ފަތުރުވެރިއަކަށް ޖިންސީ ގޯނާކުރި މީހަކު ހައްޔަރުކޮށްފި

ހދ. ނޮޅިވަރަންފަރުގައި ފަތުރުވެރިއަކަށް ޖިންސީ ގޯނާ ކުރި ކަމަށް މައްސަލައެއް ފުލުހަށް ރިޕޯޓްކޮށް މީހަކު ހައްޔަރުކޮށްފި އެވެ.
ފުލުހުން ބުނީ އިއްޔެ މެންދުރު 2:45 ހާއިރު ނޮޅިވަރަންފަރުގައި ފަތުރުވެރިންނަށް ހާއްސަކޮށްފައިވާ ބީޗުގައި ފަތުރުވެރިއަކު އިންދައި، އޭނާއަށް ޖިންސީ ގޯނާ ކުރި މައްސަަލައެއް ހުށަހަޅާފައިވާ ކަމަށެވެ.
އެ މައްސަަލައާ ގުޅިގެން ކޯޓު އަމުރެއްގެ ދަށުން 30 އަހަރުގެ ދިވެހި ފިރިހެނަކު ފުލުހުންގެ ބެލުމުގެ ދަށަށް ގެނެސްފައިވާ ކަމަށް ފުލުހުން ބުނެފައިވެ އެވެ.
ފުލުހުން ބުނީ އެ މައްސަަލަ އިތުރަށް ތަހުގީގުކުރަމުންދާ ކަމަށެވެ.
ޖިންސީ ގޯނާ ކުރުމުގެ މައްސަލަ ބޮޑު ނަމަވެސް ފަތުރުވެރިންނަށް ޖިންސީ ގޯނާ ކުރުމަކީ ރާއްޖޭގައި ވަރަށް މަދުން ނޫނީ ހިނގާ ކަމެއް ނޫނެވެ.