ޒާތީ މައުލޫމާތު ހިމެނޭ ނިޒާމު އަލުން ޑިޒައިން ކުރަން ތައިލެންޑުގެ ކުންފުންޏަކާ ހަވާލުކޮށްފި
ރާއްޖޭގެ ސިވިލް ރެޖިސްޓްރޭޝަން، ވައިޓަލްސް ސްޓެޓިސްޓިކްސް އަދި އައިޑެންޓިފިކޭޝަން (ސީއާރުވީއެސް އައިޑީ) މެނޭޖްމަންޓް ނިޒާމު އަލުން ޑިޒައިން ކުރުމުގެ މަސައްކަތް ކޮންޓްރޯލް ޑޭޓާ (ތައިލެންޑް) ލިމިޓެޑް (ސީޑީޓީ) އާ ހަވާލުކޮށްފި އެވެ.
ސީޑީޓީ އާ މަސައްކަތް ހަވާލުކޮށްފައި ވަނީ ވޯލްޑް ބޭންކުގެ ހިލޭ އެހީގެ ދަށުން ހޯމްލޭންޑް ސެކިއުރިޓީ އެންޑް ޓެކްނޮލޮޖީ މިނިސްޓްރީން ހިންގަމުންދާ "ޑިޖިޓަލް މޯލްޑިވްސް ފޮ އެޑަޕްޓޭޝަން، ޑީސެންޓްރަލައިޒޭޝަން އެންޑް ޑައިވަސިފިކޭޝަން (ޑީމެޑް) ޕްރޮޖެކްޓް" ގެ ދަށުންނެވެ.
މި މަސައްކަތް ހަވާލުކުރުމުގެ އެއްބަސްވުމުގައި ހޯމްލޭންޑް މިނިސްޓްރީގެ ފަރާތުން ސޮއިކުރެއްވީ އެ މިނިސްޓްރީގެ ސްޓޭޓް މިނިސްޓަރު ޑރ. މުހައްމަދު ކިނާނަތެވެ. ސީޑީޓީގެ ފަރާތުން ސޮއިކުރައްވާފައި ވަނީ އެ ކުންފުނީގެ މެނޭޖިން ޑިރެކްޓަރު ނާޓް ލިއުޗަރެއޮން އެވެ.
ހޯމްލޭންޑް މިނިސްޓްރީން ބުނީ އެއްބަސްވުމުގެ ދަށުން މައިގަނޑު ގޮތެއްގައި އެހީ ފޯރުކޮށްދެވޭނީ ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު) ގެ ފައުންޑޭޝަނަލް އައިޑެންޓިޓީ ސިސްޓަމް ހަރުދަނާ ކުރުމަށް ކަމަށެވެ. މި މަސައްކަތް ކުރިއަށް ގެންދަނީ ޑީމެޑް ޕްރޮޖެކްޓުގެ ދެ ވަނަ ކޮމްޕޯނަންޓުގެ ދަށުން ކަމަށެވެ.
މި ނިޒާމު ގާއިމުކުރެވުމުން ނޭޝަނަލް ސެންޓަ ފޮ އިންފޮމޭޝަން ޓެކްނޮލޮޖީ (އެންސީއައިޓީ) އިން ބަލަހައްޓާ އީފާސް ޑިޖިޓަލް އައިޑެންޓިޓީ ނިޒާމު ހިންގުމާއި ލޯކަލް ގަވަމަންޓް އޮތޯރިޓީ (އެލްޖީއޭ) އަދި ކައުންސިލުތަކުން ކުރަމުން ގެންދާ އާބާދީ ބެލެހެއްޓުމުގެ މަސައްކަތްތަކާއި ހެލްތު މިނިސްޓްރީގެ އިތުރުން މޯލްޑިވްސް ސްޓެޓިސްޓިކަލް ބިއުރޯއަށް ބޭނުންވާ ތަފާސް ހިސާބުތައް، ޑިޖިޓަލް ނިޒާމެއްގެ ތެރެއިން ސައްހަކަމާއި ރައްކާތެރިކަމާ އަދި ރިއަލްޓައިމްކޮށް އެކަށީގެންވާ ގޮތެއްގައި ލިބުމަށް މަގުފަހިވެގެންދާނެ ކަމަށް ހޯމްލޭންޑް މިނިސްޓްރީން ބުންޏެވެ.
މިނިސްޓްރީން ބުނި ގޮތުގައި މި މަސައްކަތް ނިމުމާ އެކު، ޑީއެންއާރަށް ބޭނުންވާ ސޮފްޓްވެއަ އަދި ހާޑްވެއަ ހޯދުމުގެ މަސައްކަތް ޑީމެޑް ޕްރޮޖެކްޓުން ކުރިއަށް ގެންދިއުމަށް ހަމަޖެހިފައިވާ ކަމުގަ އެވެ.
ކޮންޓްރޯލް ޑޭޓާ (ތައިލެންޑް) ލިމިޓެޑް (ސީޑީޓީ) އަކީ ޑޭޓާ ބެކަޕް ސެންޓަރެއްގެ ގޮތުގައި މަސައްކަތް ފަށައި، އަދި ފަހުން އެމެރިކާގެ ކޮންޓްރޯލް ޑޭޓާ ކޯޕަރޭޝަނުގެ ގޮތްޕެއްގެ ގޮތުގައި ތައިލެންޑުގެ ސަރުކާރުގެ އިދާރާތަކަށާއި ދައުލަތުގެ ވިޔަފާރިތަކަށާ އަދި އަމިއްލަ ކުންފުނިތަކަށް ކޮމްޕިއުޓަ މެއިންފްރޭމްތައް ފޯރުކޮށްދޭ ކުންފުންޏެކެވެ. އެ ކުންފުނިން ޑިޖިޓަލް ޓްރާންސްފޮމޭޝަން އަދި ބަޔޮމެޓްރިކްއަށް ހާއްސަވެފައިވާ ޓެކްނޮލޮޖީ ހައްލުތައް ފޯރުކޮށްދެ އެވެ.
ގައުމީ އައިޑީ ސިސްޓަމްތަކަށް ހާއްސަ އަހައްމިއްޔަތުކަމެއް ދީގެން، ސީޑީޓީން ވަނީ ބައިނަލްއަގުވާމީ މިންގަނޑުތަކާ އެއްގޮތަށް ޑިޖިޓަލް އައިޑެންޓިޓީ ވެރިފިކޭޝަން ޕްލެޓްފޯމުތައް ތަރައްގީ ކޮށްފަ އެވެ. އޭގެ ތެރޭގައި ތައިލެންޑުގެ ރައްޔިތުންނަށް އޮންލައިން މުއާމަލާތްތަކުގައި އަދި ސަރުކާރުގެ ހިދުމަތްތަކަށް ރައްކާތެރިކަމާ އެކު، އެ މީހެއްގެ އައިޑެންޓިޓީ ކަށަވަރު ކޮށްދިނުމަށް އެހީތެރިވެދޭ ތައި ޑިޖިޓަލް އައިޑެންޓިޓީ (ތައި އައިޑީ) މޮބައިލް އެޕްލިކޭޝަން ހިމެނެ އެވެ.
އެ ކުންފުނިން އަންނަނީ 1983 ވަނަ އަހަރުން ފެށިގެން ތައިލެންޑުގެ އުފަންވުމާއި މަރުވުން އަދި އެހެނިހެން ވައިޓަލްސް ރެކޯޑުތައް ހުންނަ ޑިޖިޓަލް ނިޒާމު ގާއިމުކޮށް، ބެލެހެއްޓުމުގައި މުހިންމު ދައުރެއް އަދާކުރަމުންނެވެ. ސީޑީޓީގެ އެ ނިޒާމަށް ވޮޝިންޓަންގެ "ކޮމްޕިއުޓަ ވޯލްޑް ސްމިތްސޯނިއަން އެވޯޑް ފޮ އިމްޕްލިމެންޓިން ކޮމްޕިއުޓަ ޓެކްނޮލޮޖީ ޓު ޕްރޮޑިއުސް ބެނިފިޝަލް ޗޭންޖަސް ފޮ ސޮސައިޓީ" އެވޯޑު 1990 ވަނަ އަހަރު ލިބިފައިވެ އެވެ.
ހޯމްލޭންޑް މިނިސްޓްރީން ބުނީ ޑީމެޑް ޕްރޮޖެކްޓުގެ ވެބްސައިޓް މެދުވެރިކޮށް އެ ޕްރޮޖެކްޓުން ކުރިއަށް ގެންދާ މަސައްކަތްތަކުގެ މައުލޫމާތު ލިބޭނެ ކަމަށެވެ.
Ads by STO
