މިދިޔަ އޮކްޓޫބަރު މަހު ރާއްޖެ އައި ޗައިނާގެ ފަތުރުވެރިއެއް ގެއްލިގެން ހޯދަނީ
މިދިޔަ އޮކްޓޫބަރު މަހު ރާއްޖެ އައި ޗައިނާގެ ފަތުރުވެރިއެއް ގެއްލިގެން ހޯދުމަށް އިއުލާނުކޮށްފި އެވެ.
ގެއްލިގެން ހޯދަމުން އަންނަ ޗައިނާގެ ފަތުރުވެރިއާގެ ފޮޓޯއަކާ އެކު ފުލުހުންގެ ވެބްސައިޓުގައި މިއަދު ޝާއިކުރި ލިޔުމުގައި ބުނީ ގެއްލިފައިވާ ކަމަށް ރިޕޯޓުކުރުމާ ގުޅިގެން އެ އަންހެން މީހާ ހޯދުމުގެ މަސައްކަތް ފަށާފައިވާ ކަމަށެވެ.
ގެއްލިގެން ހޯދަމުން ދަނީ ޗައިނާ ރައްޔިތެއް ކަމަށްވާ ސޫ ޒިއޯނިން (30އ) އެވެ.
ސޫ ޒިއޯނިން ރާއްޖެ އައިފަހުން އާއިލާއަށް ހަބަރެއް ވެފައި ނުވާތީ، ވީނުވީއެއް ނޭނގި ގެއްލިގެން އާއިލާގެ ފަރާތުން ފުލުހުންނަށް މައްސަލަ ރިޕޯޓުކުރީ ރާއްޖޭގައި ހުންނަ ޗައިނާ އެމްބަސީ މެދުވެރިކޮށެވެ. އެ މައްސަލަ ފުލުހުންނަށް ހުށަހަޅާފައި ވަނީ މިދިޔަ ބުދަ ދުވަހު އެވެ.
ފުލުހުން ބުނީ މި މައްސަލަ ފުލުހުންނަށް ރިޕޯޓުކުރުމާ އެކު އޭނާ ހޯދުމަށް ފުލުހުންގެ ކަމާ ގުޅުންހުރި އެންމެހާ ބަހާތަކަށް މައުލޫމާތު ހިއްސާކުރެވި، ހޯދުމުގެ މަސައްކަތް ދަނީ ކުރަމުން ކަމަށެވެ.
ސޫ ޒިއޯނިން ޓުއަރިސްޓް ވިސާގައި ރާއްޖެ އައިސްފައި ވަނީ މިިދިޔަ އޮކްޓޫބަރު މަހުގެ 13 ވަނަ ދުވަހު ކަމަށް އެނގިފައިވާ ކަމަށް ފުލުހުން ބުންޏެވެ. އަދި އޭނާ މާލޭގައި ހުރި ގެސްޓް ހައުސްއިން އޮކްޓޫބަރު 24 ވަނަ ދުވަހު ހެނދުނުގެ ވަގުތެއްގައި ޗެކްއައުޓް ވެފައިވާ ކަމަށެވެ.
ފުލުހުން ބުނީ ޗެކްއައުޓް ވުމަށްފަހު އޭނާ ރާއްޖެއިން ފުރައިގެން ގޮސްފައިނުވާކަން ތަހުގީގަށް މައުލޫމާތު ލިބިފައިވާ ކަމަށެވެ. ނަމަވެސް ސޫ ޒިއޯނިން ހޯދުމަށް މިހާތާނަށް ކުރެވުނު މަސައްކަތުން އޭނާ އާ ބެހޭ އެއްވެސް މައުލޫމާތެއް އަދި އުޅޭތަނެއް ހޯދިފައި ނުވާ ކަމަށެވެ.
ފުލުހުން ވަނީ ސޫ ޒިއޯނިން އާ ބެހޭ އެއްވެސް މައުލޫމާތެއް ލިބިފައިވާ ނަމަ، ސީރިއަސް އެންޑް އޮގަނައިޒް ކްރައިމް އިންވެސްޓިގޭޝަންގެ ޑިއުޓީ ނަންބަރު 9911099 އަށް ގުޅައި ހިއްސާކޮށްދިނުމަށް އެދިފަ އެވެ.
Ads by STO
