ޚަބަރު

އޮޅުހިޔާ ފެސިލިޓީއަށް ބުޅާތައް ގެންދިއުމުގެ މަސައްކަތް ފަށައިފި

މުޙައްމަދު ޢަތީފް ، ދެން އޮންލައިން

މާލެ ސަރަހައްދުގެ މަގުތަކުގައި އުޅޭ ބުޅާތަކަށް ހާއްސަކޮށް މާލެ ސިޓީ ކައުންސިލުން ހުުޅުމާލޭގެ ފޭސް 2 ގައި ތަރައްގީކުރި އޮޅުހިޔާ ފެސިލިޓީއަށް ބުޅާތައް ގެންދިއުމުގެ މަސައްކަތް ފަށައިފި އެވެ.

Ads by STELCO

މަގުތަކުގައި ގިނަވަމުންދާ ބުޅަލުގެ މައްސަލައަށް ދާއިމީ ހައްލެއް ހޯދުމުގެ ގޮތުން ޒަމާނީ ފެންވަރަށް ތަރައްގީކުރި ފެސިލިޓީ ހުޅުވީ މިދިޔަ ނޮވެމްބަރު މަހުގެ 2 ވަނަ ދުވަހު އެވެ.

ސިޓީ ކައުންސިލުން ޕްލޭންކޮށްފައި އޮތީ ބުޅާތައް ފެސިލިޓީއަށް ގެންދިއުމުގެ މަސައްކަތް ޑިސެމްބަރު މަހުގެ 3 ވަނަ ދުވަހު ފަށާށެވެ. ނަމަވެސް އަމަލުކުރާނެ އެސްއޯޕީތަކަށް ރިއާޔަތްނުކޮށް، އެ ފެސިލިޓީއަށް ބުޅާތައް ގެންދަން ފަށައިފި ނަމަ، ބުޅާތަކުގެ ސިއްހަތަށާއި ދުޅަހެޔޮ ކަމަށް ނޭދެވޭ އަސަރުތަކެއް ކުރުން އެކަށީގެންވާތީ ކަންކަން ފުރިހަމަ ކުރުމަށް ފަހުގައި ނޫނީ އެ ތަނަށް ބުޅާތައް ނުގެންދިއުމަށް މިނިސްޓްރީން އެންގި އެވެ.

އެ އެންގުމާ އެއްގޮތަށް ބުޅާތައް ފެސިލިޓީއަށް ގެންދިއުމުގެ މަސައްކަތް މެދުކަނޑާލައި ނިންމީ، މިނިސްޓްރީން ފެސިލިޓީގެ މަސައްކަތް ފަށައިގަންނާނެ ވަކި ޓައިމްލައިނެއް ލިބި، ސިޓީ ކައުންސިލުން ކުރި ހޭދަ އަނބުރާ ލިބޭ ގޮތަށް ބުޅާ ފެސިލިޓީ މިނިސްޓްރީ އާ ހަވާލު ކުރުމަށެވެ. އެގޮތަށް މާލެ ސިޓީ ކައުންސިލުން ނިންމާފައި ވަނީ މިދިޔަ ޑިސެމްބަރު މަހުގެ 4 ވަނަ ދުވަހު ބޭއްވި ކައުންސިލުގެ ޖަލްސާގަ އެވެ.

‏އޮޅުހިޔާ ފެސިލިޓީގެ ރަސްމީ ހުރިހާ ލިޔެކިޔުންތަކާއި ލީގަލް އެސެޓްސް ޓްރާންސްފާގެ މަސައްކަތް ނިންމުމަށް ފަހު، މާލެ ސިޓީ ކައުންސިލުން ރަސްމީކޮށް ފެސިލިޓީ އެނިމަލް ވެލްފެއާ މިނިސްޓްރީ އާ ހަވާލުކުރީ އިއްޔެ އެވެ.

އޮޅުހިޔާ ފެސިލިޓީ އާއި ރަސްމީކޮށް ހަވާލުވެފައިވާއިރު، ފެސިލިޓީ ފަށައިގަތުމަށް ބޭނުންވާ ކަންކަން ފުރިހަމަވެފައި ނެތުމުން، އެ ކަންކަން ވީ އެންމެ އަވަހަކަށް ފުރިހަމަކޮށް ހިދުމަތްދޭން ފެށުމަށް ހާއްސަ ޓާސްކް ފޯހެއް އެކުލަވާލާފައިވާ ކަމަށް އެ މިނިސްޓްރީން ބުނެފައިވެ އެވެ. އޮޅުހިޔާގެ ހިދުމަތް އަވަހަށް ފެށުމުގެ މަސައްކަތް ވަރަށް ބާރު ސްޕީޑުގައި ކުރިއަށްދާ ކަމަށް ވެސް ފާހަގަކޮށްފައިވެ އެވެ.

އެނިމަލް ވެލްފެއާ މިނިސްޓްރީން މިއަދު "އެކްސް" ގައި ކުރި ޕޯސްޓެއްގައި ބުނީ އޮޅުހިޔާ ފެސިލިޓީ އާ ހަވާލުވިތާ 16 ގަޑިއިރުގެ ތެރޭގައި އެ މިނިސްޓްރީގެ ޓީމުން ވަނީ އާ ކަރަންޓީން ސަރަހައްދަށް ބޭނުންވާ ވަސީލަތްތައް ގާއިމުކޮށް ހުރިހާ ކަމެއް ފުރިހަމަކޮށްފައި ކަމަށެވެ.

އޮޅުހިޔާ ފެސިލިޓީއަށް މިހާތަނަށް 15 ބުޅާ ގެންދެވިފައިވާ ކަމަށް މިނިސްޓްރީން ބުންޏެވެ. އެކަން ކުރެވުނީ މިނިސްޓްރީގެ ޓާސްކް ފޯހުން ހުއްޓުމެއް ނެތި ކުރި މަސައްކަތާއި ޖަމިއްޔާތަކުންދިން އެއްބާރުލުމާ އެކުގައިކަން ފާހަަގަކުރި އެެވެ.

Ads by Ooredoo
  1. މާ ލޭމާ

    ވަރަށްރަނގަޅު ކަމެއް ތިޔަމިނިސްޱުރީން ތިކޮށްދެއްވީ
    އެހާމެ ކުޱަވަގުތުކޮޅެއްގަ. އަދި އެއިގެން ދޭހަވަނީ ކަމެއްކުރަން ހަވާލުވެއްޖެނަމަ ނަމަކަށްނުމެވެ ކަމަކަށް ކަމޭހިތައިގެން އެކަމެއް ކުރާބައެއްކަން.
    ވ.ހިންހަމަޖެހޭ ތިކޮށްދެއްވަންފެއްޱެވިކަމާމެދު.
    ތިޔައީ ހަގީގީ ރައްޔިތުންދެކެ އަދި ގައުމުދެކެ ލޯބިވާ ސަރުކާރަކީ.ވ.ވ. އުފާވެއްޖެ.