ކުންފުނިތަކުގެ އިސްވެރިންނަށް މުސާރައިގެ ގޮތުގައި ގިނަވެގެން ދެވޭނީ 90،000 ރުފިޔާ
ސަރުކާރު ހިއްސާވަ ކުންފުނިތަކުގެ އިސްވެރިންނަށް މުސާރައިގެ ގޮތުގައި ގިނަވެގެން ދެވޭނި 90,000 ރުފިޔާ ކަމަށް ކަނޑައަޅައިފި އެވެ.
ޕްރައިވަޓައިޒޭޝަން އެންޑް ކޮޕަރޭޝަން ބޯޑުން މިއަދު ނެރުނު ބަޔާނުގައި ބުނީ މިއީ ރާއްޖޭގެ އިގުތިސާދީ ހާލަތު އޮތް ގޮތުން ދައުލަތުގެ ހަރަދުތައް ކުޑަކުރުމުގެ ގޮތުން އެޅި ފިޔަވަޅެއް ކަމަށެވެ.
އެ ފިޔަވަޅުތަކަކީ ދެ އަހަރު ދުވަހުގެ މުއްދަތަކަށް އެޅި ފިޔަވަޅެކެވެ.
އެގޮތުން ބޭންކުތައް ފިޔަވައި ސަރުކާރު ހިއްސާވާ ކުންފުނިތަކުގެ ބޯޑުގެ ޑިރެކްޓަރުންގެ ތެރެއިން ރާއްޖެއިން ބޭރުގެ ޑިރެކްޓަރުން ފިޔަވައި ބޯޑުތަކުގެ ޗެއާމަނުންނާއި މެނޭޖިން ޑިރެކްޓަރުން ހިމެނޭހެން މުސާރައާއި އިނާޔަތްތަކުގެ ގޮތުގައި 90,000 ރުފިޔާއަށް ވުރެ އިތުރުވާ ބައި އުނިކޮށް 90,000އަށް ވުރެ ބޮޑުނުވާނެ ގޮތަށް މުސާރަ ދިނުމަށްް ވަނީ އެސްއޯއީ ކުންފުނިތަކަށް އަންގައިފަ އެވެ.
އޭގެ އިތުރުން ސަރުކާރު ކުންފުނިތަކުގެ ޓެކްނިކަލް މުވައްޒަފުންގެ ތެރެއިން ވެސް މުސާރައާ އިނާޔަތްތަކުގެ ގޮތުގައި 90,000 އަށް ވުރެ ބޮޑު އަދަދެއް ނުދިނުމަށް ވެސް ޕީސީބީއިން ވަނީ އަންގައިފަ އެވެ.
ކުންފުނިތަކުގެ އިސްވެރިންގެ މުސާރަ ކުޑަކުރަން ނިންމިކަން ރައީސް ޑރ. މުހައްމަދު މުއިއްޒު އިއުލާންކުރެއްވީ މިދިޔަ އޮކްޓޫބަރު މަހު އެވެ.
އަދި ހަރަދު ކުޑަކުރަން މުސާރައިގެ 50 ޕަސެންޓް ނުނަންގަވާނެކަމަށް ރައީސްވެސް އޭރު ވިދާޅުވި އެވެ.
Ads by STO
