ބައި ޓަނުގެ މިޔަރު މަހާއި މަޑި މަސް ވަގަށް ބޭރުކުރަން އުޅުނީ ކްރިސްޓަލް ކުންފުނިން
ރާއްޖެއިން ބައި ޓަނުގެ މިޔަރު މަހާއި މަޑި މަސް ގަވާއިދާ ހިލާފަށް ބޭރުކުރަން އުޅުނީ "ދަ ކްރިސްޓަލް ކޮމްޕެނީ ޕްރައިވެޓް ލިމިޓެޑް" ނަމަކަށް ކިޔާ ކުންފުންޏަކުން ކަމަށް މޯލްޑިވްސް ކަސްޓަމްސް ސާވިސްއިން ބުނެފި އެވެ.
ގާނޫނާއި ގަވާއިދާ ހިލާފަށް ރާއްޖެއިން ބޭރުކުރަން އުޅެނިކޮށް 582 ކިލޯގެ މިޔަރު މަހާއި މަޑި މަސް ހުރި 45 ފޮށިގަނޑު ކަސްޓަމްސްއިން އަތުލައިގެންފައި ވަނީ މިދިޔަ ނޮވެމްބަރު މަހުގެ ހަތް ވަނަ ދުވަހު އެވެ.
އެ އިދާރާއިން ބަލައި ފާސްކުރި މުދާ ޝިޕްމެންޓެއްގެ ތެރެއިން ފެނުނު ތަކެތި ޑިސެމްބަރު މަހުގެ 22 ވަނަ ދުވަހު ނައްތާލާފައިވާ ކަމަށް ކަސްޓަމްސްއިން ހާމަކުރީ ޑިސެމްބަރު މަހުގެ 25 ވަނަ ދުވަހު އެވެ. ނަމަވެސް އެ ތަކެތި ބޭރުކުރަން އުޅުނީ ކޮން ފަރާތަކުން ކަމެއް އޭރު ހާމަކޮށްފައެއް ނުވެ އެވެ.
ކަސްޓަމްސްއިން ރޭ "އެކްސް" ގައި ކުރި ޕޯސްޓެއްގައި ބުނީ ބަލައި ފާސްކުރުމުގެ ތެރެއިން 582 ކިލޯގެ މިޔަރު މަހާއި މަޑި މަސް ފެނުނު މައްސަލަ އެ އިދާރާއިން ތަހުގީގު ކުރަމުން އަންނަ ކަމަށެވެ.
އެ ޝިޕްމެންޓް އެ އިދާރާއަށް ޑިކްލެއާ ކޮށްފައި ވަނީ "ދަ ކްރިސްޓަލް ކޮމްޕެނީ ޕްރައިވެޓް ލިމިޓެޑް" ކިޔާ ކުންފުންޏަކުން ކަމަށް ކަސްޓަމްސްއިން ބުންޏެވެ.
އިކޮނޮމިކް މިނިސްޓްރީގެ ބިޒްނަސް ޕޯޓަލުން ދައްކާ ގޮތުން ދަ ކްރިސްޓަލް ކޮމްޕެނީގެ ހިއްސާދާރުންގެ ގޮތުގައި ތިބެނީ ފިލްމު ޑައިރެކްޓަރު ފާތިމަތު ނަހުލާ އާއި އޭނާގެ ފިރިމީހާ ހަސަން ސިނާނެވެ.
ނެތި ދިޔުމުގެ ބިރުހީވެފައިވާ ދިރޭތަކެތީގެ ބައިނަލްއަގުވާމީ ވިޔަފާރި ކޮންޓްރޯލް ކުރުމުގެ ގާނޫނުގެ ދަށުން ރާއްޖެއިން ބޭރުކުރުން މަނާ ތަކެތީގެ ތެރޭގައި މިޔަރު ހިމެނެ އެވެ. ރާއްޖޭގެ މަސްވެރިކަމުގެ އާންމު ގަވާއިދުގެ ދަށުން މިޔަރާއި މަޑީގެ ބާވަތްތަކަކީ ހިފުމާއި ބޭނުންކުރުމާ އަދި ބޭރުކުރުން މަނާ ބާވަތްތަކެކެވެ.
ކަސްޓަމްސްއިން އިތުރަށް ބުނި ގޮތުގައި ކަމާ ގުޅިގެން އެ އިދާރާއިންނާއި ގުޅުންހުރި ފަރާތްތަކުން ބަލަން ޖެހޭ ބެލުންތައް ބަލައި، އިޖުރާތުތައް ފުރިހަމަ ކުރުމަށް ފަހު، މިދިޔަ މަހުގެ 22 ވަނަ ދުވަހު އެ ތަކެތި ނައްތާލާފައިވާ ކަމުގަ އެވެ.
މީގެކުރިން ވެސް ގަވާއިދާ ހިލާފަށް މިޔަރު މަހާއި މަޑި މަސް ބޭރުކުރަން މަސައްކަތް ކުރަނިކޮށް ހިފައްޓައި، އެ ތަކެތި ނައްތާލާފައިވެ އެވެ.
Ads by STO
