ކުޑައިރު ދުވަހަކު ވެސް ފިލްމެއް ނުބަލަން: ދިޕިކާ
ދީޕިކާ ޕަދުކޯންއަކީ ބޮލީވުޑްގެ މަޝްހޫރު ތަރިންގެ ތެރެއިން އަމިއްލަ މަސައްކަތުން ބޮލީވުޑްގައި ފިޔަ ޖެހި އަދި މިހާރުވެސް ފިޔަޖަހަމުން އަންނަ ތަރިއެކެވެ. މިއާއެކު ދީޕިކާއަށް އެތަކެއް ސުވާލު ތަކެއް އަބަދުވެސް ކުރިމަތިކުރެއެވެ.
މިގޮތުން ދާދިފަހުން ދީޕިކާ މިވަނީ އޭނާގެ ސުކޫލު ހަޔާތާއި ގުޅޭ ގޮތުން މީގެ ކުރިން ހާމަކޮށްފައި ނުވާ ވާހަކައެއް ހިއްސާކޮށްފައެވެ. އެއީ އޭނާގެ ސުކޫލު ދައުރުގައި ވަގުތު ހޭދަ ކުރި ގޮތުގެ ވާހަކައެވެ.
މަޝްހޫރު ބެޑްމިންޓަން ތަރިއެއް ކަމަށްވާ ޕްރަކާޝް ޕަދުކޯންގެ ދަރިފުޅު ދީޕިކާ ބޮލީވުޑްގެ ދުނިޔެއަށް އައުމުގެ ކުރިން، އޭނާގެ ބައްޕަ އޭނާ ތައްޔާރު ކުރީ، ބައްޕަ ފަދަ އެތްލީޓްއަކަށް އޭނާ ހެދޭތޯއެވެ.
"އޭރު އެއްވެސް ވަރަކަށް ފިލްމެއް ނުބަލަން. ފުރަތަމަ ހޭލައިގެން ދަނީ ކަސްރަތު ކުރަން. ނިންމާފަ ސްކޫލަށް، ސްކޫލް ނިމިގެން ބެޑްމިންޓަން ޕްރެކްޓިސްއަށް. ޕްރެކްޓިސް ހަމަ ނިންމާތަނުން ޖެހޭނެ ދާން ޓިއުޝަން ނަގަން. ދެން އަންނައިރު ހުންނާނީ ވަރަށް ބޮޑަށް ވާޅުވެފަ. ދެން އެހެންވެ ހަމަ ޖެހޭތަނުން ނިދޭނެ." ދީޕިކާގެ ސްކޫލު ދައުރުގެ ދުވަހުގެ ތާވަލު ކިޔައިދެމުން ބުނެފައިވެއެވެ.
ދީޕިކާ އިތުރަށް ބުނެފައި ވަނީ، އޭނާއަކީ އަބަދުވެސް ވަރަށް ގިނަ ކަންކަމަށް ލޯބި ކުރާ މީހެއް ކަމަށާއި އެގޮތުން އެކްޓިންއަކީ ވެސް އޭގެ ތެރެއިން އެއްކަންތައް ކަމަށެވެ. ނަމަވެސް ކުޑައިރު، އޭނާ އެކްޓް ކުރަން އެހާ ފޯރި ނުހުންނަ ކަމަށާއި ކުޑައިރު ދުވަހަކު ވެސް އޭނާ ފިލްމެއް ނުބަލާ ކަމަށް ވެސް ދީޕިކާ ބުނެފައިވެއެވެ.
"ކިޔެވުމާއި ކުޅިވަރުގައި އަހަރެން މުޅި ދުވަސް ހޭދަ ކުރަނީ. ފިލްމެއް ދުވަހަކުވެސް ނުބަލަން ކުޑައިރު." ދީޕިކާ ބުނެފައިވެއެވެ.
މި އިންޓަރވިއުގައި ދީޕިކާ އިތުރަށް ބުނެފައިވަނީ، އޭނާ އަދިވެސް ކުޅިވަރު ކުޅޭ ހިތްވާ ކަމަށާއި ކުޅިވަރަކީ މީހާއަށް އަޚްލާޤް ގެނެސްދޭ އެއްޗެއް ކަމަށެވެ.
