އެމްއާރުއެމް އުވާލިތަނާ މައުމޫންގެ ޕޯސްޓެއް

އެމްއާރްއެމް އުވާލަން މީގެ ކުރިން، 2023 ގައިވެސް އީސީން ނިންމި އެވެ. އީސީގެ ނިންމުމަކީ ގާނޫނާ ހިލާފު ނިންމުމެއް ކަމަށް ބުނެ އެ ޕާޓީން އީސީއާ ދެކޮޅަށް ސިވިލް ކޯޓަށް މައްސަލަ އެއް ހުށަހެޅި އެވެ. ކޯޓުން ހުކުމްކުރީ އީސީގެ ނިންމުމަކީ ގާނޫނާ ހިލާފު ނިންމުމަކަށްވާތީވެ އަމަލު ނުކުރުމަށެވެ.

އޭގެފަހުން 3،000 މެންބަރުން ހަމަކުރަން އީސީން އެމްއާރްއެމަށް 3 މަސް ދުވަހުގެ މުއްދަތެއް ދިނެވެ. އެ މުއްދަތުގެ ތެރޭގައި ވެސް އެ އަދަދަށް މެންބަރުން ހަމައެއް ނުކުރެވުނެވެ.

ގާނޫނުގައި ލާޒިމުކުރާ އަދަދަށް މެންބަރުން ހަމަނުވާތީވެ އެމްއާރްއެމް އުވާލުމުގެ މަސައްކަތް ފެށިކަން އޮގަސްޓު 25، 2024 ގައި އީސީން އިއުލާންކުރި އެވެ. ސިޔާސީ ހަރަކާތްތައް ނުހިންގުމަށާއި ދަރަންޏެއްވާނަމަ އެމްއާރްއެމްގެ އޮފީހަށް ހުށަހަޅަން ވެސް އީސީން އޭރު އެދުނެވެ.

އެ މުއްދަތުގައި އެމްއާރްއެމުން އެއްވެސް އެއްޗެއް އީސީއަށް އަންގާފައިނުވެ އެވެ.

ނޮވެމްބަރު 20، 2019 ގައި ރަޖިސްޓްރީ ކުރި އެމްއާރްއެމް އުވާލާފައިވާއިރު އެ ޕާޓީގެ ދަފްތަރުގައި މިހާރު ތިބީ 1،867 މެންބަރުންނެވެ.

30 އަހަރުގެ ދިގު މުއްދަތަކަށް ރާއްޖޭގެ ވެރިކަންކުރެއްވި މައުމޫން އުފެއްދެވި ތިން ޕާޓީ ވެސް މިހާރު ވުޖޫދަކު ނެތެވެ. އެމަނިކުފާނުގެ ފުރަތަމަ ޕާޓީ، ދިވެހި ރައްޔިތުންގެ ޕާޓީ (ޑިއާރްޕީ) ވެސް އުވާލީ 3،000 މެންބަރުން ހަމަނުވުމުންނެވެ. ޑީއާރުޕީ އުވާލީ 2023ވަނަ އަހަރު މާޗު މަހު އެވެ.

ޑީއާރުޕީގެ އެތެރޭގައި ހިޔާލު ތަފާތުވުން އުފެދި މައުމޫން އިސްވެ ދެން އުފެއްދެވީ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އެވެ. ޕީޕީއެމްގެ ސެނެޓުން މިދިޔަ އަހަރު ވަނީ އެ ޕާޓީ އުވާލުމަށް ފާސްކޮށްފަ އެވެ.

އެއީ ޕީޕީއެމް ގެއްލިދާނެތީ މައުމޫނުގެ ކޮއްކޯފުޅު، ކުރީގެ ރައީސް އަބްދުﷲ ޔާމީން އުފެއްދެވި ޕީޕަލްސް ނެޝަނަލް ކޮންގްރެސް (ޕީއެންސީ) އަށް ސަރުކާރު ލިބުމުން، ޕީޕީއެމްގެ މެންބަރުން ވެސް ޕީއެންސީއަށް ވައްދައި އެ ޕާޓީ ބޮޑު ކުރުމަށް މިހާރުގެ ރައީސް ޑރ. މުހައްމަދު މުއިއްޒު އިރުޝާދު ދެއްވުމުން ޕީޕީއެމްގެ ސެނެޓުން ނިންމި ނިންމުމެކެވެ.