ބަދަލުކުރުމަކީ މީޑިއާތަކުން އަދި ވަކިވަކި ފަރުދުންގެ ފަރާތުން އަންނަ ޝަކުވާއެއް ކަމަށެވެ.
"މިފަދަ ޝަކުވާތަކާއި މައްސަލަތައް ތަކުރާރުކޮށް ރިޕޯޓުކުރެވޭ ނަމަވެސް، ޒާތީ މައުލޫމާތު ބޭނުންކޮށް އަސާސީ ހައްގުތަކާއި ހިލާފުވުމާ ގުޅިގެން އެއްވެސް މުއައްސަސާއަކާ އަދި ސިޔާސީ ޕާޓީތަކާ މެދު ފިޔަވަޅު އެޅިފައިނުވުމަކީ ކަންބޮޑުވާން ޖެހޭ ކަމެކެވެ،"
ޓްރާންސްޕޭރެންސީން ބުނި ގޮތުގައި މިނިވަން މުއައްސަސާތަކަކީ އެ މުއައްސަސާތަކުގެ މަސައްކަތްތަކުގެ ތެރެއިން ސަރުކާރުގެ ހަރަކާތްތައް ބެލެހެއްޓުމާއި އަސާސީ ހައްގުތައް ރައްކާތެރިކުރުމާއި ހާމަކަން ކަށަވަރު ކުރުމުގައި މުހިންމު ދައުރެއް އަދާކުރުމުގެ ޒިންމާ ހަވާލުކުރެވިފައިވާ ފަރާތްތަކެއް ކަމުގަ އެވެ. އިންތިހާބުތައް މިނިވަންކަމާއި އިންސާފުވެރިކަމާއި އެކު ބޭއްވުން ކަށަވަރުކުރުމުގެ މަސްއޫލިއްޔަތު މަތިކުރެވިފައިވާ އިލެކްޝަންސް ކޮމިޝަނުން ސިޔާސީ ޕާޓީތަކަށް މެމްބަރުން ރަޖިސްޓާކުރުމުގައި މަޖުބޫރުކުރުވުމެއް ނުވަތަ އޮޅުވާލުމެއް ނެތްކަން ކަށަވަރުކުރަން ޖެހޭ ކަމުގަ އެވެ.
އަދި އާންމުންގެ ކަންބޮޑުވުންތަކުގެ އަޑުއަހައި، ހިލާފުވުންތަކަށް ޒިންމާވާން ޖެހޭ ފަރާތްތައް ޒިންމާދާރު ކުރުވަން އަމިއްލަ އިސްނެގުމާ އެކު އަވަސް ހަރުދަނާ ފިޔަވަޅުތަކެއް އަޅަން ޖެހޭކަން ފާހަގަކުރި އެވެ.
"ރައްޔިތުންގެ ހައްގުތަކާއި ގުޅޭ މިފަދަ ކަންކަމުގައި އަވަސް އަދި މައުނަވީ ހައްލުތައް ހޯދައިދެވުމަކީ ތަފާތު ސިޔާސީ މުއައްސަސާތަކުގެ އިތުބާރު ބޮޑުކުރުމަށާއި ރައްޔިތުންނަށް ލިބިފައިވާ އަމިއްލައަށް އިހުތިޔާރާއި އެކު އަމިއްލައަށް ހިޔާރުކުރާ ސިޔާސީ ޕާޓީއަކަށް މިނިވަންކަމާ އެކު ބައިވެރިވުމުގެ ހައްގު ވެސް ރައްކާތެރިކުރުމަށް ވެސް މުހިންމު ފިޔަވަޅެއްކަން ފާހަގަކުރަމެވެ،"
ބަޔާނުގައި ވަނީ ސަރުކާރާއި އީސީ އަދި ސިޔާސީ ޕާޓީތައް ހިމެނޭހެން ކަމާ ގުޅުންހުރި ފަރާތްތަކުން ރަނގަޅު ކުރަންވީ ކަންކަން ފާހަގަކޮށްފަ އެވެ. އެގޮތުން:
- ޕާޓީތަކަށް މެމްބަރުން އިތުރުކުރަން އޮޅުވާލައިގެން މެމްބަރުން ރަޖިސްޓްރީ ކުރަމުންދާ މައްސަލަ ހާއްސަ މައްސަލައެއްގެ ގޮތުގައި އީސީން ފުރިހަމަ، މިނިވަން އަދި ހާމަކަންބޮޑު ގޮތެއްގައި ތަހުގީގުކޮށް، މައްސަލައިގައި ޝާމިލުވާ ފަރާތްތަކާ މެދު ފިޔަވަޅުއެޅުން
- އެއްވެސް އަމިއްލަ ފަރުދެއްގެ ރުހުމާއި ނުލާ، މަކަރާއި ހީލަތުން ސިޔާސީ ޕާޓީތަކުގެ މެމްބަރުންގެ ގޮތުގައި ހުށަހަޅައި ބަލައިގަނެފައިވާ އާންމުންގެ ރެކޯޑުތައް ފުހެލުން
- ޖަވާބުދާރީވުމާއި ހާމަކަން ކަށަވަރުކުރުމަށް އެކަށީގެންވާ ޗެކްސް އެންޑް ބެލެންސަސް އާއެކު ޕާޓީތަކުގެ އިންޓާނަލް މެކޭނިޒަމް ހަރުދަނާ ކުރަން ޖެހޭ ފިޔަވަޅުތައް އެޅުން. އެފަދަ ކަންކަން މޮނިޓަކޮށް، މުރާޖައާ ކުރެވޭނެ ނިޒާމެއް ތައާރަފުކުރުން
- ޕާޓީތަކާ ގުޅުމަށް ހުށަހެޅޭ ފޯމުތަކުގެ ސައްހަކަން ކަށަވަރުކުރަން އީސީން ހަރުދަނާ ވެރިފިކޭޝަން މެކޭނިޒަމްތަކެއް ތަންފީޒުކުރުން
- އާންމުންގެ މުހިންމު އަދި ޒާތީ މައުލޫމާތު ހިމެނޭ ސެންޓްރަލް ޑޭޓާބޭސްތަކުގައި މިހާރު ހުރި ރައްކާތެރިކަމުގެ ފިޔަވަޅުތައް ދިރާސާކޮށް، އެ މައުލޫމާތުތައް ރައްކާތެރިކޮށް ހިމާޔަތްކުރެވޭ ފަދަ ގޮތަކަށް ގާނޫނީ އޮނިގަނޑު ހަރުދަނާކުރުން
- ސިޔާސީ މުއައްސަސާތަކުގެ މެދުގައި ޑިމޮކްރެޓިކް އަސާސްތައް ކުރިއަރުވަން ހޭލުންތެރިކުރުމުގެ ޕްރޮގްރާމްތައް ހިންގުމާއި ޒާތީ މައުލޫމާތު ނަހަމަ ގޮތުގައި ބޭނުން ކުރެވިގެންދާނެ ގޮތްތަކާ ބެހޭގޮތުން އާންމުން ހޭލުންތެރިކުރުވުމުގެ އިތުރުން ޝަކުވާތަކާއި ހައްލު ހޯދޭނެ ހަރުދަނާ ނިޒާމުތައް ގާއިމުކުރުން
- އާންމުންގެ ޒާތީ މައުލޫމާތު ބަލަހައްޓާ ދައުލަތުގެ އަދި އަމިއްލަ މުއައްސަސާތަކުން އަމަލުކުރަން ޖެހޭ މިންގަނޑުތަކާއި ޕްރޮޓޮކޯލް ހިމެނޭ ހަރުދަނާ ޑޭޓާ ޕްރޮޓެކްޝަން ގާނޫނެއް އެކުލަވާލާ ތަންފީޒުކުރުން. އެފަދަ ގާނޫނެއްގައި ހައްސާސް ޑޭޓާގެ ބޭނުން ނަހަމަ ގޮތުގައި ނުހިފޭނެ ގޮތަށް ފުޅާދާއިރާއެއްގައި ހާމަކަންބޮޑުކުރުމާއި ޖަވާބުދާރީކުރުވުމުގެ ފްރޭމްވޯކްތައް ހިމެނުން
އިތުރަށް ބުނީ ސަރުކާރާއި ސިޔާސީ ޕާޓީތަކަށް އާންމުންކުރާ އިތުބާރު ދެމެހެއްޓުމަށް، މުހިންމު އަދި އަސާސީ ހައްގެއް ކަމަށްވާ ޒާތީ ދިރިއުޅުމުގެ ހައްގު ކަށަވަރު ކުރެވެން ޖެހޭ ކަމަށެވެ. އަދި މައުލޫމާތު ލިބިގެން އަމިއްލަ އިހުތިޔާރުގައި ނިންމުންތައް ނިންމުމުގެ ފުރުސަތު އޮންނަން ޖެހޭ ކަމަށެވެ.
ހައްގުތައް ރައްކާތެރިކުރަން އަޅަން ޖެހޭ ފިޔަވަޅުތައް ތަންފީޒުކޮށް، މައުލޫމާތުގެ ޕްރައިވެސީ އާއި މައުލޫމާތު ބަލަހައްޓާ ނިޒާމުތައް ހަރުދަނާ ކުރުމާ އެކު، ވަރުގަދަ ޖަވާބުދާރީވުމުގެ ނިޒާމުތައް ގާއިމުކުރުމުގެ ތެރެއިން ޑިމޮކްރަސީގެ އަސާސްތައް ދެމެހެއްޓިގެންދާނެކަން ވެސް ޓްރާންސްޕޭރެންސީން ފާހަގަކުރި އެވެ.
