ގެއްލިގެން ހޯދަމުން އަންނަ ޗައިނާގެ ފަތުރުވެރިޔާ އަދިވެސް ނުފެނޭ
މިދިޔަ އޮކްޓޫބަރު މަހު ރާއްޖެ އައިސް އުޅެނިކޮށް ގެއްލުނު ޗައިނާގެ ފަތުރުވެރިޔާ އަދިވެސް ނުފެންނަ ކަމަށް ފުލުހުން ބުނެފި އެވެ.
ރާއްޖެ އައި ޗައިނާގެ ފަތުރުވެރިޔެއް ނުފެނިގެން ހޯދަމުން އަންނަ ކަމަށް ފުލުހުން ހާމަކުރީ މިދިޔަ ހޯމަ ދުވަހު އެވެ. އޭނާގެ ފޮޓޯއަކާ އެކު ފުލުހުންގެ ވެބްސައިޓުގައި އެ ދުވަހު ޝާއިއުކުރި ލިޔުމުގައި ބުނީ ފަތުރުވެރިޔާ ގެއްލިފައިވާ ކަމަށް ރިޕޯޓުކުރުމާ ގުޅިގެން އެ މީހާ ހޯދުމުގެ މަސައްކަތް ފަށާފައިވާ ކަމަށެވެ.
ގެއްލިގެން ހޯދަމުން ދަނީ ޗައިނާ ރައްޔިތެއް ކަމަށްވާ ސޫ ޒިއޯނިން (30އ) އެވެ.
ސޫ ޒިއޯނިން ރާއްޖެ އައިފަހުން އާއިލާއަށް ހަބަރެއް ވެފައި ނުވާތީ، ވީނުވީއެއް ނޭނގި ގެއްލިގެން އާއިލާގެ ފަރާތުން ފުލުހުންނަށް މައްސަލަ ރިޕޯޓުކުރީ ރާއްޖޭގައި ހުންނަ ޗައިނާ އެމްބަސީ މެދުވެރިކޮށެވެ. އެ މައްސަލަ ފުލުހުންނަށް ހުށަހަޅާފައި ވަނީ މި މަހުގެ 22 ވަނަ ދުވަހު އެވެ.
ފުލުހުން ބުނެފައިވާ ގޮތުގައި މައްސަލަ ފުލުހުންނަށް ރިޕޯޓުކުރުމާ އެކު، އޭނާ ހޯދުމަށް ފުލުހުންގެ ކަމާ ގުޅުންހުރި އެންމެހާ ބަހާތަކަށް މައުލޫމާތު ހިއްސާކުރެވި، ހޯދުމުގެ މަސައްކަތް ދަނީ ކުރަމުން ކަމުގަ އެވެ.
ސޫ ޒިއޯނިން ޓުއަރިސްޓް ވިސާގައި ރާއްޖެ އައިސްފައި ވަނީ މިިދިޔަ އޮކްޓޫބަރު މަހުގެ 13 ވަނަ ދުވަހު ކަމަށް އެނގިފައިވާ ކަމަށް ފުލުހުން ބުނެފައިވެ އެވެ. އަދި އޭނާ މާލޭގައި ހުރި ގެސްޓް ހައުސްއިން އޮކްޓޫބަރު 24 ވަނަ ދުވަހު ހެނދުނުގެ ވަގުތެއްގައި ޗެކްއައުޓް ވެފައިވާ ކަމުގަ އެވެ.
ފުލުހުން ބުނެފައި ވަނީ ޗެކްއައުޓްވުމަށް ފަހު، އޭނާ ރާއްޖެއިން ފުރައިގެން ގޮސްފައިނުވާކަން ތަހުގީގަށް މައުލޫމާތު ލިބިފައިވާ ކަމަށެވެ. ނަމަވެސް ސޫ ޒިއޯނިން ހޯދުމަށް ކުރެވުނު މަސައްކަތުން އޭނާ އާ ބެހޭ އެއްވެސް މައުލޫމާތެއް އަދި އުޅޭތަނެއް ހޯދިފައި ނުވާ ކަމަށެވެ.
ފުލުހުންގެ މީޑިއާ އޮފިޝަލް މިއަދު "ދެން" އަށް ވިދާޅުވީ ޗައިނާއަށް ނިސްބަތްވާ ފަތުރުވެރިޔާ ހޯދުމަށް ކުރެވުނު މަސައްކަތުގައި މިހާތަނަށް އޭނާ އާ ގުޅުންހުރި މައުލޫމާތެއް ހޯދިފައި ނުވާ ކަމަށެވެ.
ފުލުހުން ވަނީ ސޫ ޒިއޯނިން އާ ބެހޭ އެއްވެސް މައުލޫމާތެއް ލިބިފައިވާ ނަމަ، ސީރިއަސް އެންޑް އޮގަނައިޒް ކްރައިމް އިންވެސްޓިގޭޝަންގެ ޑިއުޓީ ނަންބަރު 9911099 އަށް ގުޅައި ހިއްސާކޮށްދިނުމަށް އެދިފަ އެވެ.
Ads by STO
